Isip usa ka batan-ong babaye, kinahanglan ba nakong mas tutokan ang edukasyon ug panarbaho o ang pagkahimong asawa ug inahan?
Nasayud kita nga “ang pamilya mahinungdanon sa plano sa Tiglalang” ug nga “ang mga inahan adunay sagrado nga katungdanan sa pag-amuma sa ilang mga anak .”1 Ug kita usab nasayud nga, tungod sa managlahing maayo nga mga hinungdan, ang mga lalaki ug mga babaye gitambagan sa mga propeta sa pag-angkon og edukasyon.2 Agig dugang, nasayud kita nga daghang babaye posibling magkinahanglan o gustong mopadayon nga manarbaho.
Si Presidente Dallin H. Oaks, Unang Magtatambag sa Unang Kapangulohan, miingon nga para sa mga babaye, ang pagpili dili tali sa pamilya o sa edukasyon ug panarbaho. Ang “tukmang panahon [timing] mao ang atong pilion,” miingon siya. “Ug pangitaon nato ang inspirasyon sa Ginoo ug mga pagtulun-an sa Iyang mga sulugoon sa paghimo niana.”3
Planuhon ang pagkuha og edukasyon, ug planuhon ang pagbaton og usa ka pamilya. Mahimo usab nimong planuhon ang pag-angkon og trabaho. Sa tanan niini, ang kinahanglan nimong tutukan mao gayud ang pagsunod sa plano sa Langitnong Amahan ug pagtinguha sa Iyang kabubut-on.