Ang Tinuod nga Simbahan: “Alang sa Pagkasangkap sa mga Balaan”

Ni Elder J. Devn Cornish

General Authority Seventy

Si Elder Cornish nagserbisyo isip Assistant Executive Director sa Church History Department sa panahon nga kini nga artikulo giandam.

Sa pagkakaron ikaw duna nay oportunidad nga mabasa ang unang pipila ka kapitulo sa volume 1 sa bag-ong upat ka volume nga gisugilon nga kasaysayan sa Simbahan, Mga Santos: Ang Sugilanon sa Simbahan ni Jesukristo sa mga Santos sa Ulahing mga Adlaw. Nindot nga makita kon sa unsang paagi nga ang kasaysayan sa Ang Simbahan ni Jesukristo sa mga Santos sa Ulahing mga Adlaw, nga gisaysay sa konteksto niini sigun sa nasinati niadtong kinsa nagpakabuhi niini, nag-ugmad sa atong pagtuo ug nagbag-o sa atong paglaum. Kita dunay pribilehiyo nga madala kanang kasaysayan sa paagi nga mahimong masabtan ug madayeg sa bisan asang dapita sa kalibutan ug sa tibuok Simbahan.

Ang mga impresyon nga aduna ang usa ka tawo gikan sa pagbasa sa kasaysayan sa Simbahan magdepende gayud kon unsay gilauman sa usa ka tawo nga makit-an niana nga kasaysayan. Atong mabasa ang kaugalingong pamahayag sa Ginoo nga kining Simbahan mao “lamang ang tinuod ug buhi nga simbahan diha sa ibabaw sa tibuok yuta” (D&P 1:30). Busa morag resonable ra nga maglaum nga ang kasaysayan sa tinuod nga Simbahan maghulagway sa wala masayop nga mga lider nga malampusong nag-implementar og sunod-sunod nga gipadayag nga mga direksyon nga naglambo ngadto sa usa ka hingpit nga organisasyon nga hilabihang gidawat ug gihangup. Pero dili kana ang gihulagway sa mga kasulatan ni girepresentar sa atong kasaysayan, tungod kay ang paghingpit sa Simbahan isip usa ka organisasyon dili mao ang nag-unang katuyoan sa Ginoo.

Unsa Man ang Katuyoan sa Simbahan?

Wala sa atong mga kasulatan, sa atong doktrina, o sa mga pagtulun-an sa mga apostoles ug mga propeta sa ulahing mga adlaw nga gitudlo nga ang katuyoan sa Ginoo mao ang paghingpit o ang pagluwas sa Simbahan. Hinoon, ang katuyoan sa Simbahan mao ang “alang sa pagkasangkap sa mga balaan … hangtud makakab-ot kitang tanan sa pagkahiniusa sa pagtuo … sa kahamtong sa pagkatawo, sa sukod sa gidak-on sa kahupnganan ni Kristo” (Mga Taga-Efeso 4:12–13). Ang nag-unang katuyoan sa Ginoo mao ang paghingpit sa Iyang mga Santos. Ang Simbahan nagserbisyo sa pagsuporta niana nga tumong.

Sa ingon, malipay kita sa unsay atong makit-an sa atong kasaysayan kon magpaabut kita nga maghulagway kini kon sa unsang paagi nga ang proseso sa Pagpahiuli wala lamang moestablisar sa tinuod nga Simbahan sa Ginoo dinhi sa yuta pero mihatag usab og mga kasinatian nga pinaagi niini ang mga lider ug mga miyembro mahimong molambo paingon sa pagkahingpit samtang nakakat-on sila gikan sa ilang mga kadaugan ug sa ilang mga sayop. Ang ilang mga kasinatian makapalambo sa atong pagtuo diha sa Dios ug kang Kristo ug makatabang kanato nga makita kon sa unsang paagi nga ang atong pag-apil niining sama nga balaanong gigiyahan nga proseso makapausab ug makapanalangin kanato. Sa laing pagkasulti, ang kasaysayan sa Simbahan naghatag kanato og paglaum nga kita usab sa katapusan mahimong “hingpit diha [kang Kristo]” (Moroni 10:32).

Unsay Gipasabut Nga Kini Mao ang Tinuod Nga Simbahan?

Kon ang mga lider ug mga miyembro sa nangagi nakahimo sa pag-establisar sa Simbahan ni Kristo bisan kon ang ilang mga paningkamot usahay dili perpekto, ug kon usahay nakahimo sila og mga sayop, nan unsa may gipasabut sa pag-ingon nga kini mao ang tinuod nga Simbahan? Nagpasabut kini nga mahimong kita dunay kompleto nga pagsalig sa kabalido sa gipahiuli nga awtoridad sa priesthood, sa makaluwas nga mga ordinansa, sa gipadayag nga doktrina, sa mga kasulatan, ug sa hiniusang mga korum sa Napulog Duha ka mga Apostoles ug sa Unang Kapangulohan. Nagpasabut kini nga mahimo kitang masayud nga ang Manluluwas Mismo ang nagdumala sa Simbahan ug nga ang Espiritu Santo mosaksi ngadto sa tanang sinsero nga nagtinguha sa kamatuoran bahin niining mga butanga. Nagpasabut kini nga pinaagi sa pagpaningkamot sa pagtuman sa mga pakigsaad nga may kalabutan sa mga ordinansa, ug padayon nga paghinulsol, bisan kon dili perpekto pero sinsero nga mga tawo sama ninyo ug nako magpuyo sa celestial nga himaya uban sa Dios ug kang Kristo ug sa atong mga pamilya sa kahangturan, pinaagi sa Pag-ula ni Jesukristo.

Among gibati ang pribilehiyo sa pagpresentar niining gisugilon nga kasaysayan sa Ang Simbahan ni Jesukristo sa mga Santos sa Ulahing mga Adlaw, ug kami nag-awhag kaninyo nga magpadayon sa pagbasa sa nahabilin sa series sa paggawas sa matag volume. Matinud-anon kini sa mga rekord ug sa mga kamatuoran nga anaa. Masaligon kami nga ang matinuoron nga pagbasa niining kasaysayan mopalambo sa atong pagtuo bahin sa gugma sa Langitnong Amahan ug sa gahum sa Pag-ula ni Kristo, mopalambo sa atong pagsaksi bahin sa balaanong direksyon ni Propeta Joseph Smith ug sa Pagpahiuli, ug makahatag kanato og paglaum nga kita makadawat usab sa tanang panalangin nga Ilang gisaad ngadto sa mga matinud-anon.

Ang kapitulo 7 sa Mga Santos makita sa mosunod nga artikulo. Ang tibuok nga unang volume anaa sa 14 ka pinulongan nga inimprinta gikan sa store.lds.org ug libre diha sa Gospel Library app ug sa internet sa saints.lds.org. Anaa usab kini sa English, Spanish, ug Portuguese sa popular nga e-book ug audio book nga mga platform.

Aron makakat-on og dugang mahitungod sa makapadasig nga mga panghitabo sa kasaysayan sa Simbahan, apil sa tibuok kalibutan nga debosyonal, usa ka Face to Face nga panghitabo uban ni Elder Quentin L. Cook sa Korum sa Napulog Duha ka mga Apostoles sa Septyembre 9, 2018. Bisitaha ang YSAface2face.lds.org alang sa mga detalye ug sa pagsumiter og sayo sa mga pangutana.