Noorakin Tamau ngke e Anene
Maria Oka
California, USA
Kamataata n te tamnei iroun Allen Garns
I mena n au mition i Honolulu, Hawaii, USA, inanon ae tii aua ao teiterana te namwakaina ngke e a reke naba irou te katikitiki ao e a kuneaki n te tai anne bwa iai irou aorakin te namakin n te ia. Inanon namakaina ake imwina ao I a okiokira te onaoraki, karaoakin tutuo aika mwaiti, te bwai n aoraki ae boou ma mwina nakon rabwatau ae e karika te bwarannano.
Mai imwaina ao I rangi ni kabanea korakorau iaon au mwakuri ni mitinare n te aro are I aki kainnano n uringiia au koraki ake a tiku imwiu, ma imwin are I katikitiki iai e a roko te uringaba. I a kan nooria au karo ao I namakin te maroaa e ngae ngke a rawata ake a mena i irarikiu, aomata aika a tabe ibukiu. I aki kan okira mweengau, ma I tangiria n namakina te rau.
Man ana kariaia au mition beretitenti, I a taetae ma au karo iaon te tareboon ibukin au bwai n aoraki. Tamau, are e a tia ni kakoroa nanon ana iango ni maiuna ao e a kaina te Taebanako Kuaea n Tembora Tikuea, e karaua nanou bwa e na anene ni kabanea nanona ibukiu n tain te maungatabu ni kabuta, are e nang waaki n te bong are imwina.
N te ingabong are imwina, I tataro mwaaka ibukin te rau are I rangi ni kainnanoia. I a tia ni karekei kaekan au titiraki aika onoti ibukiu n taian maungatau ni kabuta ake mai mwaina ao I kakoaua bwa N na bon manga karekea kairau naba ngkai. Ngke e kaukaki te maungatabu, kain te kuaea a anenea “Dearest Children, God Is Near You” (Anene n Taromauri, nambwa. 96). N te miniti naba anne, I noora tamau iaon te TV tikuriin. E oti tamnein ubuna ao e katukaki iaona n te tai ae e maan.
A ranran matau ngkai e a taonai namakinan te rau ae korakora. I ataia bwa e tangirai te Atua. E ataa te bwai ae I kainnanoia n te tai arei—te karau nano ae bebete bwa E bon mena irarikiu ao e noorai. I namakina ana tangira te Atua, ao n reitana, aia tangira au utu, toau n te mitinare, ao au mition beretitenti. Irarikin ae N na namakina te rawawata, I a noora ngkai te anga ae N na rikirake ni kaniiaki ma te Uea.
E aki bitaki te kakaewenako ibukin marurungiu. Ma I moantaai n oki man au mition ibukin anne, ma I ataia ae e mena ikekei te Atua ao E tangirai. Te aeka ni karau nano anne e aki toki n rereke irou n au tai n rinanoi karawawata ao e a tia n anganai te unga n nano n au tai aika kaangaanga. Tabeman a na taku bwa e manennanti, ma I ataia bwa noorakin tamau n anene ibukin ana tangira te Atua bon te kakai ae e uarereke n te tai are I kainnanoia iai.