Kalimtan ang Kinabuhi nga Akong Giplanohan

Jeannette Cox

Texas, USA

Sa dihang sais o siyete anyos pa ko, nahibalo ko nga gusto ko nga mahimong usa ka oceanographer. Nag-focus ko sa akong tumong, naningkamot og maayo, ug nakaeskwela sa maayo nga kolehiyo. Mikuha ko og pipila ka kurso sa zoology ug ganahan niini. Pero sa nagkadugay na ko sa akong pagtuon, nahingangha ko sa lawas sa tawo, ilabi na sa cellular level. Nakadesisyon ko nga mahimong usa ka pathologist.

Wala madugay nahimamat nako ang umaabut nako nga bana, ug nakadesisyon mi nga magminyo. Ang pagbaton og pamilya kanunay nga bahin sa akong plano, pero samtang nahibalo ko nga mahimo kong usa ka banggiitan nga doktor ug banggiitan nga inahan, akong gibati nga dili ko mahimong banggiitan sa duha sa samang panahon. Tungod kay ang pamilya mahinungdanon sa plano sa Ginoo bahin sa kaluwasan, nakadesisyon ko nga mahimo unang usa ka inahan. Naghunahuna ko nga sa higayon nga moeskwela na ang akong mga anak, makabalik ra ko mismo sa pag-eskwela.

Sa dihang ang kinamanghuran nakong anak misulod sa kindergarten, nagsugod ko sa proseso sa pag-apply alang sa usa ka PhD program sa nutritional studies sa University of Texas didto sa Austin. Sa dayon gyud unta nakong sumiter sa akong application, akong nahibaloan nga sa wala damha mabdos diay ko sa akong ikapito nga anak. Lapas na ko sa edad nga 40, ug sa higayon nga moeskwela na kining bataa, hapit na ko mag-50.

“Medyo ulahi na nga magsugod og bag-ong career nga nagkinahanglan og grabe nga pagtuon,” naghunahuna ko.

Diha-diha dayon akong nakita nga tanang damgo sa akong kinabuhi nga career nahugno sa akong palibut. Samtang nagsugod na pagkawala ang akong kadasig, usa ka kasulatan ang misantup sa akong hunahuna ug sa akong kasingkasing: “Walay bisan kinsa nga may gugma nga labaw pa niini, nga ang usa ka tawo magahalad sa iyang kinabuhi sa pagpakamatay alang sa iyang mga higala” (Juan 15:13). Kanunay nakong gikonsiderar kini nga kasulatan nga nagpasabut sa usa ka tawo nga magpakamatay alang sa lain, pero karon nagpasabut kini og mas labaw pa.

Akong naamguhan nga ang labing dako nga gugma nga akong mapakita mao ang kalimtan ang kinabuhi nga akong giplanohan alang sa akong kaugalingon ug ihatag ang akong panahon ug kusog sa pagpadako sa akong mga anak. Akong gibati nga para nako, mao kini ang gusto sa Ginoo nga akong buhaton. Oo, makatabang unta ko og daghang tawo isip usa ka doktor, pero nahibalo usab ako nga ang labing dako nga epekto sa kahangturan nga akong mahimo anaa sa kinabuhi sa kaugalingon nakong mga anak.