Te Kabanea n Taeka
Kaotan Ana Tangira te Atua ae Moan te Nakoraoi
Iroun Beretitenti M. Russell Ballard
Bonomwi ni Beretitenti n te Kooram n Abotoro n te Tengaun ma Uoman
Man te marooro n te maungatabu ni kabuta n Eberi 1988.
E kaota Ana tangira te Atua ibukira man katauraoan te kairi ae ti kainnanoia ni waakinna ao ni karaoi ara konabwai. E a tia Ngaia ae e atai angiin taekara, ara konabwai, ao ara konabwai ae akea tokina n anganai te kairi mai ieta ao tuua n Ana boki ni kaetieti—koroboki aika tabu. Ngkana ti oota ao n irii kaetieti aikai, iai bukiia ao nanon maiura aikai. Ti reiakinna bwa ara Tia Karikibwai e tangiriira ao e kainnanoa kukureira. N te kabotau n te tangira mai ieta ibukira ae akea aekakina aei, E kanakoa Ana Rikitemanna, Iesu Kristo.
“Bwa E tangiriia aomata te Atua n te aro are E anga Natina ae te riki-temanna iai, bwa e aonga n aki mate ane onimakinna, ma e na reke irouna te maiu are e aki toki.
“E aki kanakomaia Natina te Atua nako aon te aba ba E na kabuakaka te aba; ma E kanakomaia ba e na kamaiuaki te aba i Rouna” (Ioane 3:16–17).
E bungiaki Iesu nakon te maiu ae mamate. E maiuakina te maiu ae kororaoi ao, ni karaoan aei, e mwakena te kawai ae ti na iria. E reireiniia Ana reirei, “Otan te aba Ngai: ane irai ao e na bon aki nakonako n te roo, ma e na karekea te oota ni kamaiu.” (Ioane 8:12).
Ti a moanna n ataa korakoran ana tangira Kristo ibukira ngke ti iangoia bwa E tauraoi ni kamaiu ao ni karawawataaki n te maraki ibukin ara bure, “te karawaawata are e karika nako [Ina], Ngaia ae te Atua, te kabanea ni korakora i buakomi ni kabane, bwa E na ruru ibukin te maraki, ao ni wawanako te rara man bwangabwangan kunna, ao n rawaawata n te rabwata ao te tamnei” (Reirei ao Berita aika Tabu 19:18).
Te Itita aei, ti a bane n anga ara karabwarabwa ae onoti nakon te Atua ibukin Ana Mwakuri ni Kamaiu ao iroun Ana Rikitemanna ae tangiraki, Iesu Kristo. Bwa Ibukina, Irouna, ao Rinanona, e kona bwain te rabwata ae aki teimaan ni karaoaki nakon te bwai ae teimaan, rikina ae kororaoi, are aki kona iai taeka ni kabwarabwarai kimwareireira.
Kamimiin bwain te aonaaba aei bon mwakoron taraan Mwaakana mai ieta ao kaotakin Ana tangira. E ngae n anne kakai aika moan te tamaroa a tataningaira. E na riki ngkana, man Mwaakana, ti na uti man te mate ao nnen te mate nakon te aonaaba ae boou are e na aki kona ni kitanira, are, ngkana ti kororaoi, ti na maeka ma Ngaia ao ma Tamara i Karawa n akea tokina.