Tii aika a Maiu man te Iti
Ko Maiuakina te Euangkerio ma te Nano ae Aki Bwanin?
Anuara nakon ara beku n te Ekaretia e bon karika te kaokoro.
“Bwa N na bon riai ni karaoia?”
E a tia n rereke te aekaki ni iango aei iroum mai mwaiina? E a bon tia n roroko n au iango n taai aika mwaiti. Ao I a tia n reiakinna bwa iangoakin iango ae akea manenaia aikai bon te bwai ae kakawaki nakon kaotan anuau. Eng, ti konaa ni kanakoi baira ni buokiia tabeman, ti kona ni butimwaea ao ni kamatoa weteakira n te Ekaretia, ao ti kona n irira bootakin te Ekaretia. Ngkana e karaoaki ma te nano ae aki bwanin, baikai a konaa ni karika te bitaki ni maiura. Ma tao e tiatiana ana konabwai te Atua ni kabonganako? Tao e tiatiana ana konabwai te Atua ni bitiko? I bon irou, I taku bwa e bon kona.
Te iango aio e kauringai aron Raman ao Remuera, are a kitana Ierutarem, are e oki rikaaki ibukin te bwatua, a buoka kabakin te kaibuke, are a karaoi tabeua bwaai ni kaota te ongotaeka—ma a karaoi baikai ma te nano ni ngurengure ao n aki bane nanoia iai. A aki kariaia bwa bwaai ake a tia n rinanoi a na bitiia nakon ae e tamaroa riki. Ni kaitarana, a ngurengure ao a karekea te anua ae buakaka inanon baike a kaitarai are a mena inanona. Ao i mwiin ataakin anne, I aki tangiria ni kan riki n aron Raman ke te Remuera.
Anaa te tai ae e uarereke ni iangoia bwa tera raoi bukin te mwakuri ae ko karaoia. Ko kanakoa baim nakoia tabeman ma te nano ae tiku iaon kakabwaia ake a katauraoaki ibukim? Ke ko kanakoa baim nakoia tabeman ibukina bwa e bane nanom n tangiria n tibwaa te ota ao te tangira ma ngaiia? Ko karaoi ni kabane baike a riai ibukin weteam ibukina bwa anne ae e kantaningaaki mai iroum? Ke ko karaoia ibukina ae ko tangiria ni beku ibukin te Uea ao ake irarikim?
Aikai tabeua titiraki ake I kataia n titirakinai iai man te tai teuana nakon te tai teuana. Tao I kabanea au kona ni maiu bwa ana reirei ni koaua Kristo ma nanou ni kabane? Ke akea raoi nanou nako iai? I taku bwa Bitiobi Gérald Caussé, Mataniwi ni Bitiobi, e taekinna raoi ni kangai: “Ti kakaonimaki n te euangkerio, ke kanga ti rangi n tabetabe n te Ekaretia?” (“Bon Ibukiia Aomata ni kabane,” Riaona, Meei 2018, 112).
Mwamwakuri ni kaitara te Tabetabe
I bon irou, ngkana tao I tii “tabetabe” n te Ekaretia, te iango n aki tabeaianga a roko nakon au iango. Te iango n aki tabeaianga aei e kona ni boboto man kerikakin te anua ae kaunga ke ni kariaia bwai aika akea kakawakiia iaon rinanin bwaai ake N na karaoi nakon ake a kakawaki riki. Te iango n aki tabeaianga aei e roko ngkana I tekateka n tain te bootaki n toa ao n aki kabanea nanou nako iai, ngkana I karaoa au tataro n te tairiki ao au iango e a iangoi bwaai tabeua, ngkana I a tarai nako naba koroboki aika tabu n aki iangoi raoi, ke ngkana I kanakoa baiu ni buoka temanna ao n taekina ae I a tia ni karaoia nakon are ko na riki bwa raoraoia.
N tabetai I namakina te bwaranano ngkana I aki nora te rikirake ni maiu—ngkana I riki n taraa n akea tabeaiangau ao n “tabetabe” n te euangkerio—ao namakin aikai a irirai ni karokoa ae I a ataia bwa tera te kangaanga. N tabetai N na riai n tei moa, ni manga kaeta kawaiu, ao n titirakinai, “I anga ni kabane korakorau ao nanou nakon te wewete ke te aomata ke te tataro ke koroboki aika tabu?”
Imwiin tabeua kamimi aika a reke irou, anne te tai are e a karika bitakin maiu. Ngke I tataro raoi n noriia tabeman n aron are e noriia Tamara are i Karawa, ngke I tataro ibukin reken te waaki ni karaoan te mwakuri n ibuobuoki, ngke I tataro ibukin kairau ni weteakiu, n au mwakuri, ao ibukin maiu ni katoa bong, ao ae e kakawaki riki, ngkana I karaoa nanon te wirikiriki are E anganai, ngkana au mwakuri a titebo ma te bwai are inanou n riki n nakoraoi—anne are ngkana I kakaonimaki n te euangkerio. Anne ngkana I namakina te bitaki ae koaua n anuau, inanou, ao n tamneiu. Anne ngkana I norii kakai aika a kaoti. Anne ngkana I namakina te kukurei ni koaua n roko nakon maiu. Anne ngkana I kataia raoi ma te koaua ni bitaki nakon te tamaroa.
Mwamwakuri ni kaitara te Namakin
I taku bwa ti kona n tarai rikaaki tabeua taai inanon maiura ngke ara mwakuri a rangi n rianako, ma ara namakin n tain karaoaia a bon aki. N tabetai te maiu e rangi n tabetabe, n tabetai e na aki reke iroura te kukurei inanon baike ti karaoi, ao n tabetai aki riki bwaai nakon are ti kantaningaia. Ti aki kororaoi, ma ngkana ti butiia Tamara are i Karawa bwa e na buokiira bwa a na tiku nanora iaon baike a taraa ni kabotu ke a rangi n anaa te tai ake ti anganaki bwa ti na karaoi, ti kona n reiakini ni karaoi n aron are e kakaraoia Kristo.
I kona n uring taai ngke I aki rangi nj kukurei ngke I karaoa te mwakuri ni ibuobuoki, ma e a tii kabebeteaki naba nanou imwiin te mwakuri ae karaoaki. Ke ngkana I karekea te wewete ao I ngurengure bwa e a rangi n anaa au tai ae mwaiti, ngke I a manga rotaki n te tang n nanokawaki ngke I a kamotirawaaki ibukina bwa I a tangiria.
Ti kona n tibwaa te ota, kakoroa nanon bukinakira, ao ni karekei kaekaan titiraki n ae baiti ngkana nanora a mena raoi ni neia. Ngkana ti anaa te tai n tirobaea anuara ao tera ae e na riki mai mwin ara mwakuri ao ni karaoa are ti kona ma “te nano ae koaua, [ao] ma nanomi raoi” (Moronaai 10:4), ti na kona ni kinaa raoi ana kairiiri Tamara are i Karawa, ni karekea te kimwareirei ae korakora, ao ni karaoa ae bati riki n te bitaki ni maiura ao ni maiuia tabeman.