ʻAi Hangatonu
Ko e hā ʻoku totonu ke u lea ʻaki ʻi hono fakafehuʻi ʻe hoku ngaahi kaungāmeʻá ʻetau tui kau ki he nofomalí mo e fāmilí?
ʻI he “Ko e Fāmilí: Ko Ha Fanongonongo ki Māmani,” ʻoku fakahaaʻi ʻe he Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Toko Hongofulu Mā Uá “ko e mali ʻi he vā ʻo ha tangata mo ha fefine naʻe tuʻutuʻuni ia ʻe he ʻOtuá pea ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú” (familyproclamation.lds.org).
Ko e fanongonongo ko ení “ko ha fakamatalaʻi ia ʻo ha moʻoni taʻengata” naʻe fakafou mai ʻi ha “founga maʻu fakahā” pea ʻoku ʻikai “ko ha fakamatalaʻi pē ia ʻo ha tuʻutuʻuni” (Dallin H. Oaks, “Ko e Palaní mo e Fanongonongó,” Liahona, Nōv. 2017, 30, 29). Te ke lava ʻo vahevahe hoʻo tui fakafoʻituitui ʻoku moʻoni ení, pea te ke lava ʻo vahevahe ʻa e ngaahi tāpuaki ʻoku ʻoatu ʻe he ngaahi moʻoni ko ení kiate koé.
ʻOku totonu ke tau fakaʻehiʻehi mei he fie māʻoniʻoní pe fakakikihí, ʻi heʻetau tali ki he niʻihi kehé. ʻOku totonu ke tau feinga ke ʻofa kiate kinautolu. Ko kinautolu ʻoku tauʻatāina mo loto-moʻoní, ʻoku totonu ke nau maʻu ha tali loto-moʻoni. Ka ʻo kapau ʻoku hā mahinongofua ʻoku ʻikai fakamaatoato e tokotaha ko iá peá ne fie maʻu pē ke manukiʻi mo tukuhifoʻi hoʻo ngaahi fakakaukaú, pe ʻoku nau fie kē pē, ko e lelei tahá ke fakaʻehiʻehi mei hano aleaʻi ia (vakai, Mātiu 7:6).