Mga Ambasador sa Paglaum: Pagtinabangay aron Mapugngan ang Paghikog
Makalig-on ka sa imong mga higala pinaagi sa pagpakaylap sa kahayag ug paglaum ni Jesukristo.
Mga litrato pinaagi ni Mason Coberly ug sa maayong kabubut-on ni Cydney LeMone
Sa mga diplomat, ang mga ambasador nagrepresentar sa ilang nasud ngadto sa laing grupo sa mga tawo. Pero ikaw mahimong usa ka ambasador bisan kon wala magkinahanglan og pasaporte! Sa kalibutan nga usahay morag dautan na kaayo, mahimo kang usa ka ambasador sa paglaum ug kahayag. Pangutan-a lang si Jackson L. (wala, sa brown nga karsones), gikan sa Utah, USA, kinsa sakop sa HOPE Squad sa iyang eskwelahan—usa ka peer-to-peer nga programa aron mapugngan ang paghikog. Pinaagi sa usa ka organisasyon nga gitawag og Hope4Utah, nakakat-on siya sa pag-ila sa pasidaan nga mga timailhan, mahimong usa ka higala, ug magdala og paglaum ngadto sa iyang eskwelahan.
Nagkinahanglan kami KANINYO
“Ang pag-apil sa HOPE Squad nakapabuka gayud sa akong mga mata,” miingon si Jackson. “Dunay mga klasmeyt, mga higala, ug mga sakop sa inyong pamilya nga nanglimbasug.”
Nakat-unan ni Jackson nga bisan dili siya maoy responsable alang sa mga desisyon nga himoon sa iyang mga higala, dunay mga butang nga iyang mabuhat aron makatabang nila nga makalingkawas sa usa ka problema. Ang mga pagtuon nagpakita nga 7 sa 10 ka tin-edyer kinsa nagmagul-anon o naghunahuna mahitungod sa paghikog mosulti ngadto sa usa ka higala sa dilli pa sila mosulti ngadto sa usa ka hamtong.1 Nagpasabut kana nga anaa kamo sa usa ka makaimpluwensyang posisyon sa pagtabang sa inyong mga higala.
Sama sa giingon ni Sister Carol F. McConkie, kanhi Unang Magtatambag sa Kinatibuk-ang Kapangulohan sa Young Women: “Duna kitay responsibilidad nga makigsaad nga magbantay sa usag usa, nga makigtambayayong sa lain ug molakaw og dungan niini nga dalan. Sa laing pagkasulti, ibutang ang cellphone ug pangita ug tan-awa kon si kinsa ang nagkinahanglan sa inyong tabang.”2
Dili kinahanglan nga kabahin kamo og usa ka pormal nga organisasyon aron makahimo og kalainan diha sa eskwelahan o uban sa inyong mga higala. Ania ang mga tips nga magamit bisan unsang panahona, bisan asa.
Unsay Buhaton
Aron mahimong usa ka ambasador sa paglaum, sulayi sa pag-ila, pagtabang, ug pagreport.
-
Ilha ang pasidaan nga mga timailhan nga ang usa ka tawo nagkinahanglan og tabang.3 Pangitaa kadtong kinsa:
-
Mibati og kaguol o kawalay paglaum.
-
Milihok nga dili maghunahuna.
-
Mipalayo sa mga higala ug mga kalihokan.
-
Gipanghatag ang bililhong mga kabtangan.
-
Nagsagubang og makapaguol nga mga sitwasyon sama sa namatyan, dagkong kausaban sa kinabuhi, bullying, ubp.
-
Miusab sa mga naandang pagkatulog, pagkaon, o hygiene.
-
Maghisgot o maghimo og mga plano nga maghikog—nga mosulti og mga butang sama sa, “Unta wala na lang ko matawo” o “Mas maayo ang kinabuhi sa tanan kon wala ko.”
-
Motabang. Ang pag-ugmad og relasyon uban sa laing mga tawo usa ka mahinungdanong bahin sa pagkahimong usa ka ambasador. Pangita og higayon nga kamo ug ang inyong higala magkaistoryahanay nga walay gitago. Siguro mabalaka kamo nga ang paghisgot bahin sa pagpasakit sa kaugalingon o paghikog mas makapasamut hinoon, pero dili kana tinuod. Kon kamo dunay kaisug nga mosulti kon unsay angay nga isulti, sa tinuod lang gihatagan ninyo sila og paagi sa pagluwas sa ilang kaugalingon ug sa pagpahibalo kanila nga nagpakabana kamo.
