Mga Baruganan sa Pagpangalagad

Makigtambag mahitungod sa Ilang mga Panginahanglan

Dili kinahanglan nga mag-inusara ka sa pagbuhat niini. Ang pagtambag makahatag og tabang nga imong gikinahanglan aron sa pagtabang sa uban.

Gidapit ka sa Dios sa pagpangalagad sa indibidwal o pamilya diha sa inyong ward o branch sumala sa ilang mga panginahanglan. Unsaon man nimo pagkahibalo kon unsa kadto nga mga panginahanglan? Ang baruganan sa pagtambag, nga mao ang gi-focus gayud sa Simbahan, mao ang yawe.

Human maghisgot kon unsa kaha ang atong ikonsiderar sa pagtambag, atong susihon ang:

1. Pakigtambag sa Langitnong Amahan.

2. Pakigtambag sa na-assign nga indibidwal ug pamilya.

3. Pakigtambag sa atong kauban.

4. Ug pakigtambag sa uban nga na-assign sa samang indibidwal o pamilya.

Ang pakigtambag sa atong mga lider mahinungdanon usab. Ang umaabut nga artikulo bahin sa Mga Baruganan sa Pagpangalagad diha sa Liahona mopakita sa pakigtambag sa mga lider ingon man usab sa tahas sa mga interbyu sa pagpangalagad niana nga proseso.

Unsa man ang Atong Itambag

Ang pagsabut sa mga panginahanglan mahinungdanon sa pagpangalagad sa usag usa. Pero unsang mga matang kadto nga mga panginahanglan, ug duna bay mas labaw pa sa mga panginahanglan nga angayan natong mahibaloan?

Ang mga panginahanglan moabut sa daghang matang. Kadtong atong serbisyuhan mahimong mag-atubang og mga hagit nga emosyonal, pinansyal, pisikal, pang-edukasyon, ug uban pa. Ang ubang mga panginahanglan mas taas og prayoridad kay sa uban. Ang uban atong matabangan; ang uban mahimong kita mismo ang mangita og ikatabang. Sa atong mga paningkamot nga makatabang sa pagtubag sa temporal nga mga panginahanglan, ayaw kalimot nga ang atong tawag sa pagpangalagad naglakip sa pagtabang sa uban nga mouswag diha sa dalan sa pakigsaad, mangandam ug modawat sa mga ordinansa sa priesthood nga gikinahanglan alang sa kahimayaan.

Agig dugang sa pagtambag mahitungod sa mga panginahanglan sa usa ka indibidwal o pamilya, kinahanglan kitang magtinguha nga mahibalo sa ilang mga kalig-on. Unsa nga mga butang nga wala sila magkinahanglan og tabang? Unsa ang ilang mga abilidad ug mga gasa nga makapanalangin sa uban? Sa unsang paagi nga haum kini nga makatabang sa pagtukod sa gingharian sa Dios? Ang mga kalig-on sa indibidwal mahimong sama ka importante sa pagsabut sa iyang mga panginahanglan.

MGA LARAWAN GIKAN SA STOCKADOBE.COM UG GETTY IMAGES

1. Pakigtambag sa Langitnong Amahan

   Usa sa sentro nga mga baruganan sa atong tinuohan mao nga ang Langitnong Amahan makig-istorya sa Iyang mga anak (tan-awa sa Mga Artikulo sa Hugot nga Pagtuo 1:9). Kon makadawat kita og bag-ong assignment nga mangalagad sa usa ka tawo, kinahanglan kitang makigtambag sa Langitnong Amahan diha sa pag-ampo, magtinguha og ideya ug panabut bahin sa ilang mga panginahanglan ug mga kalig-on. Kana nga proseso sa pagtambag pinaagi sa pag-ampo kinahanglang magpadayon sa tibuok natong assignment sa pagpangalagad.

