Takisikou, Mekisikou

Ko ha kolo keliʻanga malala eni ʻi ha taimi ʻe taha, ka ʻoku ʻiloa ʻa Takisikou, Kuelelo, Mekisikou, he ʻahó ni ko e taha ia ʻo e pueblos magicos (ngaahi kolo faimana) ʻo e fonuá, ʻoku ʻiloa ia ʻi he ngaohi siuelí, ko hono ngaahi langa fakakolonia ʻo Sipeiní, pea mo e fakaʻofoʻofa ʻo hono feituʻu ʻutá. ʻOku tuʻu e koló ʻi ha ngaahi tafungofunga pea ʻoku fakahihifi mo pikopiko hono ngaahi halá. Ko e feituʻu ʻoku ʻiloa taha aí ko ha falelotu Sanitā Pilisika mei he senituli 18.

Ko Takisikoú foki ko e tuʻuʻanga ia ʻo e Kolo ko Takisikou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia ʻoku nau fakataha he Sāpate kotoa pē ʻi ha fale he avenida de los Plateros. ʻOku kau atu e koló ki he Siteiki ʻIkuala Mekisikoú, pea ko e taha ia ʻo e ngaahi fakatahaʻanga lotu ʻe 1,987 ʻo e Kau Māʻoniʻoni ʻi he Ngaahi ʻAho Kimui Ní ʻi Mekisikoú, ʻa ia ʻoku tokolahi hake hono kāingalotú ʻi he toko 1.4 milioná, ʻi ai ha misiona ʻe 34, mo ha temipale ʻe 13. ʻOku ʻi Mekisikou foki ʻa e Senitā Akoʻanga Fakafaifekau Mekisikou Sití, ʻa e MTC fika ua lahi taha ʻi he Siasí. ʻOku lava ke tokangaʻi ʻi he senitaá ha kau faifekau ʻe toko 1,000 he taimi pē taha.

Naʻe papitaiso ʻa e fuofua kāingalotu ʻe toko nima ʻi Mekisikoú ʻi he 1876.
Ko Mekisikou ʻa e fuofua fonua ʻi tuʻa ʻi he ʻIunaiteti Siteití ke ʻi ai ha siteiki ʻe 100.
Naʻe fakatāpui ʻa e Temipale Mekisikou Sití, ko e fuofua temipale ia ʻi Mekisikoú, ʻi he 1983. Ko e temipale fakamuimui taha ke fakatapuí ʻa e Temipale Tihuana Mekisikoú, ʻi he 2015. Naʻe fanongonongo e Temipale Puepilā Mekisikoú ʻi ʻOkatopa ʻo e 2018.
ʻI he ʻaʻahi ʻa Palesiteni Hauati W. Hanitā (1907–95) ki Mekisikou he 1994, naʻá ne fokotuʻu ai e Siteiki Mekisikou Siti Konitulelasí, ko e siteiki ia hono 2,000 ʻo e Siasí.