Te Kakao ibukin Ricardo
Martin Apolo Cordova
Paraná, Brazil
Kamataata n te tamnei iroun Katy Dockrill
Ngke I ongo aron ana waaki ni kakukurei te Ekaretia, I aki toki ni kaoia 10 ake tiaki kaain te Ekaretia bwa a na iri. I a tia ni karaoa aei inanon ririki aika a mwaiti. I karaoi taian kakao ao I kaaki n te tinaniku ae mainaina ao n tataro ni butia te Tamnei bwa e na kairai. Ngkanne I anga nako taian beebwa ni kakao. E kangaanga ae a na roko ni kabane 10 ma ngkana e roko tii temanna, I namakinna bwa I tokanikai.
Tabeua ririki n nako, I katauraoi tebwina beebwa ni kakao ibukin te bwaeatiaite ibukiia taanga. I anga ruaiua nakoia aomata ake a mwakuri ao I katuka teuana. I aki ataia bwa antai ae N na anganna. Miniti imwiina, Ricardo, te tia tei ibukin te kabobwai, e rirarikin au taibora. I namakina anaakin nanou ni kaooa, e ngae ngke e a tia n rawa nakon te kakao mairoun raona ni mwakuri bwa a na ira ana waaki ni kakukurei ana ekaretia. I aki ataa Ricardo bwa e na anaaki nanona.
Ma ngke e rirarikin riki au taibora Ricardo iaon kawaina n otinako, I a manga namakina riki te wirikiriki. E ngae n anne, e waekoa n otinako are e aki reke au tai n taetae nakoina. I tataro bwa e na oki Ricardo ngke I katautaua bwa N na anganna te kakao.
Ngke I tia n tataro, e oki Ricardo n titirakinai. Imwiina, I taku, “Ricardo, au ekaretia iai aia kakukurei taanga ae e na karaoia. Ti na tibwauai taneiai n arona bwa ti na kangaa ni maeka ni kukurei ni katoa bong. Imwiina, e na karaoaki te taenti. Ngkana I kaoko, ko na roko?”
“Ngaia anne!” E atonga Ricardo, ma I aki kakoaua ana kaeka.
“Ma irarikina I a tia ni karaoa tabeu,” I iangoia.
Ngai ao kainnabau ti roko ni moan taai n te bootaki ni kamauria aomata ngkana a roko. N te tai ae karina, I noora Ricardo ma buuna, ae Regina. I kabwarabwaraiia nakon kainabau ao tabeman ake a roko. N auan te tairiki, Ricardo ao Regina a taraa n ae a bon kukurei irouia. I kuba ngke a taku bwa a na roko n taromauri n te Taabati n reirei riki.
Ricardo, Regina, ao uoman natiia e mwaiti ae a reiakinna. N tokin te tai, a kaaina te Ekaretia. Rimwii a kabaeaki n te tembora. N te taina e tuangai Ricardo bwa ngaia ma buuna a iangoa raureia, ma e a tia te Uea ni kaira Ricardo nakon au aobiti.
Man te tai anne ao I butia te Atua bwa e na kabwara au bure bukin au iango bwa Ricardo e na aki karekea au kariaia. I a tia n reiakinna bwa e boongana kaoakiia aomata. Ko aki kona n ataia bwa antai ae ena butimwaia.