Ang Katapusang Pulong

Mga Propeta: Usa ka Timailhan sa Gugma sa Dios

Ni Elder Ulisses Soares

Sa Korum sa Napulog Duha ka mga Apostoles

Gikan sa pakigpulong sa Abril 2018 nga kinatibuk-ang komperensya.

Gusto nakong ipamatuod ninyo nga si Presidente Russell M. Nelson mao ang propeta sa Dios dinhi sa yuta. Wala pa ko kakita og tawo nga labaw kamabination ug kamapinanggaon kay kaniya. Bisan og akong gibati ang kakulang alang niini nga sagradong tawag nga moserbisyo isip sakop sa Korum sa Napulog Duha ka mga Apostoles, ang iyang mga pulong ug ang iyang malumo nga pagtan-aw kanako dihang gihatag niya kini nga responsibilidad naghatag kanako og pagbati nga gigakos sa gugma sa Manluluwas.

Dili ba panalangin man ang pagkaadunay mga propeta, manalagna, ug tigpadayag dinhi sa yuta niining mga adlawa diin kita nagpuyo, kinsa nagtinguhang mahibalo sa kabubut-on sa Ginoo ug pagsunod niini? Makahupay ang pagkahibalo nga wala kita mag-inusara sa kalibutan, bisan sa mga hagit nga atong giatubang sa kinabuhi. Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug kang Jesukristo ngadto sa Ilang katawhan.

Gikan sa kinauyukan sa akong kasingkasing, mopamatuod ko nga ang mga propeta mamulong pinaagi sa gahum sa Balaang Espiritu. Mopamatuod sila kang Kristo ug sa Iyang balaan nga misyon dinhi sa yuta. Nagrepresentar sila sa hunahuna ug kasingkasing sa Ginoo ug gitawag nga morepresentar Kaniya ug motudlo kanato unsa ang angay natong buhaton aron makabalik pagpuyo sa presensya sa Dios ug sa Iyang Anak, si Jesukristo. Bulahan kita samtang atong gamiton ang atong pagtuo ug mosunod sa ilang mga pagtulun-an. Pinaagi sa pagsunod kanila, mas sadya ang atong kinabuhi ug minus ang kakomplikado, ang atong mga kalisdanan ug mga suliran mas gaan pas-anon, ug mamugna nato ang espiritwal nga taming libut kanato nga mosalipud kanato sa mga pag-atake sa kaaway sa atong panahon.

Ligdong ko nga mopamatuod nga si Jesukristo nabanhaw, Siya buhi, ug Siya ang nagdumala sa Iyang Simbahan dinhi sa yuta pinaagi sa Iyang mga propeta, manalagna, ug tigpadayag. Mopamatuod ko nga Siya ang Manluluwas ug Manunubos sa kalibutan ug pinaagi Kaniya maluwas kita ug mahimaya sa presensya sa atong minahal nga Dios. Gihigugma nako Siya; Ako siyang gisimba. Sundon nako Siya ug buhaton ang Iyang kabubut-on ug magmahisama Kaniya.