Ko ʻEmau Fononga Taʻu ʻe 30 ki he Temipalé

Francisco W. Fierro

Lima, Pelū

Tā fakatātaaʻi ʻe Carl Wiens

Hili ha lau māhina mei hoku papitaisó, naʻe kau hoku kiʻi tehiná, ʻOsiualotō, ki ha siasi kehe pea naʻe mālohi ʻaupito ʻene kau atu ki heʻenau ngaahi fakatahaʻangá. Ka naʻá ku fie maʻu ke ʻiloʻi ʻe ʻOsiualotō e meʻa ʻoku ou ʻiloʻi ʻoku moʻoní. Naʻe tautautefito eni, ki heʻeku fie maʻu ke ne ongoʻi e ngaahi lea ʻa e kau palōfitá.

Naʻá ku vahevahe mo ʻOsiualotō, ʻi he māhina taki taha, ʻa e makasini Liahoná ʻi heʻeku maʻu iá. Naʻá ku fokotuʻu ange ʻe lava ke tokoni e ngaahi tefito ʻi he makasiní ki heʻene teuteu ki he ngaahi fakatahaʻanga ʻo hono siasí. Naʻá ku fiefia ʻi heʻene tali ʻeku fokotuʻú. Ka neongo ia, hili ha ngaahi taʻu lahi mei ai, naʻá ku lotomamahi ke mamata ki he ʻikai fie tali ʻe hoku tehiná e ongoongolelei kuo toe fakafoki mai ʻo Sīsū Kalaisí.

ʻI ha pongipongi ʻe taha, naʻe talaange ʻe ʻOsiualotō ki homau fāmilí naʻá ne palani ke mavahe mei homau ʻapi ʻi ʻEkuatoá pea fononga ki Suisalani. Naʻá ne tali ha tāpuaki meiate au he ʻaho naʻe mavahe aí. Ko ha momeniti ongo moʻoni eni kiate au he naʻe fanafana mai ʻe he Laumālié ki hoku lotó ʻe ʻomi ʻe he fononga ko ʻení ʻa ʻOsiualotō ke ne toe ofi ange ki he Fakamoʻuí mo Hono Siasí.

Naʻe fetaulaki ʻa ʻOsiualotō mo e kau faifekaú ʻi Suisalani, pea faifai pē peá ne fakaafeʻi kinautolu ki hono ʻapí. Naʻá ne kamata fakakaungāmeʻa ofi mo kinautolu ʻi he ʻalu ʻa e taimí. Ka naʻá ne talamai kapau ʻe ʻohake ʻe he kau faifekaú e tefito ʻo e papitaisó, he ʻikai te ne toe tali kinautolu. Fakakaukau angé ki heʻeku ʻohovalé mo e fiefiá ʻi heʻeku maʻu ha ʻīmeili meiate ia ʻo talamai ʻe papitaiso iá. Naʻá ku kau mai ki he Siasí ʻi he 1981. Naʻe papitaiso ʻa ʻOsiualotō hili ha taʻu ʻe 20 mei ai, ʻi Mē ʻo e 2001. Naʻe maʻu hono ʻenitaumení ʻi Siulai ʻo e 2002, pea naʻe silaʻi ia ki hono uaifí ʻi Fepueli ʻo e 2003.

ʻI he foki mai ʻa ʻOsiualotō ki ʻEkuatoá, naʻá ne fakahoko ʻene fakamoʻoní ʻi ha houalotu sākalamēniti. Naʻá ne loʻimataʻia ʻi heʻene pehē, “Naʻe vahevahe mai ʻe hoku taʻoketé e ngaahi lea ʻa e kau palōfitá kiate au. Naʻe ueʻi fakalaumālie au ʻe he ngaahi lea ko ʻení ʻi heʻeku teuteu ki he ngaahi fakatahaʻanga ʻi he siasi naʻá ku kau atu ki aí, pea naʻe tupulaki ha kakai tokolahi ʻi he foungá ni. Naʻe liliu ʻe he ngaahi lea ʻa e kau palōfitá ʻeku moʻuí. Naʻá ku ʻilo ʻo fakafou ʻiate kinautolu, kuo toe ʻi māmani ʻa e kakato ʻo e ongoongolelei ʻo Sīsū Kalaisí, mo e mālohí mo e mafaí.”

Naʻe silaʻi au mo ʻOsiualotō ʻi Fepueli ʻo e 2011 ki heʻema ongomātuʻá ʻi he Temipale Kueiakuila ʻEkuatoá. Kuo tāpuekina ʻe he lea ʻa e kau palōfitá homau fāmilí ki he taʻengatá.