E Aki Tokanikai Iaora te Angibuaka

Koraima Santiago de Jesus

San Juan, Puerto Rico

N te tai ae aki maan imwin okiu man au mition, I karekea te kakao bwa N na kaea teuana te mwaie. N te mwaie, e bua au tareboon ao temanna te rorobuaka e tuangai bwa e na buokai ni kakaea. Ngke ti maroro, ti kunea bwa ngaira ni kauoman ti a bon tibwa oki ni mitinare ao ti tibwauai iango ma kouru aika a mwaiti imarenara.

E reitinako n rikirake ara reitaki, ao ti a kabae. Bon ara kouru bwa ti na kabaeaki n te Washington D.C. Tembora imwain are e kainaki ibukin te onobwai ni Maati 2018. Ma imwin karaoan te rinerine anne, ao ti kataaki. Ae moan riki, e bua au mwakuri ao ai akea te anga are N na kaiko iai ibukin mwanangara nakon te tembora. Imwina, e nooraki bwa te angibuaka e na orea Puerto Rico teutana te tai imwain bongin ara mare.

Ngke e roko te Angibuaka ae Maria, e urua abara ae tararaoi. A in titooa. Akea ara iti; te ran, te amwarake, ao bwaai tabeua aika kainnanoaki a bon kaangaanga karekeaia. E bua bwaai ni kabane ake ti katauraoi bwa ti na kabonganai ibukin te amwarake imwin te mare. Ti a riai ni kakea te amwarake imwin te mare, ao e taraa n ae akea ara kona ma ti nang katoka te mare. E a karako ae roko nako Puerto Rico ao ae nako mai iai naba, ao akea ae ataia bwa maanra aei. I moanna n namakina te bwarannano, ao I onrake n te nanokokoraki ao te aki rau.

Teuana te tairiki, ngai ao au kabae ti maroroakina ara kaangaanga aei. E kananououa te mwamwananga, ao e na akea te amwarake imwin te mare ke oneara ni mare, ma e kamatoa te Tamnei bwa ti riai n onimakina te Uea. Te kabanea ni kakawaki bon te kabaeaki n te tembora. Ti tataro nakon Tamara are i Karawa ibukin te ibuobuoki.

Ngke e a manga reke te kiba mai Puerto Rico, ti a manga kaboua bairean kibara ao ti bita tain kabaeakira. Bon akea ara bwai n reitaki inanon wiki imwin te angibuaka, ma e maiu teuana ana tareboon temanna raoraora. E anganira bwa ti na kabongana n reitaki iai nakon te tembora. Ti a manga bairei riki bwaai ni kabane bwa ti aonga ni kona ni kabaeaki! Tabeua te wiki imwain mwanangara, kaain ara utu ao raoraora a anga taian kau ao kunnikai ao a buokira ni karekei baika a mwaiti ibukin ara mare.

Ngke ti a rin te tembora, ti katikui raraoma nako. Ti taubai n uaia n rin n are imwin aei. I kona n taekinna ma te koaua bwa i namakina bain te Uea ni kairiira man anganira te kantaninga bwa ngkana ti onimakinna, ao a na bane n nakoraoi bwaai ni kabane. N te bong aei, ti a kakabwaiaki ma natira te mwaane ae botonimwaane ao ti riki bwa te utu ae kabaeaki n aki toki.