2. Pakigtambag sa mga Indibidwal ug mga Pamilya

   Sa unsang paagi ug kanus-a nato duolon ang mga indibidwal ug mga pamilya nga kita gitawag nga moserbisyo mahimong magkalain-lain depende sa mga kahimtang, pero ang direkta nga pakigtambag sa indibidwal o pamilya gikinahanglan para sa pag-ugmad og mga relasyon ug pagsabut sa ilang mga panginahanglan, lakip na kon sa unsang paagi sila ganahang tabangan. Mahimo nimong ilangan ang pagpangutana hangtud makapalambo og usa ka makahuluganong relasyon. Samtang walay usa ra ka hustong paagi sa pagbuhat niana, ikonsiderar ang mosunod:

   • Hibaloi kon sa unsang paagi ug kanus-a nila gustong makontak.

   • Hibaloi ang mahitungod sa ilang mga interes ug mga background.

   • Motungha nga dunay mga sugyot kon unsaon nimo pagtabang, ug hangyoa sila alang sa ilang mga sugyot.

   Samtang mag-ugmad kita og pagsalig, ikonsiderar ang paghisgot sa mga panginahanglan sa indibidwal o pamilya. Pangutana kon aghaton sa Espiritu Santo.¹ Pananglitan:

   • Unsa nga mga hagit ang ilang giatubang?

   • Unsa ang mga tumong sa ilang pamilya o sa indibidwal? Pananglitan, ganahan ba sila nga mahimong mas maayo sa pagpahigayon og regular nga family home evening, o mahimong mas self-reliant?

   • Unsaon nato pagtabang nila sa ilang mga tumong ug mga hagit?

   • Unsa nga mga ordinansa sa ebanghelyo ang mosunod diha sa ilang kinabuhi? Unsaon nato pagtabang nila aron makapangandam?

   Hinumdumi ang pagtanyag og piho nga tabang, sama sa, “Unsang gabii nga makadala mi ninyo og pagkaon karong semanaha?” Ang dili klaro nga tanyag, sama sa, “Pahibaloa mi kon duna mi mahimo,” dili kaayo makatabang.

3. Pakigtambag sa Atong Kauban

   Tungod kay ikaw ug ang imong kauban mahimong dili magkakuyog kanunay kon makig-istorya mo sa indibidwal o pamilya, importante ang pakigsabut ug pakigtambag samtang magtinguha mo og inspirasyon isip managkauban. Ania ang pipila ka pangutana nga ikonsiderar:

   • Sa unsang paagi ug kapila mo makig-istorya sa usag usa isip magkauban?

   • Unsaon sa usag usa ninyo paggamit ang inyong indibidwal nga mga kalig-on sa pagpangalagad sa mga panginahanglan sa pamilya o indibidwal?

   • Unsang mga butanga ang inyong nakat-unan, unsa ang inyong mga kasinatian, ug unsa nga mga pag-aghat ang inyong nadawat sukad sa katapusang higayon nga naghisgot mo mahitungod sa indibidwal o pamilya?

4. Pakigtambag sa Uban nga Na-aasign

   Mahimong maayo nga matag karon ug unya makig-istorya sa uban nga na-assign sa pagpangalagad sa samang indibidwal o pamilya nga kamo na-assign.

Pag-istoryahanay aron Masulbad ang mga Hagit

Si Elder Chi Hong (Sam) Wong sa Seventy migamit sa usa ka istorya gikan sa Marcos 2 sa atong panahon sa paghulagway kon sa unsang paagi nga ang magkaubang pakigtambag mihimong posible sa upat ka tawo nga makahunahuna kon unsaon nga matugutan ang usa ka tawo nga paralitiko nga maanaa sa presensya ni Jesus.

