Ko na kanga n ataa te kaokoro imarenan te kaotioti ao am iango?
Tamnei
woman reading book
Korotamnei iroun Brian Kershisnik
Ti maeka n te aonaaba ae mwaiti iai kabwaiara. Iai inaomatara n rinea oin ara mwakuri, reirei, buura, te tabo ae ti tangiria ni maeka iai, ao a mwaiti riki. Ni koauana bon te kakabwaia nakoia ara roro. Ma n iterana are teuana, e kariki kaangaanga nakon rinerine aikai ibukina bwa e matoatoa karaoan taian babaire ngkana e a rangi ni mwaiti te kawai ao taai ake a na kairiira nakon bwaai aika tamaroa. Ti na kanga n rinea te eti ngkana e a rangi n rawata bwaai aika tamaroa? Ngkana ko namakina te bua ao ni mangaongao ni mwaitin babaire aika kamangaongao, ataia bwa Tamara are i Karawa e tangiria ni kairiko. Ko kona n rinea te kawai ae eti ao karekei kaeka aika ko ukoukori ngkana ko ira Bwanaana. Kinaa bwa E kanga n taetae nakoim, Onimakinna, ira te burabeti, bwaina te taotaonaki n nano, bwaina te katei ae tamaroa, ao karekea te onimaki, ao n tokina ko na kairaki n te kawai ae eti.
—Vira Vashchenko, Kyiv, Ukraine
Inanon maiu ao I a tia n nooria bwa e kanga te Uea ni kairai, ao I kakoaua bwa bwaai ni kabane ake I a tia ni kakoroi bukiia bon mai Irouna ao man Ana kairiiri. Riki n te tai are ngke I iangoia bwa I nakonako n akea raou, n tokina, E tuangai bwa N na ataia ao n namakinna bwa E mena ikekei n tainako ma ngai. Anne bukina ngkai I a tia ni karaoa te babaire bwa N na teimatoa n onimaki, riki ngkana I namakinna bwa akea raou. Ibukiu, kawaiu e aki itiaki n tainako, ao I aki kona n nooria n tainako bwa tera are e tatangingaai ibukin te tai ae na roko, ma I aki toki ni karaoi rinerine aika onimakinaki, ao ngkanne I moanna n noora te ota ao ni kinaa ana kairoro te Atua ni maiu. I ataia bwa Tamara are i Karawa ao Ana Rikitemanna, Iesu Kristo, a tangiriira ao A tauraoi ni kairiira, ma A kantaningaira bwa ti na katikui ara onimaki Irouia ao ni mwakuriia ngkana ti karekei taeka aika namakinaki mairoun te Tamnei.—
Indhira Mejia, Dominican Republic
Ngke I a moanna ni kara, N na riai n reiakina aron ana reitaki te Tamnei ma ngai. E taetae te Tamnei nakoiu rinanon iango aika bebete. E a tia n anai tabeua kataneiai n taneiai nako iai, ma ni bon arona e roko te Tamnei nakoiu n taabo aika akea te karongoa iai, n aron butiu nakon au mwakuri n au kaa. I ataia tiaki au iango ibukina bwa e na waekoa n anganai ana kairiiri te Tamnei ngkana I aki iangoa te bwai anne.
—Clarissa Mae Taylor, Utah, USA
I iangoa te kawai ane teuana ae moan te kamimi ae ti riai ni mwatai iaona bon te konabwai ni kinaa ana wirikiriki te Tamnei ae Raoiroi ae bebete. Te kamatebwai mwaaka ni booki aika tabu e a tia n anganai riki te korakora bwa N na mwatai iaona. I a tia ni kakoaua n tainako bwa ane e botumwaaka n ukoukorai ao e na kunea; ao ana bwai te Atua aika raba ana kaotaki nakoina man mwaakan te Tamnei ae Raoiroi (taraa 1 Nibwaai 10:19). N taekana teuana, ngkana I tangiria ni kinaa te Tamnei, I aki kona ni kariaia bwa N na kairaki n iango aika akea uaaia ke tabeaiangan te maiu ni katoabong, ma N na riai n rangi ni katabeaki ma te mwakuri ao n aki katabeaki ma iango riki tabeua. Anne te tai are N na kona ni kinaa iai te Tamnei ae Raoiroi ibukina bwa I a tauraoi ibukina! Titebo ma te kawai are e aki kona ni mwananga te kaibuke rinanon te angibuaka, ti aki kona n ongo te Tamnei ngkana ti kabanea ara iango ni bwain te maiu ake a riaon ara kona.—
Emmanuel Borngreat Dogbey, Accra, Ghana
Tamnei
couple
N ara utu ae uarereke, ti kinaa te Tamnei ibukin te rau ae ti namakinna, riki taangara ngai ma kainnabau. Ngkana bon oin ara iango, ti aki kona n namakinna bwa te bwai ae eti—iai n tainako te raraoma ke te maaku. Ma ngkana te kaotioti, ti namakina te rau n tainako, riki ngkana ti kataia ni kakoaua ao a taraa n nakoraoi n te moan tai. Ngkana ti ira raoi nanon te kaotioti, ti na noori bwaai n tainako bwa a na nakoraoi ao ni korobukiia. Anne te tai are ti na taraira ao ni kangai, “O, ngkai e a nakoraoi!”
—Maryana Wright, Utah, USA
E ngae ngke ti na karekei oin ara kaotioti ni kawai aika kakaokoro, teuana te bwai ae koaua n tainako: E taetae te Atua n tainako nakoira. Ti na ti kainnanoia ni karinna inanon te mwakuri ni karikirakea ara konabwai ni kinaa ao n ongo Bwanaana. Ngke e reirei Beretitenti Russell M. Nelson: “Tataro n aran Iesu Kristo ibukin tabeaiangam, maakum, mamaaram—eng, te bwai ae tangiria nanom. Ao imwiina kakauongo! Koroi iango ake a roko n am iango. Taui mwiin am namakin ao rinanoi ma te mwakuri aika ko kaungaaki bwa ko na karaoi. Ngkana ko kakaraoa te kawai aei ni katoa bong, ni katoa namwakaina, ni katoa ririki, ao ko na rikirake inanon reirein te kaotioti’” (“Te Kaotioti ibukin te Ekaretia, Te Kaoitoit ibukin Maiura,” Riaona, Meei 2018, 95).