Te Kabaraaki ae Bua
E maeka te tia korokaraki i Iowa, USA.
“Ngai, te Uea, N na kabwara ana bure ane I taku bwa N na kabwara, ma ngkami kam riai ni kabwarai aia bure aomata ni kabane” (Reirei ao Berita aika Tabu 64:10).
“Mom, e a bua au kabaraaki!” E taku Brad. E a bo te tai n nakon te taromauri, ma e aki kona ni kunea ana kabaraaki Brad iaon nneia kunikai.
“Ko bon koaua bwa anne nnena ae ko katinea iai?” E titiraki Mom.
“Eng. E bon mena ikai.” Karan ana kabaraaki Brad e buru ao n uraura. E rangin ni kai ataaki.
“Tao e kamwaingaki. Ti a tarataraia inanon te auti,” e taku Dad.
Tinau, Tamau, ao Brad a nakon taabo aika kakaokoro n tuoi ruu aika kakaokoro. A kakaea n te bwaoki ibukin bwaai are a bua ao ni manga kuneakia n te umwantabu, n ana kiratiruum Brad n Reirei n Tabati, n aia ruu kain te Moanrinan, ao ni kabuta aon nnen taian kabaraaki. A kakaea naba inanon te ru n tebotebo, ma aki kunea te kabaraaki.
“Tao iai ae anaia n tiaki nanona. A na bon bae ni kaokia n te wiiki ae e na roko n te tai are a kunea bwa tiaki aia bwai,” e taku Tamau.
“N te tai aei, ko kona ni kabongana am kabaraaki are e a maan,” e taku Tinau.
E karaoi kanikina Brad aika e aki kukurei iai. E aki tangira ana kabaraaki are e a maan. E mani, e taa, ao n rangi n uarereke ibukina. E tangira aron taraakina n ana kabaraaki ae boou ae uraura-ao-e buru bwa e taraa n tiambion iai.
“Tao iai temanna ae noora aron tikiraoin au kabaraaki ngaia are e a kimoaia naba,” e taku Brad n ana iango. E na kanga n riki anne n te taromauri? Aomata ni kabane ikekei a boutokaaki bwa a na kokoaua. E na aki kariaia Brad bwa e na aki nako ma ngaia. Iai ana baire. N te Tabati ae na roko, ao e na taraia raoi bwa antai ae bwaina ana kabaraki. Ngkanne e na anaia mai irouna ao e na takarua nakoina, “Teei, te tia kimoa!” A na nanokawaki bwa a na aki kona n anaia.
E aki kona n tataninga te Tabati Brad ni karaoa nanon ana baire. Ma te Tabati are imwina e rangi ni kabuebue ibukin te kabaraaki, ao n te Tabati naba are imwina.
Te Tabati are imwin anne, e tarataraia ni kabane ataeinimwaane Brad ma te ingainga n nano, ni kakaea bwa antai ae kimoa ana kabaraaki. Tiaki te ataeimwaane are abwabwaki arei? Ke tao te aine. E namakinna ae kanga akea ae onimakinna. E aki tangira te namakin anne Brad.
Imwin te taromauri ao e kawaekoa Brad ni katobibia te auti, n taraia utu ni karin aia kabaraaki. Ma akea te tabo ae noora iai ana kabaraaki. E manga tuoa riki te bwaoki ibukin bwaai are a bu-ao-ni manga kuneaki … ma akea te kabaraaki. E nang mena ia?
Iaon kawaina n okira mwengana, e a manga iangoa te baire teuana Brad. E na tataro. E ataia bwa te Tama are i Karawa e kona ni kunei bwaai aika bua. N te tairiki anne e tataro Brad ao n taku, “Tamau are i Karawa, taiaoka tuangai bwa antai ae anaa au kabaraaki. I tangiria bwa e na oki.”
Brad e tataninga ibukin te wirikiriki n aran ke ubun te tia iraa. Ma irarikin anne e moanna n iangoa raoraona Carl. E aki toki Brad n tekateka irarikin Carl n te Moanrinan. Aki toki ni mamanikangare ao n ni ngangarengare imarenaia. Ma e tuai taromauri Carl inanon tabeua te wiiki. E uringnga Brad.
Tera ae e na riki ngkana Carl ngaia ae anaa ana kabaraki? E kona n ae e a maaku Carl n roko n taromauri ngkai ibukina bwa e taku n ana iango bwa e nang aki manga riki Brad bwa raoraona. E tangiria Brad bwa e na manga roko n taromauri Carl. Ngkana arona bwa e anaa ana kabaraaki Carl, e baireia Brad, bwa e na aki taetae n aki akaka nakoina. E na kabwara ana bure.
E tamwarake Brad nakon ana kainiwene, n namakina ae raoiroi riki.
Te Tabati are imwina n te Moanrinan, akea ikekei Carl, ma te ataeinimwaane ae boou e mena ikekei. E bwaina te neketai ae uraura-ao-ni buru.
“Te neketai ae kanikan,” e taku Brad, n tekateka irarikin te ataeinimwaane. “E karikio kanga te tiambion.”
E moangare te ataeinimwaane.
E moangare naba Brad. E aki manga ukeukeriia taan iraa. E a ukeukeriia raoraona.