Siguro Magpabilin Ko Kon Kinsa Ko

Ni Jutta Baum Busche

Mahitungod ni Sister Busche

Si Jutta Baum (n. 1935) nagdako didto sa Dortmund, Germany. Naminyo siya kang Enzio Busche niadtong 1955, ug ang duha nabunyagan niadtong Enero 19, 1958, sa usa ka pangpubliko nga swimming pool sa Dortmund.

Niadtong Oktubre 1977, mitambong sila og komperensya sa Berlin aron si Enzio, nga usa ka regional representative sa Simbahan, makahubad alang kang Presidente Spencer W. Kimball (1895–1985). Pagkahuman sa komperensya, nakig-istorya si Presidente Kimball kang Enzio sa pribadong paagi ug mitawag kaniya nga moserbisyo sa Unang Korum sa Seventy—nga usa ka full-time nga posisyon nga magkinahanglan nga ang mga Busche mobalhin.

Ang ilang unang assignment didto sa Munich, Germany, diin nangulo si Enzio sa misyon sulod sa duha ka tuig; dayon namalhin sila ngadto sa Utah niadtong 1980. Pirme silang nagbiyahe, nagbisita sa mga miyembro sa Simbahan sa tibuok kalibutan, ug si Jutta namulong atol sa mga regional conference kauban sa iyang bana.

Sa pagpahinungod sa Frankfurt Germany Temple niadtong 1987, nahimo sila nga presidente ug matron niini. Si Sister Busche wala pa gayud sukad mahimong usa ka temple worker, mao nga gitambagan siya ni Presidente Gordon B. Hinckley (1910–2008) atol sa usa ka training seminar, “Ang labing importante nga butang mao ang pagbaton og gugma ug ang paghigugma ug paghigugma pa gyud.” Kinasingkasing niyang gidawat ang iyang tambag. Gihangyo niya ang mga temple worker nga himoong nag-unang prayoridad ang pagtabang sa mga patron nga mobati sa Espiritu sa Dios.

Kining mensahe usa ka bahin gikan sa pakigpulong nga gihatag ni Sister Busche atol sa Women’s Conference sa Brigham Young University niadtong 1989.

Nahinumduman gayud nako ang mga pag-adjust nga kinahanglan namong himoon sa dihang miadto mi aron manimuyo sa Utah. Ang una nakong calling sa ward mao ang pagserbisyo isip magtutudlo sa Relief Society. Gibantayan nako og maayo ang ubang mga magtutudlo ug nakadayeg gayud sa ilang paningkamot nga maperpekto ang ilang pagtudlo. Bisan ang ilang mga hairdo ug limpyo nga sininaan nagpakita sa ilang paningkamot nga maperpekto. Nakadayeg ko kon unsa sila kamaayo ug kaensakto sa pinulongan nga Iningles. Unsaon man nako, uban sa akong dili maayo nga Iningles, nga masusama nila ug mahimong magtutudlo nila? Madasigon kong makat-on ug malipayon nga makadungog nga dunay stake preparation class alang sa mga magtutudlo sa Relief Society.

Sa dihang mitambong ko sa training meeting sa unang higayon, puno ko sa paglaum. Wala gyud ko kaandam alang sa pangutana nga gipangutana ngari nako kon unsa nga matang sa centerpiece [mga dekorasyon sa lamesa] ang akong gamiton kon mohatag ko sa akong leksyon. Mibati gyud ko nga dili makamao! Wala koy ideya kon unsa ang centerpiece o unsa ang gamit niini sa pagpresentar og leksyon. Ang negatibong mga pagbati mahitungod sa akong kaugalingon nagsugod sa pagpaminus sa akong pagsalig. …

Nagpadayon ko sa pagbati nga ubos samtang nagtan-aw sa mga sister sa akong ward ug nakakita nila nga nananom sa hardin ug mihimo og de lata sa ilang abut. Nag-ehersisyo sila kada adlaw pinaagi sa pag-jogging. Nanahi sila ug nag-shopping og barato. … Nagdala sila og mga pagkaon sa bag-ong mga inahan ug sa mga masakiton diha sa ilang kasilinganan. Nag-atiman sila og tigulang nga ginikanan, usahay sa duha. … Matinud-anon sila sa paghimo sa buhat sa templo, ug gikabalak-an nila ang pag-apas sa pagsulat sa ilang mga journal.

Wala mahimutang tungod sa mga ehemplo nga maperpekto diha sa akong palibut, gidugangan nako ang akong mga paningkamot aron mahisama sa akong mga sister, ug nasagmuyo sa akong kaugalingon ug mibati pa gani nga sad-an kon dili ko makadagan kada buntag, makaluto sa tanan sa kaugalingon nakong pan, makatahi sa kaugalingon nakong mga sinina, o makaadto sa unibersidad. Mibati ko nga kinahanglan nakong mahisama sa kababayen-an kon asa ko nagpuyo, ug mibati ko nga pakyas ko tungod kay wala dayon nako mapahiangay ang akong kaugalingon sa ilang mga estilo sa pagpakabuhi.

Nakabenepisyo unta ko niining higayuna gikan sa istorya sa usa ka sais anyos kinsa, sa dihang gipangutana sa usa ka paryente, “Unsay gusto nimo nga mahimo?” mitubag, “Siguro magpabilin lang ko kon kinsa ko. Gisulayan nako nga mahisama sa laing tawo. Napakyas ko sa matag higayon!” Sama niini nga bata, human sa balik-balik nga kapakyasan nga mahisama sa laing tawo, nakat-unan nako sa katapusan nga kinahanglan kong magpabilin kon kinsa ko. Hinoon, kasagaran dili kana sayon, tungod kay ang atong mga tinguha nga mohaum, nga mahimong mas maayo pa ug dayegon, o bisan ang yano lang nga maaprubahan modala kanato ngadto sa pagsundog sa uban ug sa pagpaubos sa kaugalingon natong mga gigikanan, mga talento, ug mga palas-anon ug mga hagit. … Kinahanglan nakong makat-unan nga mabuntog ang akong gibati nga kabalaka nga kon dili ko makasunod, wala gyud koy ayo.

… Sa dihang gisulayan nako pagsundog ang talagsaon nakong mga sister samtang nagtudlo ko sa akong klase pinaagi sa usa ka espesyal nga dekorasyon sa lamesa ug laing mga pamaagi sa pagtudlo nga dili nako pamilyar, napakyas ko tungod kay ang Espiritu nakig-istorya gihapon nako sa German, dili Iningles. Pero sa dihang miluhod ko aron mangayo og tabang, nakat-unan nako nga magdepende sa Espiritu nga mogiya nako, nga sigurado sa kahibalo nga ako usa ka anak sa Dios. Kinahanglan nakong mahibalo ug motuo nga dili ko kinahanglang mosulay nga mahimong mas maayo pa kay sa uban aron higugmaon ug dawaton sa akong Langitnong Amahan. …

… Ang atong mga paningkamot kinahanglang dili ang mopahigayon ni mosunod pero ang mausab pinaagi sa Espiritu. …

Daghang kabalaka ang mihigot kanato ngadto sa kalibutan. Ang mahimong matinuoron sa kasingkasing mopalingkawas kanato aron madiskubrihan ang kabubut-on sa Dios alang sa atong kinabuhi. …

… Bisan tuod nga hingpit kitang malambigit sa pagtubag sa atong inadlaw nga mga hagit ug mga oportunidad nga molambo, dili kita makatugot nga magpakabuhi og usa ka adlaw o usa ka minuto nga wala masayud bahin sa gahum nga anaa kanato.