ʻOkú ke Ako Nai Ha Meʻa Foʻou He ʻAho Kotoa Pē?

Naʻe tomuʻa pulusi ʻa e fakamatala ko ʻení ʻi he Self-Reliance Services Blog.

ʻOku lelei ki he ʻatamaí ʻa hono fakalahi ho ʻiló ʻaki ʻa hono ako ʻo e ngaahi meʻa foʻoú.

ʻI he taimi ʻokú ke mavahe ai mei he meʻa ʻokú ke anga ki aí pea ako ha meʻa foʻou, ʻoku hangē ia hano fakaʻaongaʻi ʻo ha uoua ʻoku teʻeki ke ke fakaʻaongaʻi ʻi ha taimi fuoloa. Mahalo ʻe faingataʻa ʻi he fuofua taimí, ka ʻi ho toutou ako e meʻa foʻou he ʻaho kotoa, te ke lelei ange ai, ʻe anga ho ʻatamaí ki he pole fakaʻahó, te ke loto-falala ange kiate koe ʻi he lavameʻa takitaha, pea ko e mahuʻinga tahá, ʻe fakamānako ange ʻa e akó!

ʻOku ʻikai mahuʻinga tatau ʻa e meʻa ʻokú ke akó mo e founga ʻo hoʻo akó. ʻOku ʻikai ha toe taimi ʻe faingofua ange ʻa hono maʻu ʻo e fakamatalá ka ko e taimí ni ʻi he komipiutá mo e telefoni toʻotoʻó. ʻOku ʻi ai ʻa e ngaahi app te ne malava ʻo ʻoatu ʻa e “meʻa foʻou ke ako” ʻi he ʻaho takitaha.

Pea ʻoku ʻikai fiemaʻu ia ke ke fai ha fekumi fakaikiiki ʻi he Google pe lau ha ngaahi fakamatala ʻi he Wikipedia. ʻOku faingofua pē ʻa hono ʻai ke ke ako ha meʻa foʻou ʻi he ʻaho takitaha hangē ko e lau ha tohi pe ako maʻuloto ha foʻi maau nounou pe founga feimeʻatokoni foʻou. Pe te ke fai ha meʻa taimi lōloa ange: ako ke tā ha meʻalea, ako ha sipoti foʻou pe fakamalohisino, pe ʻeveʻeva ki ha ngaahi feituʻu foʻou pea ʻaʻahi ki he niʻihi fakalotofonuá.

Ko ha ngaahi lelei ʻeni ʻi hono teke koe ke ke ako e ngaahi meʻa foʻoú:

He ʻikai te ke taʻeoliʻia.
ʻOku fakamānako ange pea fakafiefia ʻa e talanoa mo koé.
Te ke maʻu ha ngaahi kaungāmeʻa foʻou (koeʻuhí ko e fika 2 ʻi ʻolunga).
Te ke ako ʻa e vahevahe lelei ʻo e taimí.
Te ke tā sīpinga lelei ki hoʻo fānaú—te nau mamata ki he fakafiefia ʻo hono ako mo ʻahiʻahi e ngaahi meʻa foʻoú.

ʻOku tau ʻi he māmaní kotoa ke tupulaki fakatāutaha. ʻI heʻetau ako ʻa e founga ʻo e akó ʻoku vave ange ʻetau tupulakí. ʻE lava ke fakamatuʻotuʻa ange ai ʻetau fakakaukaú, ʻetau malava ko ia ke fai ha ngāué, mo ʻetau faʻa kātaki mo e niʻihi kehé.

ʻOku taʻefaʻalaua ʻa e ngaahi ʻuhinga ke ako ai ha meʻa foʻou ʻi he ʻaho kotoa pē. Ko e ʻuhinga lelei ʻe taha meia ʻĀleki Pelekiuele, ʻa ia naʻá ne pehē ko hono ako ko ia ha meʻa foʻou he ʻaho kotoá ʻoku “tokoniʻi koe ke ke ʻiloʻi ʻa e mahuʻinga ʻo e ngaahi meʻa ʻi ho ʻātakaí.” ʻI he taimi ʻe niʻihi ko e meʻa pē ʻoku tau fie maʻú ko ha kiʻi fakakaukau ke fakamāloʻia mo fakamahuʻingaʻi lahi ange e ngaahi meʻa ʻi hotau ʻātakaí” (“The Benefits of Trying New Things,” Everyday Inspiration, Beliefnet, Mar. 2014).

Ko e faingataʻá pē ke kamata, ko e kiʻi fakapulipuli ʻeni ke kamata ʻakí: Fehuʻi ki ha taʻu fā pe ko e hā e meʻa ʻoku vakai ki aí. Ko e moʻoni, fehuʻi ange pē ʻe koe. Mahalo te nau sio atu ka koe, sio takai holo, sio ki he langí pe ki he kelekelé. Fekumi ʻi he google ki he meʻa ʻoku pehē ʻe ha kiʻi leka fieʻilo ʻoku sio ki aí. Ako e meʻa kotoa te ke malava ʻo fekauʻaki mo e meʻa ʻe taha ko iá. Hangē ko ʻení, kapau ʻe pehē mai ʻe he kiʻi leká ko e laʻi ʻakau ʻi ha fuʻu ʻakau, kumi ke ʻiloʻi pe ko e faʻahinga ʻakau fēfē ia, ʻoku fēfē ʻa e lahi ʻene tupú, pea naʻe ʻomai mei fē. Te ke fiefia ʻi he fekumi ko iá, pea ʻe fiefia ai mo ho ʻatamaí.

Fakaʻaongaʻi ʻa e tefitoʻi moʻoni tatau ko iá ki ho moʻui fakalaumālié. ʻI hoʻo lau ʻa e folofolá, fehuʻi kiate koe, “Ko e hā ʻa e ʻuhinga moʻoni ʻo e meʻa ko iá?” Muimui ʻi he ngaahi fakamoʻoni folofola fakafekauʻakí. Fakakaukauloto ki he ʻuhingá. Lotu ke maʻu ha mahino. ʻI heʻetau kiʻi tatali pea ʻikai fakakaukau ki ha meʻá, ko e taimi ia ʻe akoʻi ai kitautolu ʻe he Laumālié, ʻo angamahení ʻi ha ngaahi founga iiki, ʻi he ʻotu lea ki he ʻotu lea.

ʻI he tupulaki ho ʻatamaí mo e laumālié fakatouʻosi ʻi he ʻaho kotoa, te ke toe fiefia mo lavameʻa ange ai.