Mga Hulagway sa Hugot nga Pagtuo
Libuletswe Gofrey Mokgatle
Gauteng, South Africa
Nawad-an og panan-aw si Libuletswe sa dihang 21 anyos siya. Nakakat-on siya og daghang butang, apan wala gayud siya makakat-on og Braille. Ganahan siya nga mobasa sa mga kasulatan, busa nag-ampo siya sa Dios alang sa tabang.
Cody Bell, litratista
Niadtong 1991, ganahan gyud ko nga moserbisyo sa Ginoo, apan wala ko masayud kon unsaon nako sa pagserbisyo. Nag-ampo ko mahitungod niini ug naghunahuna nga mopasakop og usa ka born-again nga simbahan. Samtang naghunahuna ko nga mao kini ang hustong dalan, duha ka batan-ong mga lalaki nga dunay puti nga mga polo ang nanuktok sa akong pultahan.
Giablihan sa akong asawa ang pultahan ug gisultihan ko nga naghunahuna siya nga mga estudyante sila, apan mipaila sila sa ilang kaugalingon isip mga misyonaryo sa Ang Simbahan ni Jesukristo sa mga Santos sa Ulahing mga Adlaw. Gusto nilang mopakigbahin sa ebanghelyo ngari nako. Gidawat nako.
Dunay panaghisgutan ang mga misyonaryo uban nako ug sa akong pamilya, ug dayon gibilin nila ang Basahon ni Mormon ngari namo ug miingon nga kinahanglan namong mobasa niini. Gisultihan nako sila nga ang akong pamilya kinahanglang mobasa niini ngari nako tungod kay usa ko ka buta. Naghimo mi og laing appointment uban sa mga misyonaryo.
Sa dihang mibalik sila, miingon ko, “Wala pa ko mabasahi sa akong pamilya sa Basahon ni Mormon. Busy sila, ug wala silay panahon para nako.”
Gisultihan dayon ko sa mga misyonaryo nga ang Simbahan mihimo og mga audio cassette sa Basahon ni Mormon. Nangutana sila kon maminaw ba ko niini kon dad-an ko nila niini. Miuyon ko nga buhaton kana. Sa sunod nga higayon, miabut sila nga nagdala og kahon sa Basahon ni Mormon diha sa mga audio cassette ug gihatag ngari nako. Abi nako og bayaran nako kini, pero gihatag nila kini ngari nako nga libre.
Nagsugod ko sa pagpaminaw sa mga cassette, ug nalingaw ko niini. Sa sunod nga higayon nga miabut ang mga misyonaryo sa akong balay, kauban nila kining laing tawo. Gikan siya sa silingang lungsod aron bisitahon ang iyang pamilya. Usa siya ka miyembro sa Simbahan, ug giagni ko niya nga mosimba uban niya pagka-Dominggo.
Sa unang Dominggo nakadungog ko sa ebanghelyo nga sama sa wala pa nako kini madungog sukad. Dili kini usa ka simbahan nga makakita ka og daghang tawo sa sulod, pero duna koy gibati. Akong nabantayan nga ang mga himno sa Simbahan lahi kay sa tanang himno nga akong napaminawan sa laing mga simbahan. Dunay sige og sulti nako nga kinahanglan kong magpadayon sa pagsimba.
Dugay-dugay ko nga nagsimba, ug sa katapusan nabunyagan ko. Sa wala madugay human niana, gitawag ko nga mahimong second counselor sa Sunday School presidency. Human sa akong tawag, usa ka high councilor ang mihatag kanako og handbook. Gisultihan nako siya nga buta ko ug dili makakita aron mobasa. Miingon siya nga mahimo nakong dad-on kining handbook ug hangyuon ang laing tawo nga mobasa niini para nako. “Dayon mahibalo ka sa imong mga responsibilidad isip second counselor sa Sunday School,” miingon siya.
