Ang Jet Lag ug ang Pulong sa Kaalam

Andrew Lee

New Taipei City, Taiwan

Pipila ka higayon sa usa ka tuig, gikinahanglan sa akong trabaho nga mobiyahe ko gikan sa Taiwan ngadto sa San Francisco, California, USA, alang sa training. Ang problema sa pagbiyahe tali niining duha ka dapit mao ang 15 ka oras nga diperensya. Ang jet lag makapakatulog nako panahon sa adlaw, ug makapamata kini nako sa tibuok gabii.

Mga kaubanan gikan sa tibuok kalibutan motambong niining mga training. Gisultihan ko nila nga nasulbad nila ang jet lag pinaagi sa pag-inom og kape aron magpabilin silang magmata ug moinom og red wine aron tabangan sila nga makatulog.

Ang ubang mga kauban mitanyag nako niining mga ilimnon, pero matinahuron kong misulti nila nga miyembro ko sa Ang Simbahan ni Jesukristo sa mga Santos sa Ulahing mga Adlaw ug misaad sa Ginoo nga dili ko moinom og bino o kape. Ang uban mibinuang nako ug miingon nga kadtong mga sugo mas nakapalisud sa akong kinabuhi. Usahay, morag gibati nako nga gibugal-bugalan sa mga tawo diha sa dako ug lapad nga gambalay [building] sa damgo ni Lehi (tan-awa sa 1 Nephi 8:26–27).

Hinoon, paglabay sa panahon, ang pagtuman sa Pulong sa Kaalam nagsugod nga morag laay nga palas-anon. Atol sa usa ka gabii nga wala makatulog, naamguhan nako nga nagkaluya ang akong pagtuo. Salamat na lang, kay ang akong asawa mipadala nako og mensahe nianang adlawa nga nagdasig kanako nga mapabilin ang akong pagtuo, mosalig sa Dios, ug motuman sa Iyang mga sugo bisan unsa pa man ang mga kahimtang. Tungod sa iyang pagdasig, misugod ko sa pag-ampo alang sa panabang ug misugod sa pagtan-aw sa mga butang sa lahi nga paagi.

Sa usa ka biyahe, akong nabantayan ang usa ka kauban nga dunay duha ka tasa nga kape. Ako siyang gipangutana mahitungod sa ikaduhang tasa.

“Ang usa ka tasa dili na kaayo isug nga makapabilin nakong alerto,” mitubag siya.

Nasurprisa ko nga makabantay sa samang butang alang niadtong nanginom og bino. Nagkinahanglan sila nga moinom pa og dugang aron makatulog. Usahay, masobrahan pa gani sila sa pagkatulog tungod kay daghan ra kaayo sila og nainom.

Nagtan-aw sa akong mga kauban nga mas nagdepende na sa alkohol ug kape nakapaamgo nako kon unsa ka importante ang pagtuman sa mga sugo. Kon gipili pa nako nga mosupak sa Pulong sa Kaalam, anaa unta ko sa sama nila nga kahimtang.

Ang akong jet lag wala pa gayud mawala sa hingpit, apan ang sitwasyon milambo. Usa ka buntag, nakamata ko human sa nindot kaayo nga paghikatulog sa gabii ug nakakita sa pagsubang sa adlaw. Samtang ang mga sidlak sa adlaw midan-ag agi sa bintana, nakaamgo ko nga pinaagi sa tabang sa Langitnong Amahan, masagubang ra nako ang bisan unsang pagsulay, bisan unsa pa ka dako o ka gamay. Kinahanglan lang nakong magpadayon sa pagtuman, ipabilin nga lig-on ang akong pagtuo, ug molahutay sa katapusan.