Hangtud sa Sunod Natong Panagkita
Gigiyahan pinaagi sa Buhi nga mga Propeta
Gikan sa “Another Prophet Now Has Come!” Ensign, Ene. 1973, 116–18. Ang punctuation gi-standardize.
Ang Dios kanunayng makig-istorya sa mga tawo pinaagi sa buhi nga mga propeta.
Ang usa ka bag-o nga propeta sa Dios … usa diha sa nagsunod nga dinasig nga kalalakin-an nga balaanong gitawag aron mangalagad karon ug magdala og bag-ong pagpadayag gikan sa langit ngadto sa matag lalaki, babaye, ug bata kinsa maminaw.
Ang pagtudlo sa [usa ka] bag-o nga propeta mahinungdanon sa matag tawo kinsa mituo sa Dios, ug ilabi na sa matag tumutuo diha ni Ginoong Jesukristo. …
Kanunay kon ang Ginoo dunay katawhan sa yuta kinsa Iyang giila isip Iyang kaugalingon, gipangulohan Niya sila pinaagi sa buhi nga mga propeta kang kinsa gihatag Niya ang giya gikan sa langit. …
Ang susama nga nagsunod nga dinasig nga kalalakin-an karon naestablisar na sa modernong panahon. Natuman kini isip resulta sa Pagpahiuli sa ebanghelyo ni Ginoong Jesukristo pinaagi sa Iyang manalagna sa ulahing mga adlaw, si Joseph Smith …
Sukwahi sa sagad nga gituohan, ang Ginoo usa ka Dios nga makig-istorya, usa ka Dios sa pagpadayag. Siya usa ka Dios sa kahayag ug salabutan, sa kahibalo ug kasayuran. Dili Siya makigsabut diha sa kangitngit, ni Siya moluwas ni bisan kinsa diha sa pagkawalay alamag. Ang Iyang tibuok nga plano sa kaluwasan nagbase sa pakig-istorya uban sa nalamdagan nga katawhan.
Kinsa man ang makasimba sa intelihente nga paagi kon magpabilin diha sa pagkawalay alamag?
Kinsa man ang makabaton og makahuluganong pagtuo kon walay kahibalo bahin sa Dios?
Ug kang kinsa man moabut kining kahibalo kon dili gikan sa Dios Mismo? …
Ang mga tawhanong nilalang hinay nga makakat-on sa mga paagi sa Ginoo, ug ilabi na hinay sila nga molihok sa pagdawat sa kamatuoran nga bisan tuod nga andam Siya nga makig-istorya kanila, ang Iyang pamaagi sa pagbuhat sa ingon mao ang pinaagi sa dinasig nga buhing kalalakin-an kinsa Iyang gisangunan isip mga propeta.
Usa kini ka sumbanan uban Kaniya. Kini ang Iyang pamaagi sa pagbuhat sa mga butang, ug wala Niya kini usba. Siya sama gihapon kaniadto, karon, ug sa kahangturan, ug mao usab ang Iyang mga pamaagi. …
Sa maligdong nga paagi kami mopamatuod nga ang komunikasyon tali sa langit ug sa yuta naestablisar na pag-usab sa atong panahon. Mopahayag kami nga ang Dios wala magpalayo sa kalibutan.
Siya dili patay. Siya buhi.
Siya dili buta. Siya makakita.
Siya dili bungol. Siya maminaw.
Siya dili amang. Siya moistorya, sa maayo nga paagi, ngadto sa iyang buhi nga mga propeta ug pinaagi kanila ngadto sa tibuok kalibutan.
Niining paagiha nakig-istorya ang Dios kaninyo karon.