Nangita ko og tawo nga mobasa niini ngari nako. Usa sa mga misyonaryo miuyon nga mobasa sa manwal ngari nako ug irekord kini. Samtang naminaw ko sa iyang girekord, nagsugod ko sa pagkasabut sa akong mga responsibilidad. Nagpadayon ko sa pagserbisyo didto sulod sa dugay-dugay nga panahon.
Dayon gitawag ko nga mahimong second counselor sa elders quorum. Bisan didto duna koy manwal, pero dili nako kini magamit. Ang tanang mga miyembro sa Simbahan dunay mga manwal nga ilang magamit, ug naghunahuna ko kon dili ba kini bug-at ra nga magdepende ko sa ubang tawo nga kanunay nga mobasa ngari nako ug irekord kini. Nagsugod ko sa pag-ampo ug mihangyo sa akong Amahan sa Langit sa pagtabang kanako nga makakita og butang nga akong magamit aron mas masabtan ang ebanghelyo. Samtang nag-ampo, akong gibati nga ang Espiritu nagsulti kanako nga kon ako dunay hugot nga pagtuo, makabalhin pa gani ako og mga bukid.
Atol sa usa ka home teaching nga pagbisita, gisultihan nako ang usa ka sister nga among gibisitahan, “Dili ko makabasa sa mga kasulatan tungod kay dili ko makakita. Gusto kong moadto sa usa ka eskwelahan diin makakat-on ko unsaon pagbasa ug pagsulat og Braille.”
Ang iyang igsoon nagtrabaho sa usa ka eskwelahan alang sa mga buta. Gitabangan ko niya nga maka-aplay ko. Nagtuon ko og Braille kada adlaw. Momata pa gani ko sa gabii aron magpraktis sa pagbasa og Braille. Milungtad lamang kini og upat ka bulan aron makabasa ko niini.
Nahuman ko sa pag-eskwela ug gisultihan ang akong branch president nga makabasa na ko karon og Braille. Gihatagan ko niya og kahon nga dunay manwal alang sa priesthood ug sa tanang kasulatan nga anaa sa Braille. Wala gyud ko masayud nga duna diay niadtong mga butanga ang Simbahan. Nianang higayuna nagsugod ko sa tinuoray nga pagkasabut ug pagkalingaw sa ebanghelyo.
Gitawag ko sa bishopric, ug nagserbisyo ko niana nga calling sulod siguro sa mga 10 ka tuig. Makabarug na ko karon sa atubangan sa ubang mga tawo ug makatudlo pinaagi sa Espiritu. Kay ang pagbasa og Braille diha sa leksyon mogahin man og daghang panahon, magpraktis ko ug magkat-on sa leksyon diha sa panimalay aron makatudlo ko nga walay manwal sa atubangan nako.
Nasayud ko nga ang mga kasulatan tinuod. Nakakat-on ko gikan niini sa matag higayon nga magbasa ko niini. Kanunay nga dunay butang nga akong maangkon gikan niini.
Ganahan ko nga mosunod sa mga kamatuoran nga akong nakat-unan gikan sa mga kasulatan. Pananglitan, “Kon ikaw maghupot sa akong mga sugo ug molahutay ngadto sa katapusan ikaw makaangkon og kinabuhi nga dayon” (D&P 14:7).
Si Siphiwe Ndou (sa wala), usa ka returned missionary, nakig-istorya ni Libuletswe atol sa ward family home evening.
Ang pagkat-on sa pagbasa og Braille nakaabli og daghang oportunidad alang kang Libuletswe. Ang labing importante ngadto niya mao ang iyang oportunidad nga makatuon sa ebanghelyo.
Si Naledi Modige (sa tunga), kaubang miyembro sa ward, nakigkinataw-anay uban ni Libuletswe ug sa iyang asawa, si Makhosazana (layo sa wala), atol sa family home evening. Ang mga Mokgatle ganahan nga dunay mga tawo sa ilang panimalay.
Gipaabangan nila ni Libuletswe ug Makhosazana ang pipila ka kwarto sa ilang panimalay. Malingaw sila sa mga kahigayunan nga makaistorya nila ang mga nangabang.