Ko Hono Ikunaʻi ʻo ʻEku Manavasiʻi ke Maʻu Fānaú

Fai ʻe Christina Crosland

ʻOku nofo ʻa e tokotaha naʻá ne faʻú ʻi Tekisisi, USA.

Naʻe ʻikai hoko ʻa e fili ke maʻu fānaú ko ha liliu naʻá ku vēkeveke ke fakahoko.

Naʻe ʻikai ke u fuʻu saiʻia ke ʻi ai haʻaku fānau. Ko au ne siʻisiʻi taha he fāmilí, teʻeki ai ke u toʻotama, pea ilifia foki ʻi haʻaku fakatokangaʻi ʻoku sio mai ha kiʻi tamasiʻi. Ko ia ʻi heʻeku fuofua malí, naʻe ʻikai ke u vēkeveke ke fai e fili ke maʻu ha fānaú.

Ne vēkeveke hoku husepānití mei he kamataʻangá ke kamata ha fāmili, ka naʻá ku vili pē ke ma tatali. ʻI he ngaahi fuofua māhina ko iá, mahalo ne hoko e, “Ta toki talanoaʻi ʻi ha taʻu ʻe tahá” ko ʻeku taumuʻá.

Neongo mahalo ʻoku ʻikai ko e ʻuhinga ʻeni ʻa e niʻihi kotoa ʻoku nau faingataʻaʻia ke fili ke ʻi ai ha fānaú, ka naʻá ku ʻilo ʻa e ʻuhingá: naʻe mahino ngofua, ko e ilifia mo e siokita. ʻI heʻeku fakakaukau ki he hoko ko ha faʻeé, naʻe ʻikai ke u fakakaukau ki he ngaahi malimali fakaʻofoʻofá mo e kakatá. Ka ne u fakakaukau ki he ngaahi pō ʻoku ʻikai lava ha mohé mo e fakangatangata e taimi ʻataá. ʻIkai ngata aí, ko e faingataʻaʻiá mo e taʻefiemālié. ʻOku ou kei manatuʻi ʻa e fuofua taimi ne u fanongo ai ʻi he fāʻelé. Naʻá ku fili leva he taimi ko iá te u ohi pē ha fānau.

Ne u ongoʻi taʻefiemālie maʻu pē he kotoa ʻeku moʻuí ke feohi mo e fānaú, ko ia ʻi heʻeku fakakaukau ki haʻaku fānau pē ʻaʻakú, naʻe ʻikai ke u ʻilo pe ʻe malava fēfē ia. Te u malava fēfē ʻo liʻaki e meʻa kotoa pē maʻanautolu?

Ne ʻikai ha liliu lahi ʻi he fuofua māhina ʻe valu pe hiva ʻo ʻema nofomalí. Naʻe faʻa fakakata maʻu pē ʻa hoku husepānití ʻi he taimi ʻoku ou fehuʻi ai, “ʻOkú ke ʻilo ha meʻa?” te ne tali mai “ʻOkú ke feitama!” Ne u fakahila pē mo hoko atu ʻeku kumi ʻuhinga ki he ʻikai ke ʻi ai ha fānau ʻi he kahaʻu vave maí.

ʻOua naʻá ke maʻu hala, naʻe ʻikai ke u ongoʻi fakakounaʻi ke ʻi ai ha fānau. Ne ma fepōtalanoaʻaki mo hoku husepānití peá ma felotoi ke fakahoko māmālie ʻema ngaahi filí. Ka ʻi heʻeku fakakaukaú, he ʻikai teitei ʻi ai ha fānau ia ʻi ha taimi lōloa.

Neongo iá, naʻá ku ʻiloʻi ʻoku lahi ange ʻa e ʻilo ʻa e Tamai Hēvaní ki he meʻa ʻe malava pea totonu ke hoko ʻi heʻeku moʻuí. Ko e ʻuhinga ia naʻá ku kei lotua ai e filí ni fakafoʻituitui pea fakataha mo hoku husepānití, neongo ʻeku loto mālohi ke fakatatali e maʻu fānaú. Ne ma fakahā ki he Tamai Hēvaní ʻema palaní, ka naʻá ma toe fakahā ange foki te ma tali ha palani kehe kapau ko Hono finangaló ia. Ko e sitepu mahuʻinga ia ʻi he liliu ʻo e lotó ne hoko māmālie kiate aú.