“Pwedeng mahitabo nga sama niini,” miingon si Elder Wong. “Upat ka mga tawo ang nagtuman og assignment gikan sa ilang bishop nga bisitahan, sa iyang balay, ang tawo nga paralitiko. … Sa bag-ohay nga ward council, human magkasabut bahin sa panginahanglan sa ward, ang bishop mihatag og ‘makaluwas’ nga assignment. Kining upat gisangunan sa pagtabang sa tawo nga paralitiko. …

“[Sa dihang miabut sila sa building kon asa si Jesus,] ang kwarto puno kaayo. Dili sila makaagi sa pultahan. Sigurado ko nga gisulayan nila ang tanan nga ilang mahunahunaan, apan dili gayud sila makaagi. … Nagsabut sila kon unsay sunod buhaton—unsaon nila pagdala sa tawo kang Jesukristo aron ayohon. … Duna silay plano—dili sayon, apan ila kining gibuhat.

“… ‘Ilang gibuslotan ang atop sa ibabaw niya; ug sa nakahimo na silag lungag, ilang gitonton ang higdaanan diin diha ang paralitiko’ (Marcos 2:4). …

“… ‘Sa pagkakita ni Jesus sa ilang pagsalig, siya miingon sa paralitiko, Anak, ang imong mga sala gipasaylo na’ (Marcos 2:5).”²

Pagdapit sa Paglihok

Si Elder Dieter F. Uchtdorf sa Korum sa Napulog Duha ka mga Apostoles miawhag, “Pagtinambagay, gamita ang tanang kapanguhaan nga anaa, tinguhaa ang inspirasyon sa Espiritu Santo, pangayo sa Ginoo alang sa Iyang pagtugot, ug dayon ihulho ang buktunan sa inyong mga sinina ug pagtrabaho.

“Ako mohatag kaninyo og saad: kon kamo mosunod niini nga sundanan, makadawat kamo og piho nga giya kon kinsa, unsa, kanus-a, ug asa ang pagsangkap pinaagi sa pamaagi sa Ginoo.”³

Mubo nga mga sulat

1. Tan-awa sa Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 223.

2. Chi Hong (Sam) Wong, “Magkahiusa sa Pagluwas,” Liahona, Nob. 2014, 14–15.

3. Dieter F. Uchtdorf, “Pagsangkap pinaagi sa Pamaagi sa Ginoo,” Liahona, Nob. 2011, 55.

Ang “Mga Baruganan sa Pagpangalagad” nga mga artikulo gitumong aron matabangan kita sa pagkat-on sa pag-atiman sa usag usa—dili ipaambit isip mga mensahe sa mga pagbisita. Kon makaila na kita niadtong kinsa atong gialagaran, ang Espiritu Santo moaghat kanato nga makahibalo unsa nga mensahe ang ilang gikinahanglan agig dugang sa atong pag-atiman ug kapuangod.

Ang Gahum sa Pakigtambag

“Kon ganahan mo nga mopalambo og usa ka butang, kinahanglan mong makigtambag mahitungod niini,” miingon si Presidente M. Russell Ballard, Akting nga Presidente sa Korum sa Napulog Duha ka mga Apostoles. “Kon atong [buhaton], makahimo kita og espirituhanong synergism nga mao ang dugang nga kaepektibo o kalampusan isip resulta sa hiniusang aksyon o pagtambayayong, nga ang resulta niini mas dako pa kay sa suma total sa indibidwal nga mga bahin niini” (sa R. Scott Lloyd, “Counseling with Councils Is Lord’s System, Elder Ballard Declares,” seksyon sa Church News sa LDS.org, Ene. 11, 2017, news.lds.org; “Strength in Counsel,” Ensign, Nob. 1993, 77).

Ang pag-ugmad og mga relasyon usa usab ka importante nga bahin sa pakigtambag. Tan-awa usab sa artikulo nga Mga Baruganan sa Pagpangalagad nga “Pagtukod og Makahuluganong mga Relasyon [Building Meaningful Relationships],” sa Agosto 2018 nga isyu sa Liahona, diha sa pahina 6.