Ngaahi Fehuʻi mo e Talí
“ʻOku founga fēfē ʻeku tauhi ʻeku ngaahi naunau fakaʻilekitulōniká mei hono tohoakiʻi ʻeku tokangá ʻi he lotú mo e seminelí?”
Puli mei he Sió, Puli mei he Fakakaukaú
Naʻá ku fakatokangaʻi kimuí ni mai ʻeku fakahehema ke fakaʻaongaʻi e ngaahi meʻa fakaʻilekitulōniká he lolotonga e lotú mo e ngaahi ʻekitivitī ʻa e toʻu tupú. Kuo hoko ia ko ha meʻa ke u anga ʻaki. Ko ha faʻahinga taimi pē ʻoku ou sio ai ki heʻeku telefoní, ʻoku ou fakavavevave leva ke toʻo ia mo vakaiʻi pe naʻe hū mai ha meʻa foʻou pe text. Ko e solovaʻangá? Ko hono fūfuuʻi pē ʻeku telefoní meiate au. ʻOku tatau ai pē pe ʻoku ʻi loto ʻi ha kato, ʻi ha lalo sea, pe ko hano tuku ʻi ha kaungāmeʻá—kapau he ʻikai ke u sio ki heʻeku telefoní, he ʻikai ʻahiʻahiʻi au ke u fakaʻaongaʻi ia.
Teilini M., taʻu 15, Folōlita, USA
Teuteuʻi Hoʻo Naunau Fakaʻilekitulōniká ke Fakasiʻisiʻi e Fakahohaʻá
Teuteuʻi hoʻo naunau fakaʻilekitulōniká ʻi he founga tatau pē ʻokú ke teuteuʻi ai ho ʻatamaí mo e sinó ki he Sāpaté. ʻAi ke fakalongolongo hoʻo telefoni toʻotoʻó he lolotonga e kalasí. Te ke lava foki ʻo fakamāvahevaheʻi e Gospel Library app mei he ngaahi app kehé koeʻuhí kapau te ke fie maʻu ke fakaʻaongaʻi e folofolá pe notebook, ʻoku ʻikai tohoakiʻi hoʻo tokangá ʻe he ngaahi app kehé.
Telikuimā S., taʻu 21, Sao Paulo, Palāsila
Lotua ha Tokoni
ʻOku ou fekumi ki he Laumālié ʻaki ʻeku lotu. ʻOku tokoni mai eni ke u lava ʻo taʻofi ʻeku ngaahi naunau fakaʻilekitulōniká ʻi he ʻaho Sāpaté mo e lolotonga e seminelí. ʻOku ou maʻu ha founga ke taʻofi ai ʻeku ngaahi naunau fakaʻilekitulōniká, ʻi he taimi kotoa pē ʻoku ou lotu ai ki heʻeku Tamai Hēvaní mo lau e Tohi ʻa Molomoná.
Tisaea M., taʻu 18, Vāhenga Komoé, Ivory Coast
ʻOua Naʻa Ngalo e ʻŪ Tohi Folofolá!
ʻOku sai pē hono fakaʻaongaʻi e ngaahi naunau fakaʻilekitulōniká ki hono ako e ongoongoleleí, ka ʻi he taimi ʻe niʻihi ʻoku ʻikai lava ke mapuleʻi. Feinga ke fakaʻaongaʻi e ngaahi tohi folofolá ke taʻofi koe mei hono tohoakiʻi hoʻo tokangá. ʻE fakahinohinoʻi koe ʻe he ʻEikí. Te ke ako ha ngaahi meʻa lahi ange pea ongoʻi e Laumālié.
ʻAiana A., taʻu 13, Lakuna, ʻOtu Filipainí
ʻAve Ia ki Mamaʻo
ʻOku ou tamateʻi e lea ʻeku telefoní ʻi he lotú pea tuku ia ʻi hoku kató tuku kehe kapau te u fakaʻaongaʻi ia ki he folofolá. ʻOku ʻikai ke u teitei fakaʻaongaʻi ia ʻi he lolotonga e sākalamēnití. ʻOku ou toʻo ia ke mavahe mei hoku nimá ke fakaʻehiʻehi mei he ʻahiʻahi ke fakaʻaongaʻi iá.
Viliami W., taʻu 17, Veisīnia, USA