Naʻe ʻikai hoko fakaʻangataha pē ʻa e liliu ko iá. Ko hono moʻoní, naʻe ʻikai ke u manatuʻi pau pe naʻe kamata fakakū. Ka naʻe māmālie pē ʻa e faingofua ange ke u tali ʻa e fakakaukau ke kamata ha fāmilí. Ne u kamata ke fakakaukau ki ai, tautefito ki he taimi ko ia ne ʻosi ai ʻeku ngaahi ʻuhingá. Ne u loto ke tali kae ʻoua ke ʻosi ʻeku akó—ne ʻamanaki ke u ʻosi mei he akó. Ne u fie maʻu ke ma ʻilo e feituʻu te ma ʻi ai ʻi he taʻu foʻoú—naʻe maʻu ʻe hoku husepānití ha faingamālie ngāue. Naʻe tuai ka naʻe kamata ke ngāue lelei ʻa e ngaahi meʻa kotoa pē.

Ne u pehē ʻe fakailifia ʻa e taimi ʻe ʻosi ai ʻa e ngaahi ʻuhinga ne u kei pīkitai fuoloa ki aí. Ka ko ia pē. Naʻe ʻikai ke u ilifia. Naʻe ʻikai ke u toe maʻu ʻa e manavahē ne ʻiate au ʻi he taʻu ʻe 10 kuohilí. Ka naʻá ku maʻu ha nonga ne mālohi feʻunga ke ne tekeʻi ia ki tuʻa.

ʻI he hoko e taʻu ʻe taha ʻo ʻema nofomalí, naʻe ʻikai ha toe ʻuhinga ke u fakaʻikaiʻi ai ʻa hono kamata ʻo ha fāmili. Naʻe liliu ʻe he ʻEikí hoku lotó pea mole atu mo e manavaheé.

Ne fehuʻi mai ʻe haʻaku kaungāmeʻa kimui pe naʻe anga fēfē ʻeku ʻiloʻi ʻa e taimi totonú. Naʻa ku fakahā naʻe ʻikai fakafou ia ʻi he fuʻu ongoʻi lototoʻa makehe pe ʻofa ki he fānaú, pe ongoʻi māfana moʻoni ʻi he lotó. Naʻe hoko pē ia ʻi he mole atu pē ʻa e manavaheé. Naʻe hangē ko e folofola ʻa e ʻOtuá ki he Kāingalotu ʻi muʻá: “Ka ʻo kapau te mou mateuteu, ʻe ʻikai te mou manavahē” (Tokāteline mo e Ngaahi Fuakava 38:30). Kiate au, naʻe hoko ʻa e mole ʻo e manavaheé ko e tali ia mei he ʻEikí ʻo pehē, “ʻIo, kuó ke mateuteu.”

Ko e meʻa fakafiefia ia ʻa e fuofua taimi ke u kata ai mo tali ʻio ki he tali mai ʻa hoku husepānití, “ʻOkú ke feitama!”

Ko ʻeni ʻoku ou fua he taimí ni ha kiʻi pēpē. ʻOku ou kei ako pē ke hoko ko ha faʻē, pea ʻoku teʻeki ai ke u ʻilo e meʻa ke fai ʻi he feohi mo e fānau ʻa e kakai kehé. Ka ʻoku ou ʻilo, tatau ai pē pe ko e hā ʻeku tōnounou ʻi he feohi mo e fānaú, ʻoku poupou mai ʻa e Tamai Hēvaní. Naʻá Ne teuteuʻi au ki he taimi ko ʻení. Kuó u ongoʻi ʻEne tokoni fakalangí, neongo ʻa e ngaahi ongo ʻo e puputuʻú mo e manavaheé. Ko e ʻikai lava ʻo mohe ʻi he poʻulí mo e siʻisiʻi e taimi ʻataá ko ha ngaahi feilaulau iiki ia ʻi hono fakahoa ki he fiefia ʻoku ou maʻu mo hoku fāmilí. ʻOku ou ʻilo ʻoku ʻafioʻi ʻe he Tamai Hēvaní ʻetau manavaheé mo e tūkungá. Kapau te tau fekumi ki Heʻene tokoní, te Ne lava ʻo tokoniʻi kitautolu ke ikunaʻi kinautolu pea laka atu ki muʻa ʻi he tui.