Te Kokoaua ae Karewe
E maeka te tia korokaraki i Colorado, USA.
“Kam aonga ni karaoa ae raoiroi” (2 I‑Korinto 13:7).
“I tangiriko bwa ko na taratara mwanem,” e taku Mama. “Ngai ao tamam ti na nako ni buoka temanna ae e aoraki.”
I tararake man iakinan nanon ara aut ae e uarereke ao I katoutoua atuu. Mama bon te beretitenti n aia Bootaki Aine, ao e aki toki n nanako ni kawariia titita n ara uoote.
“Ko bati n rabwa, Arlyn,” e taku Mama, ngke e kitina taubukin atuu. “Are e matu Tiaon. Ao iai te burawa are I karikia ibukin te kariki iaon te kaunta. Taiaoka ma tai kukuaia.”
I taraiia man te kawai n otinako ngke ngaia ao Pa a butinako n te kaa man kawaira ae bubu. I namakina te kakatonga ngkai Mama e onimakinai.
N au tai ni kaitiaka te uma ni kuuka, I tei ao n taraa te burawa are e karikaki. I a bon aki konaa n tataninga bwa e na kukana Mama n tairiki. Angin te tai ti kakana te kariki ae e a tibwa mwai ma te tiam ae ti bon karaoia. Ma e a kaman bane ara tiam teniua te namwakaina n nako.
Te Tiam! Iangoakina e a karika ae I a kan kana te bwai ae karewe. I tararake n taraa te bwatoro n tioka, ae e mena ieta n te kabwate. I ataia ae e kawakina Mama bwa e na karao iai te tiam.
Ma inanon ae I iangoakin te tioka, e a roko riki irou te baki. N tokina, I a katika te kai n tekateka ni kaniia te kaunta ao I a kanakoa baiu nako eta. E kuri aki roko taboni baiu n te bwatoro n tioka. I a katikia ni kaniia riki ma mangeen te kabwate. …
Ao anne te tai are e a marannako iai te mai iaon te kabwate! I kataia n raweia, ma e a nako ni bwaka n tiburing i nukan te burawa are e karikaki. E bwaro te tioka iaon te burawa are e karikki iaon te kaunta ao iaontano.
“O akea ngaira!” I takarua. Anne are e a kauta mwaneu are e uarereke. E a moanna tangina. I tangiria ni kan tang naba. Tera ae e na taekinna Mama n aron te mangaongao aei?
Imwin are I karaua nanon Tiaon, I kabanea au kona ni kaitiaka mwin te tioka. I anaa te bwatoro mai nanon te burawa are e karikaki ao ni kaitiakia. I kaoa ni kanakoa te tioka mai iaon te kaunta ao mai aontano. Ma bon akea au anga are N na kanakoa te tioka mai nanon te burawa are e karikaki.
I iangoia bwa N na kaoka te bwatoro nako aon te kabwate. Tao e na bon aki ataia Mama ae akea kanoana. Ma I ataia ae e aki eti anne. Ngaia are I a katuka te bwatoro i aon te taibora ao n tatanginga Mama ao Pa n okira te auti.
Ngke a oki nakon te auti, Mama e noora te bwatoro n tioka n te tai naba anne.
I ikerake. “I bon ti kan katonga te tioka teutana. Ma e a tibanako irou te bwatoro mai iaon te kabwate. I kataia ni kaitiakia, ma I a aki kona ni kanakoa man te burawa are e karikaki.” A waekoa n otinako au taeka ngke I taratara aontano.
E aki kakarongoa Mama inanon tabeua te miniti.
“I rangi ni kabwarabure.” I wirikiriki.
E ikenrawa Mama. “E raoiroi, I taku bwa ti nang kana te kariki ae e bane karewena nakon te tairiki,” e taku. I tararake. E wingare teutana nakoiu. “Ko raba ngkai ko tuangiira te bwai ae riki.”
Ngke ti a kana te kariki ae e karewerewe n te tairiki anne, Mama ao Pa ao ngai tia maroroakina te kokoaua.
“Ti bane ni karaoi kairua aika mwaiti ni maiura,” e taku Pa. “Ma ngkana ti kokoaua ao ni kataia n rairi nanora, a kukurei iai Tamara are i Karawa ao Iesu. Ti na bon aki toki ni kakabwaiaaki ngkana ti kokoaua—e ngae ngkana e rangi ni kaangaanga n te moan tai.”
I bon nanokawaki bwa I a tia ni kabwaroa te tioka. I ataia ae tao e na aki rangi ni bati te tiam n te ririki aei ibukin au kairua are I karaoia. Ma I bon kukurei bwa I a tia n taekina te koaua. Anne te namakin ae moan te karewerewe iaon riki mwaitin te tioka are e kona n anga.