Kakabwaian te Toronibwai
Te Bitineti e Bon Raka
Te kakaitau n te bwai are e reiakinna n te toronibwai n taian kiraati, ngke E kabua teuana kabwaian Teddy Reyes, ao n te tai ae waekoa e a manga karekea teuana.
RAWETAMNEI IROUN Raul Sandoval
Bon 4:00 a.m i Santo Domingo, te Tautaeka n Dominica, ao Teddy Reyes e a kaman teirake ni mwakuri. E mwaiti ae e na karaoia n te bong aei n tararua rakan ana bitineti. E moana korekorean te tomato ao te kariki. Ngkanne e karaoa ana rengarenga ae raka.
N te aoa 6:00 a.m., uoman taan mwakuri a roko ni buokia, ao te katauraoi e waetata. N te aoa 8:00 a.m., a karaoa 300 tiaeniwiti, n niraki n tatabeua n te buraetitiki a niiraki ao a nneaki n taian baeki. Onoman riki taan mwakuri a kaoti, ao taan mwakuri ni kabane a nako ni kaboi nako.
N te aoa 9:00 a.m., ni kabane ma tabeua tiaeniwiti—teniua ke aua are Teddy e kawakin bwa kanaia kaain ana tiim—a tia ni kaboaki.
E raoiroi te bitineti ibukin Teddy. Ma bwaai aki bebete n taainako. Ni koaua, inanon nimaua te ririki n nako, e aki kona ni kunea te mwakuri ae e na teimatoa iai n ana mwakuri ae rineia—ngke te rooia.
E na kanga Teddy ni karaoa te bitaki man reireiaia aomata nakon kabooakin tiaeniwiti? E na anaa te mwakuri mwaaka, ni koaua ma e na karaoaki ma te karaurau n reirei are e a tia n reiakin n taian kiraati ake a karaoaki rinanon ana Mwakuri n Toronibwai te Ekaretia.
Kabua Ana Mwakuri
Nimaua te ririki n nako, te maiu ibukin Teddy e kamimi. Iai ana mwakuri bwa te rooia, e a tibwa tia ni mare, ao e a tia ni bwabetitoa buuna. “Ma iai taian kangaanga,” e taku, “ao I kabua au mwakuri.”
Ibukin aua te ririki imwiina e kakorakora ni kakaea ana mwakuri. “E mwaiti te mwakuri ae I kona ni karaoia, ma akea ae tangirai ni kabooai. I katai mwakuri aika kakaokoro i bon irou, ma e aki mwakuri anne.”
Buuna, Stephany, iai ana mwakuri ae tamaroa, ma boona n tii ngaia e aki kona ni kabwarai taian taarau. N te taina e a reke natiia taanga aikai. A rangi ni kukurei, ma aia mwane e rikirake ni karako. A kabua aia auti, a kaboa nako aia kaa, ao ni kabanea are a kaikoa. Ao n tokin te tai a mwaee nakon te auti ae uarereke ae bwaibwai iai tinan Stephany.
Ma e aki bwara nanon Teddy. N te tai ae waetata te tai ae aki kantaningaaki e a kaotia.
Mwaakan te Toronibwai
Imwiin ririki ni kakorakora, Teddy e ataia bwa ai te tai n onikaki.
“I baireia bwa N na anaa te kooti n te Ekaretia ibukin te riki n toronibwai,” e taku. “I a tia n ongo aroia ma n taainako I iangoia bwa tiaki ibukiu. I iangoia bwa bon tii ibukin karaoan bwaai i bon iroum. Taian reirei a bon kamimi.”
Te moan, Teddy e kaina te kurubu n oin Aia Mwane Aomata. Ngkanne e a kaaina te kurubu n Moan Waaki ni Karikirakea Au Bitineti. Kurubu n taian kiraati a buoka Teddy n rabakauna ni bitineti ma a buokia naba ni karikirakea n te aro n tamnei.
“ Kaainakin kiraati aikai a bitii bwaai ni kabane,” e taku. “I baireia bwa N na karaoi bwaai ake a reirei. Ao au mwane a waetata ni bitaki. I moana kabwakan au kabwianibwai, au tataro ni katoa bong, kamatebwaian booki aika tabu, ao kamwakuran te onimaki. Ao a bitaki bwaai—I moana kaikoan au mwane ao kawakinan te Tabati. A kakabwaiai reirei ni kabane.”
Inanon ana kurubu Moan waakin ao Karikirakean Au Bitineti, Teddy e a reiakinna bwa ko na kanga ni kinaa te bwai are a na kona katitamwa n tangiri n te tabo are a maeka iai. Ngkana e iangoi bwaai ake a kakaei aomata, e roko te kairiri n ana iango. N ana tabo ao aomata a tangira te tiaeniwiti ae boou, ma a tangiria naba ni karaoa aia oota—ao n nikiraki.
“E mwaiti te tabo n amwarake ae iai aia rengarenga are karika kangkangin aia amwarake,” e taku Teddy. “Ngaia are I karikirakea au rengarenga n au tiaenwiti ae okoro!”
Karikirakea Ana Bitineti
N te tai are moan wakina ana bitineti, Teddy e karaoi 30 ana tiaeniwiti.
“Tenibwi te miniti imwiina, I okira mweengau,” e taku. “E tabetabe kaanabau ngke noorai iaon te kaauti. E titiraki bwa terana ae I tia ni karaoia ngkai I a moan tai n oki—I aki riai ni kabooi tiaeniwiti? I a tia ni kabooi nako ni kabane!”
Inanon wiiki tabeua imwiina, Teddy e itoman ma taabo ni bitineti ao reirei. E mwaiti ae a ingainga ni kan kabooa ana tiaenwiti, ao ana bitineti e a moanna n rikirake. E reiakinna ni waetata aron tararuan taian wetitaboro bwa aonga ni maan. E ata naba manin raoi ana rengarenga ae raka aei. E ootan ao n anai kariki ni katoa tairiki. E kabooi wetitaboro aika a bwaka booia ni katoa Kaonobong, are karako boona ma a na bon raoiroi ni karokoa te Moanibong.
N te tai ae waetata e karekei oota ibukin aekakin tiaeniwiti, ao ibukin mwaiti aika rawata ibukin bootaki aika okoro. E kainnanoa buokana ao e moanna n tangoia taan mwakuri.
Man karikan itoman aika koaua ma reirei n te tabo ao taian bitineti, Teddy e karekeia aika baikoakoa, taan mwakuri. Inanon aua namwakaina, a reke waniman ana tia mwakuri ao e kabooi nako 300 tiaeniwiti n te bong teuana, nimaua te bong n te wiiki. Ana tiim ni kabo nakoi bwaai a rangi ni mwakuri raoi bwa a kabooi tiaeniwiti ni kabane n tain te kabuebue ngkana a motirawa reirei. Ngkai Teddy e a tauraoi ni kabubura riki.
Bukin anaakin te kiraati n te toronibwai, e anaaki nanona n roko ma te iango ni karaoan te bitineti iaon te tiaeniwiti. “Bukin te kairaki aio man te Ekaretia ao te kakabwaia are I tia ni karekea,” e taku,“I a karekea au koaua ae matoatoa n te Ekaretia ao Iesu Kristo.”