Reiakinaia te Roro ae 13 nakon 19 ma Kairake n Ataei
Buokan te Nanokawaki
Ni waekoa ke imwiina, ataei a na kaitara ma te nanokawaki, tao e kaan nakon te mweenga ke e raroa nako. Ma “e ngae ngke e mangaongao te aonaaba ni katobibiira, ti kona ni karekea te kakabwaia n te rau inanora.”1 Aikai tabeua bwaai aika ko kona ni karaoi ni buokiia ataei n namakina te rau anne.
Te Anua ae Teimatoa
Ngkana iai te bwai ae riki ae kananokawaki, a kona n namakinna ataei ae taraa n aki nakoraoi aia aonaaba. Riki bwa te banna ni katooto n te teimatoa ibukiia. Taetae ni karaurau ao n aki nanokokoraki iaon te kaangaanga. Karaoi bwaai aika ko tataneiai ni kakaraoi n aron ae ko kona. Karaoa ae ko kona ni kateimatoa karaoan te bootaki n utu n te tairiki, kamatebwai ni booki aika tabu, tataro, ao katein te utu riki tabeua. Ma te tai, a kona ataei n reiakina anne e ngae ngke e a tia n uruaki maiuia, te euangkerio e kariaira bwa ti na iangoi taekan bwaai aika akea tokiia ao tiaki ti bwain te aonaaba, ao a kona n reitinako ni maiu ao rikirake.
Te Karinerine
Kaota te karinerine ibukin aia namakin ataei. Kakauongo nakoia ataei ao butimwaea aron aia namakin. Kaotia nakoia bwa ko tabeakina aia kaangaanga. Tai imanonoia bwa a na taetae ma kaotia nakoia bwa ko tauraoi ngkana a tauraoi n taetae. Kaekai titiraki ma te koaua ngkana a kaoti n te kawai ae a kona n ota iai. Buokiia natim bwa a na ataia ae a kona n taetae n tainako nakoim iaon makuia ao raraomaia.
Te Kairiiri
A kona am ataei n titiraki, “Bukin tera e kariaia te Atua bwa a na riki bwaai aika buakaka?” Kabwarabwara bwa taai aika raoiroi ao taai aika buakaka bon mwakoron te maiu aei ao mwakoron ana babaire ni kamaiu te Atua ae akea tokina. E kariaia aomata n tatabemaniia bwa a na karaoi oin aia rinerine, ao n tabetai aomata a karaoi aia rinerine aika buakaka are e karika te karawawataaki. Taai tabeua, bwaai aika kananokawaki bon akea ae ana bure ma bon kanoan te aonaaba aei. N aki tabe bwa tera, Tama are i Karawa e na boutokaira. Man Ana ibuobuoki, ti kona n reirei ao n rikirake, riki man ara taneiai aika kammaraki. Ti kona n rairaki Nakoina ni kakaea te rau.
Anganakina te Mwaaka
Kaotia nakoia ataei bwa iai te mwaaka irouia ni karaoa te kaokoro man anganakiia te kawai n ibuobuoki. Te katooto, a kona n ibuobuoki n ikoikoti angamwane ibukiia maate aika kananokawaki, kawara te aoraki ke raoraom ae ikoaki ae mena n te onaoraki, buoka temanna ae tabe ma buan te utu, ke tataro ibukiia aika rawawata. Ti kona ni buoki bwaai ni kabane, ma iai tokin korakorara ni karaoa ae raoiroi, ao “ti mwakuri ibukin te rau ngkana ti ibuobuoki ni buoki rawawataia tabeman.”2
Te Mwengaraoi
Kauringiia natim bwa e tangiriia te Atua ao ko tangiriia. Tai tuangiia te bwai ae e aki koaua n aron akea te bwai ae buakaka ae e na riki nakoia, ma kakoaua nakoia bwa a kawakinaki ngkai naba ao ko na karaoa ae ko kona ni kawakiniia. Kakoaua nakoia ae e na buokiia te Tama are i Karawa n tokanikai iaon aekan kataaki ae a na rinanona.
Ngkana ko kunea bwa ko nanokawaki man te kakaitara, uringnga bwa n tokina, te raoiroi e na tokanikai iaon te buakaka. “Ti karaoa te buaka ni kaitaraa Tatan, … ma ti kainnanoia bwa ti na aki bwarannano,” e reirei Beretitenti Thomas S. Monson (1927–2018). “Bon te buaka ae ti kona ao ti na tokanikai. E a tia Tamara are i Karawa n anganiira bwai ni mwakuri aika ti kainnanoi bwa ti aonga ni karaoia. E tararuaira. Akea te bwai ae ti na maakua.”3