“E na kanga au kakabwaia mairoun te Tamanuea ni buokai ni karaoi babaire?”

Ara Riaona ae Onoti ibon Ibukira

Te kakabwaia n tamanuea bon te kawai are e buokiira iai Tamara are i Karawa n ataa maiura imwain te maiu aei, te maiu ae mamate, ao atakira n ae akea tokina. N ataakin baika tenua aika kakawaki ake a kabwarabwarai arora, e buokiira n ira te babaire are e karaoia te Atua ibukira. Ti ataia bwa ti roko maia, bukin tera ti mena ikai, ao ti na nakea. N aron mwakurin te Riaona ni kaineti ma aia onimaki ao aia kekeiaki Nibwaai ao ana utu ni irakin ana kairiiri (taraa 1 Nibwaai 16:28), ngaira naba ti konaa n onimaki ao ni kekeiaki n ira oin ara Riaona ao reirei, are e na kairiira ni karokoira n aron rikira ae mai iroun te Atua.

Unimwaane Utai, ana ririki 20, Argentina Salta Mission

Tarakin Bwaai n Aroia ae akea Tokina

Ngkana I namakina ae akea te bwai ae I ataia ni karaoan au babaire, I oki rikaaki nakon au kakabwaia n tamanuea ao ni iangoi kaotioti aika mai iroun te Atua. Ao ngkanne e a moana ni bebete iangoakin bwaai. E aki tii buokai n teimatoa n te aonaaba aei ao ni karekei kakabwaia ake a beritanaki, ma e kauringai naba ni katauraoau bwa N na kororaoi n rin n abanuean te Uea n te taina. E buokai ni katoa tai ni karikirakea au onimaki, kakoaua nanon te Uea, ao ni maeka ma te iango n tarakin bwaai n aroia ae akea tokiia.

Abegail F., ana ririki 18, Cagayan Valley, Philippines

Te Kaetieti mai Karawa

Au kakabwaia n tamanuea e anganai te kaetieti mai iroun Tamara are i Karawa. Ngkana I toui mwin kaetieti akane, I ataia ae N na karekei kaotioti iaon tain babaire ake I kainnanoi ni karaoi. E kaekai mwaitin au titiraki imwain ae I titiraki ibukiia.

Cami H., ana ririki 16, Utah, USA

Kakauongo nakon te Tamnei

Ngkana ko kakae nako ibukin te karaunano ao te kairiiri ke te kaeka ibukin te titiraki ae katawe, ko konaa n tataro ma nanom ae koaua ibukina ao wareka am kakabwaia n tamanuea ma nanom ni koaua, ngkai ko kakauongo nakon te Tamnei. E ibuobuoki naba warekan koroboki aika tabu. I kakoaua bwa ngkana ko karaoa aei ma te onimaki ni koaua, e na kaekako te Uea, n oin ana tai, n te kawai ae tamaroa.

Kezia B., ana ririki 15, Hawaii, USA

Berita Aika Beritanaki

Kakabwaia n tamanuea e tuangiira bwa tera ae e tangiria te Atua bwa e na kakabwaiaira iai. E anganiira te kauring ao e kabwarabwara bwa ti na kanga ni riki n ai Arona. Ngkana ti ataia bwa tera ae katauraoia Tamara are i Karawa ibukira ao ti na kangani karekea, ti na bon rineia bwa ti na karaoa are e tangiria bwa e aonga n reke iroura.

Hunter H., ana ririki 18, Utah, USA