Mwengara, Ara utu
Natira te Mwaane Bon Natin Tamara are i Karawa
E maeka te tia koro karaki i Arizona, USA.
Taeka ake bon tiaki mai irou a roko n au iango: “Iroum ngkoe ko tangiria riki nakon are I tangiria?”
Tamnein te tia koro karaki ma natina te mwaane
Natira te mwaane ae rangi ni kakateke, e roko nakon te aonaaba aei ni mamaara, e aki ikeike, ao ni kataia ni karekea maiuna. E aki tang. E aki kakamwakuri.
Ngke a takaka taokita ma neeti inanon ruun te onaoraki, I ataia bwa iai te bwai ae aki nakoraoi. Kainnabau ao tamau a waekoa n angan Hayden ana kakabwaia te nakoanibonga, ao e kawaekoaki Hayden nakon te tabo n te onaoraki are ibukia aika a kakaiaki. E kuneaki bwa iai irouna aorakin te buro ae aki bati n nonoraki. Inanon tabeua te bong ao e karaoaki nakoina taian korokoro n te buro.
Rinanon mwaakan ana kakabwaia te nakoanibonga ae kakai, te aki mamatam, tataro, E marurung Hayden e ngae ngke e aki kantaningaaki aei. Ti kimwareirei ni kaira natira n oki nakon mwengara ao ni waakina maiura ae boou.
Hayden e uota nakoira te kimwareirei ae bati nakon maiura. Ti rangi n tangiria ao ti mataiakinna. Inanon te tai, I moanna n raraoma bwa e aki rikirake marurungina n aron are e kantaningaaki. E ngae ngke taan rabakau a kaotia nakoira bwa e na bon marurung, e reitinako te raraoma n au tai n buoka natiu te mwaane.
Kainnabau ao Ngai ti kamatebwai bwa ti aonga n ataa raoi aorakin Hayden aei. Ti karaoi bwaai ni kabane ake a tuangira taokita bwa ti na karaoi. Ma akea te rikirake.
I a moanna ni kua ao n aki kukurei. I bubuti nakon Tamau are i Karawa bwa e na buokai ni kakaea temanna are e na kona ni buoka Hayden, ma akea ae kaoti. E rikirake n aki tamaroa aoraki Hayden. E reke irouna te kakatikitiki. Ti bon maaku. Ti taku bwa e nang bua mai rarikira.
Teuana te tairiki, E bwakanako au tai ni kakaea kaekan au titiraki. I korea au reta ibukin Hayden. I tuangnga mwaitin au tangiria ao korakorara au kekeiaki ni kabebetea riki maiuna. I berita bwa N na kabanea maiu ni kataia ni karekea te ibuobuoki are e kainnanoia.
I rootaki n ae korakora n te un ao te raraoma. I katorobubua ao ni bubutia Tamau are i Karawa, “Bukin tera?” I taku bwa E a tia n anganai Hayden bukina bwa E ataia ae I aki kona ni bwarannano n au kekeiaki ni buoka natiu te mwaane aei. Ma bukin tera e tuai man reke kaekan nako au titiraki? Bukin tera bwa ni katoa booun te taokita ao booun te bwainnaoraki ao e reke riki te kaangaanga? Tiaki n ae Tamara are i Karawa e tangira Hayden?
I aki kona ni mwaninga te tai anne. Namakinan te tangira ae korakora e mwaneai. Taeka ake bon tiaki mai irou a roko n au iango: “Jerlyn, iroum ngkoe ko tangiria riki nakon are I tangiria?”
I mimi. Kanga e aki kakamwakuri te tai. A wanako rannimatau—tiaki man te un n aron are mai mwaina, ma man te kukurei,ota, ao te tangira.
N te tai anne, a bitaki bwaai ni kabane. E marau nanou. A bitaki au titiraki. I a ota ngkai bwa Tamara are i Karawa e tangira Hayden ma te tangira ae kororaoi. Hayden e a tia ni kanakomaiaki ma te rabwata are e tau ibukin kainnanona ao n anganna te tai ibukin te rikirake ao te reirei. Iai irouna ana kona ma kakaewenakoana aika a onoti ibukina, n ai arora ngaia n tatabemanira. I a tia n ataia bwa ataei ake aki toamau bon naati aika kakawaki man tangiraki iroun Tamara are i Karawa are iai aia mition ikai n te aonaaba.
Ngai ao kainnabau ti teimatoa ni karekei kaeka ao kakabwaia, ma a roko n ana tai te uea, ao tiaki n ara tai. Ti a tia n kairaki nakon booki aika tau, bwainnaoraki, reirei, ao taan reirei ni buoka Hayden bwa e na tokanikai n te maiu aei. Ti kataia ni kakaea te kawai are e a tia Tamara are i Karawa ni katauraoia ibukin Hayden ao tiaki te kawai are ti tangiria ngaira bwa e na toua. Ti karaoi bwaai ni kabane ni buoka Hayden ni karekea te konabwai mai eta ao ni maiuakina te maiu are e katauraoia Tamara are i Karawa ibukina. Otara n ana babaire Tamara are i Karawa e a rikirake riki n te aro are ti a ataia bwa Hayden bon natina imwain rikina bwa natira.