Sa Digital Lamang
Sa Dihang ang Materyal nga Batok sa Mormon Miuyog sa Akong Hugot nga Pagtuo
Gisulayan nako sa pagbaliwala ang akong mga pangutana, apan nabalaka ko sa dihang nagpadayon ako sa paghunahuna niini. Makaserbisyo ba ako og misyon kon ako aduna gihapoy mga pangutana mahitungod sa ebanghelyo?
Pipila ka bulan sa wala pa ako mobiya padulong sa misyon, nakasugat ko og mga artikulo nga batok sa Mormon. Kini nga mga artikulo gipresentar og wala masabti nga impormasyon mahitungod sa kasaysayan sa Simbahan ug ni Joseph Smith nga nakapauyog sa akong pagpamatuod. Gisulayan nako sa pagbaliwala ang akong mga pangutana, apan nabalaka ko sa dihang nagpadayon ako sa paghunahuna niini. Ang mga pangutana misugod sa pagsulod sa akong hunahuna. Makaserbisyo ba ako og misyon kon ako aduna gihapoy mga pangutana mahitungod sa ebanghelyo? Mas maayo ba kaha nga dili na lang ko magmisyon? Mainiton akong nag-ampo ngadto sa Ginoo, nanghangyo Kaniya sa pagtabang nako nga matubag ang akong mga pangutana ug malig-on ang akong pagtuo, apan ang mga tubag wala moabut dayon.
Usa ka adlaw nahinumdom ko sa istorya ni Joseph Smith nga nakadawat sa Aaronic Priesthood—usa ka istorya nga kanunay nakapahingangha kanako . Samtang si Joseph naghubad sa Basahon ni Mormon, nakamatikod siya nga naghisgot kini sa bunyag. Gustong makat-on mahitungod sa hilisgutan, siya miadto sa kakahoyan uban sa iyang tigsulat, nga si Oliver Cowdery, ug nangutana sa Langitnong Amahan mahitungod sa bunyag. Ang Langitnong Amahan mitubag sa ilang pag-ampo pinaagi sa pagpadala sa anghel nga mensahero, nga si Juan Bautista, sa paghatag kanila sa Aaronic Priesthood aron sila mabunyagan ug makabaton sa awtoridad sa pagbunyag sa uban.
Kini nga istorya nagtudlo og importante nga baruganan, nga gibalik-balik kanunay sa tibuok mga kasulatan ug sa kasaysayan sa Simbahan: ang pagbasa ug pagpamalandong sa mga kasulatan makatabang nato sa dalan sa dugang nga pagpadayag ug pagpahiuli. Ang mga kasulatan naglig-on sa atong mga pagpamatuod ug nagtudlo nato sa kaimportante sa mga baruganan sa ebanghelyo “pagtulun-an human sa laing pagtulun-an” (2 Nephi 28:30), aron kita maandam sa pagdawat niini.
Nakaamgo ko nga aron mapahiuli ang akong hugot nga pagtuo, kinahanglan kong mobasa sa mga kasulatan alang sa mga tubag. Nagsugod ko sa pagbasa sa Basahon ni Mormon, nangita sa mga kasulatan nga mogiya nako ngadto sa pagpadayag nga gikinahanglan nako pag-ayo. Ug dayon nasugatan nako ang usa ka bersikulo sa 1 Nephi, diin si Nephi mitubag sa pangutana sa usa ka anghel, nga nag-ingon: “Ako nasayud nga siya [Dios] nahigugma sa iyang mga anak; bisan pa niana, ako wala masayud sa kahulugan sa tanan nga mga butang” (1 Nephi 11:17).
Samtang nagbasa ko niini nga bersikulo, nakaamgo ko nga dili kinahanglan nga makahibalo ko “sa kahulugan sa tanan nga mga butang”—ug dili nako madawat ang tanang mga tubag niini nga kinabuhi. Apan sama ni Nephi nga misalig sa iyang pagpamatuod sa dihang siya nag-atubang og konsepto nga wala niya masabti, makasalig usab ako sa unsay akong nahibaloan, ug mopadayon uban sa hugot nga pagtuo.
Sukad niana nga kasinatian, kanunay nakong sundon unsay gitudlo ni Presidente Henry B. Eyring, Ikaduhang Magtatambag sa Unang Kapangulohan, “Makita nato ang mga tubag diha sa mga kasulatan” (“Usa ka Pagtuki Mahitungod sa Pagtuon sa Kasulatan,” Liahona, Hulyo 2005, 8). Misalig ako kanunay niini nga kamatuoran kon kulang ang akong pagsabut. Sama nga ang mga kasulatan miandam ni Joseph ug Oliver sa pagdawat sa unang ordinansa sa gipahiuli nga Simbahan, nagpadayon sila sa paggiya nako diha sa dalan aron madugangan ang pagpadayag ug kahayag.