N na Manga Noria

Iroun Reyna I. Aburto

Te Moan Kauntira n te Beretitentii ni Kabuta n te Bootaki n Aine

I ikawai rake i Nicaragua. Ngke I uarereke, I karaoi bwaai ni kabane ma mwaneu ae ikawai. Ti uaia n nako n reirei. Ti uaia n nakon te titooa. Ti karaoi baika a kaunga ibukin ara auti. Ti bon kukurei.

Ngkanne, ngke ruaiwa au ririki, e riki te bwai ae kananokawaki. E mate mwaaneu man te mwaiei. N te moantai ao I aki kakoaua bwa e bon bua. I taneiai ni katamneia bwa e na karebwerebwe n ara mataroa are mai moa. E na tuangira bwa e nako n te tabo teuana. I taneiai n taatara te mataroa, ni kantaningaia bwa e na riki aei. I rangi n tangiria ni manga nooria riki.

Inanon te tai, e rikirake ni bebete. I bon ururinga naba mwaaneu, ma I a kona ni manga namakina te kukurei.

Ngkekei ngkoa, tiaki Ngai kaain ana Ekaretia Iesu Kristo ibukiia Aika Itiaki ni Boong aika Kaitira. Ma ngke I a ikawai rake, I reirei taekan te Ekaretia ao I bwabetitoaki. N te bong teuana I irebwainamwarake. Bon te Itita te tai anne. I iangoa te Mangauti ao I iangoa mwaaneu.

N ae karina e roko irou teuana te namakin. I uringa te nanokawaki are e reke irou ibukin mwaneu. I ataia bwa bon tiaki te nanobaba aei! E roko mairoun te Tamnei ae Raoiroi, bwa e na anganai te rau ao e na kairai. N te bong teuana mwaaneu e na mangauti. Ao N na manga nooria riki.

Ngkana iai ae mate ae ko tangiria, akea te kaangaanga ni mitinakia ao namakinan te nanokawaki. Reitaki ma am utu ke te ikawai temanna n te tai are ko namakinna bwa ko a tauraoi. Tataro nakon Tamara are i Karawa ni kaota am namakin. E kona ni buokiko ni manga namakina te rau.

Tao tera ae riki, uringnga bwa E tangiriko Iesu Kristo. N te Itita ti uringa Ana anga karea ibukira. Ibukina bwa iai Ngaia, ti na bane ni mangauti ao ni maeka ma ara utu n te tai ae akea tokina.

Beeba ni Karaunano

Korei beeba aikai. Ko kona n rukumi mai nukaia ao ni kabongana bwa bwain mwaakenan am wareware. Kawakini inanon am boki aika tabu ke n te tabo teuana are ko kona n nooria n te tai are ko namakina iai te nanokowaki, te akea n rao, ke te maaku.

“I bon aki kitani ngkami ni motiki romi: I a okiri ngkami.”

Ioane 14:18

“Ao E na kabane rannimata te Atua ni kaoi mai mataia.”

Kaotioti 21:4

“Kukurei, ao tai maaku, bwa Ngai te Uea I mena iroumi, ao n tei ibukimi.”

Reirei ao Berita aika Tabu 68:6