“Ayaw kahadlok nga mangutana sa usa ka higala kon nanglimbasug ba sila,” miingon si Dr. Greg Hudnall, usa ka eksperto sa pagpugong sa paghikog ug founder sa Hope4Utah. “Diretsuha pag-istorya, pero ayaw paglektyur o paghukom.” Misugyot siya sa paggamit sa “Ako” nga mensahe, nga makita nga nagpakabana ug nabalaka imbis nga naglektyur. Pananglitan: “Nakabantay ko sa klase karon nga nanglimbasug ka. Naghunahuna lang ko kon OK ra ba ka. Naghunahuna ka ba nga pasakitan ang imong kaugalingon?”
Pag-ampo nga ang Espiritu motabang kaninyo nga mahibalo kon unsa ang isulti. Kon ang inyong mga higala nanglimbasug sa mga hunahuna sa paghikog o sa ubang bug-at nga mga hagit sama sa depresyon o kabalaka, ayaw lang sila sultihi nga mohunong sa pagbati niana! Si Elder Dale G. Renlund sa Korum sa Napulog Duha ka mga Apostoles nagtudlo, “Ang paagi sa atong pagpakig-istorya sa usa ka tawo kinsa himsug ug siguro nagsagubang og temporaryo nga panahon sa kagul-anan lahi kay sa atong pagpakig-istorya sa usa ka tawo nga dunay sakit sa utok.” Misugyot siya sa pagsulti og sama sa, “Wala ka mag-inusara. Ania kami aron motabang nimo. Motabang mi nimo sa pagsulbad niini.”
Ug hinumdumi nga maminaw gayud imbis nga magplano kon unsay sunod ninyong isulti. Sama sa giingon ni Elder Renlund, “Ang pagpaistorya sa usa ka tawo ug pagpasabut kon unsay ilang gibati, ug pag-awhag kanila nga mosulti, tingali mas importante pa kay sa paghatag og tambag.”4
-
Moreport. Kon mahibalo kamo nga ang inyong higala nanglimbasug, mahimong matintal kamo nga inyo na lang iluom kining mga kabalaka. Ang inyong higala mahimo pa gani nga mohangyo ninyo nga dili mosulti ni bisan kinsa. Pero ang mga ambasador mosulti gyud! Tanyag sa pag-uban kanila aron makigsulti sa usa ka masaligan nga hamtong, sama sa ginikanan, tigtambag sa eskwelahan, o lider sa simbahan. I-refer sila sa inyong national suicide help line o crisis text line. Kon mohulga sila nga pasakitan ang ilang kaugalingon o ang uban, dad-a sila sa ospital o tawag og mga emergency service, ug ubani sila hangtud nga makadawat sila og propesyonal nga tabang. Kon wala sila sa hinanaling peligro, pangita og mga paagi nga maapil o masuportahan sila. “Paghimo og mga oportunidad nga mahimo silang kabahin sa usa ka butang,” miingon si Dr. Hudnall, “Sulayi sila sa pagdapit sa pagbuhat og butang nga aktibo uban ninyo, sama sa pagdagan, pagbisikleta, o paglangoy.” Ang pisikal nga mga kalihokan maayo tungod kay ang paglihok makatabang sa pagpalambo sa buot.
Ayaw Pakaubsa ang Inyong Impluwensya
Hunahunaa sulod sa usa ka minuto kon unsa ka lahi ang kalibutan kon ang matag tawo dunay mosuporta nga higala. Dili nato maluwas ang tibuok kalibutan, pero mahimo kitang usa ka higala niadtong nagkinahanglan og usa.
Si Sister McConkie miawhag kanato nga mahimong “andam nga makighigala sa daghan pa nga mga tawo” ug “modawat sa uban, bisan kon lahi sila kay kaninyo.” Iyang gipasabut nga ang pagpakighigala sa usa ka tawo mahimong makahimo og kalainan tali nila nga magpadayon uban sa paglaum o sa pagbuhat og butang nga makadaut, sama sa paghikog. “Himoa nga kamo mao ang kalainan,” miawhag siya. “Aduna kamo nianang dugang nga kapasidad alang sa kaayohan.”
Pinaagi sa pagtabang, nagsunod kamo sa ehemplo sa labing importante nga tinubdan sa paglaum: si Jesukristo.
“Ang among HOPE Squad adviser nagsulti namo nga kami ‘mga ambasador sa paglaum,’” miingon si Jackson. “Ganahan ko niana, tungod kay dili lamang kami mga ambasador sa paglaum pero mga ambasador usab ni Jesukristo. Labaw sa tanan, Siya mao ang atong paglaum.”
Kon mopakita kita og gugma nga sama kang Kristo ngadto sa uban, makatabang kita kanila nga makakita og paglaum ug pagkaayo.
“Nasayud ko nga kon ania pa sa yuta si Jesukristo, motabang Siya sa uban sama sa atong gibuhat,” miingon si Jackson. “Nakahatag kini kanako og kahupayan nga mahibalo nga nagbuhat ko sama sa unsay Iyang buhaton.”