ʻE Tokoni Nai ʻEtau Ngāue Fakaetauhí ke Fakamoʻui e Niʻihi Kehé?

Naʻá ku tangutu ʻi he houalotu sākalamēnití ʻi ha Sāpate ʻe taha, ʻo fakalaulauloto ki heʻeku lau heʻeku folofolá ʻoku fie maʻu ke tau fai e ngaahi ngāue naʻe fai ʻe he Fakamoʻuí (vakai, 3 Nīfai 27:21). Naʻá ku pehē loto pē, “Ko e hā koā e ngaahi ngāue ʻa Kalaisi ʻi he māmaní?” Naʻe fakatefito ʻeku fakakaukaú ʻi ha meʻa ʻe ua: ngāue tokoni mo e faifakamoʻui. Te u lava ʻa e ngāue tokoní, ka ko e faifakamoʻuí?

Kuó u faʻa fakalaulauloto ki he fakakaukau ke faifakamoʻuí. Kuo tafa tuʻo 16 au ʻi heʻeku moʻuí pea naʻe pau ke u fai ha faifakamoʻui lahi ʻaupito! Ka naʻá ku fifili pe ʻe anga fēfē haʻaku hoko ʻo hangē ko Sīsū Kalaisí ʻo tokoniʻi e niʻihi kehé ke fakamoʻui kinautolu. Ko hono moʻoní, naʻe ʻikai ke u maʻu ʻa e mālohi faifakamoʻui naʻá Ne maʻú. Pea ko e hā leva e founga naʻá Ne finangalo mai ke u fai ʻaki ʻEne ngāue faifakamoʻuí ʻi he māmaní? Ko e hā nai te u lava ʻo faí?

ʻI heʻeku fakalaulauloto ki he founga kuo tokoni ai e niʻihi kehé ke fakamoʻui aú, naʻe tataki ʻeku fakakaukaú ki he ngāue fakaofo ʻo e faifakamoʻuí—ʻa e fakafiemālie, ngāue tokoni, mo e ngāue fakaetauhi—kuo fai mai ʻe he niʻihi kehé maʻaku ʻi heʻeku moʻuí. ʻI he nofotaha ʻetau ngāue fakaetauhi ki he niʻihi kehé ʻi ha ngaahi founga ne mei fai ʻe he Fakamoʻuí, ko ha fakakaukau mālohi fau ʻa e tokoni ke fakamoʻui e niʻihi kehé.ʻOku tau faingataʻaʻia kotoa pē lolotonga ʻetau fononga fakamatelie ʻi he māmaní. ʻOku tokolahi ha niʻihi ʻoku nau fokoutua fakaesino pe fakaeʻatamai pe ʻoku nau faingataʻaʻia fakalaumālie. ʻOku tau fie maʻu kotoa pē ʻa e faifakamoʻuí. Hangē ko ia ʻoku hā ʻi heʻeku fakamatalá (peesi 20) pea hangē ko ia ʻoku akoʻi ʻe ʻEletā Niila L. ʻEnitasení (peesi 12), te tau lava kotoa ʻo kau atu ki he ngāue fakaetauhi ki he niʻihi kehé ʻi ha ngaahi founga ʻe tokoni ke fakamoʻui kinautolu.

Fakaʻapaʻapa atu,

Merrilee Boyack