Kakai Lalahi Kei Talavoú
Tāpuekina ke Maʻu Fānau
ʻOku nofo ʻa e tokotaha naʻá ne faʻú ʻi Manakua, Nikalākua.
Naʻe fakafehuʻia kimaua ʻi he toe ʻi ai haʻama fānau tokolahi angé, ka ʻoku mahino ange kiate kimaua ʻae ʻofa ʻa e Tamai Hēvaní mo hono fakatupulaki ʻo hotau tuʻunga malava fakalangí ʻo fakafou ʻi heʻema fānaú.
Tā fakatātaaʻi ʻe Tausha Coates
“Ko hoʻomo kiʻi tamasiʻi fakaʻosí eni?” ʻI heʻeku kei feitama ʻi heʻeku leka fika tolú, lolotonga ia e ʻi ai haʻaku ongo leka kehe ʻe ua ne teʻeki taʻu nimá, ne hangē ne faʻa ʻi ai pē ha ngaahi fakakaukau ia ʻa e kakaí fekauʻaki mo ʻeku fānaú. “Ko e tokotaha fakaʻosí eni?” “ʻOku ʻikai nai ke ke fakakaukau ʻokú ke fuʻu lele vave?” “Ko e hā hoʻo meʻa ʻe fai mo e kau leka ʻe toko tolú?” ko e ngaahi fehuʻi ia naʻá ku faʻa fanongo ki aí. Neongo naʻe mahino pē, he ko e angamaheni ʻi hoku fonuá ʻoku taki taha pē pe ua e kakaí he fānau koeʻuhi ko e ngaahi palopalema fakaʻekonōmiká, ka ko e meʻa ne ʻikai ʻiloʻi ʻe he kakaí, kuó u talanoa au mo hoku husepānití lolotonga ʻema kei kaumeʻá, fekauʻaki mo e tokolahi ʻo e fānau naʻá ma fie maʻú mo e taimi ke maʻu ai kinautolú. Ko ha fili mahuʻinga mo fakamaatoato ʻa e palani fāmilí kiate kimaua, pea naʻe pau ke fakahoko ia ʻi homa vahaʻa ʻo kimauá, pea fekumi maʻu ai pē ki he fakahinohino ʻa e ʻOtuá. Naʻá ma fakafanongo ki he Laumālié kae ʻikai ko e ngaahi leʻo mei homa ʻātakaí pea kuo tāpuekina kimaua ke maʻu ha fānau.
ʻI he taimi naʻe fakahoko ai ʻe he ʻEikí ha fuakava mo ʻĒpalahamé, naʻá Ne talaʻofa kiate ia ha hako tokolahi (vakai, Sēnesi 17:5–6; 22:17). Naʻá ma ongoʻi mei he potufolofola ko iá, ko e maʻu fānaú ki heʻetau Tamai Hēvaní, ko e taha ia ʻo e ngaahi tāpuaki maʻongoʻonga taha te tau lava ʻo maʻú. ʻOku lava ke toe mahino ange kiate kimaua ʻa e ʻofa ʻa e Tamai Hēvaní ʻo fakafou ʻi heʻema fānaú, pea ʻokú ma fakatupulaki homa tuʻunga malava fakalangi mo taʻengatá. ʻI hoʻo maʻu fānaú, ʻoku ʻikai ngata pē ʻi hoʻo tokoniʻi e ngaahi laumālie ko ia ʻoku nau ʻi he maama fakalaumālié ke haʻu ki he māmaní ʻo maʻu ha sinó, ka ʻokú ke maʻu foki e faingamālie ke akoʻi kiate kinautolu e ongoongoleleí. ʻOku ou tui ʻoku siʻisiʻi ha ngaahi meʻa ʻi he moʻuí te ne toe teuteuʻi lelei ange kitautolu ki he moʻui taʻengatá ʻi he maʻu fānaú. Ko hotau ngaahi fāmilí ʻa e feituʻu ke tau ako lelei taha ai ke moʻui ʻaki e ngaahi ʻulungaanga ʻo e ʻEikí. ʻOku fakamanatu fakaʻaho mai kiate au, ʻi heʻeku hoko ko eni ko ha faʻeé, ʻa hono mahuʻinga ke te vāofi mo e Tamai Hēvaní. ʻOku ou lotu ʻi he taimi kotoa pē, ʻo kolea ha fakahinohino, mālohi, mo e faʻa kātaki mo fakamālō kiate Ia koeʻuhi ko e ngaahi tāpuaki lahi ʻoku ʻomi ʻe he maʻu fānaú.
Ko ha aʻusia liliu moʻui ʻa e hoko ko ha mātuʻá pea faʻa faingataʻa ka ʻoku fonu ʻi he fiefiá. ʻOku fakafonu hoku lotó ʻaki e fiefia ʻoku ʻikai lava ke fakamatalaʻi, ʻi he taimi kotoa pē ʻoku ou fanongo ai ki hano hivaʻi ʻe hoku ʻofefine lahi tahá ha hiva Palaimeli, pe vakai atu ki he feinga hoku kiʻi foha taʻu uá ke kuikui lolotonga ʻemau lotu fakafāmilí, pe ʻi heʻeku fuofua ʻeku kiʻi pēpē tamasiʻi kuo mohé. Ko ʻetau fānaú ʻa e ivi ʻokú ne ngaohi kitautolu ke tau kātaki ki he ngataʻangá, neongo pe ko e hā hono lahi e ngaahi faingataʻa ʻoku tau fehangahangai mo ia ʻi he moʻuí. ʻOku ou loto houngaʻia moʻoni ki heʻeku Tamai Hēvaní ʻi hono ʻomi kiate au e faingamālie ke hoko ko ha faʻē ki heʻeku fānaú.
ʻOku ou ʻilo ʻoku ʻofa ʻetau Tamai Hēvaní ʻiate kitautolu. Kuó u ongoʻi ʻEne ʻofá lolotonga e ngaahi momeniti melie mo fonu ʻi he fiefia moʻoni mo taʻengatá kae pehē foki ʻi he lolotonga ʻo e ngaahi faingataʻá. Naʻá Ne tuku mai Hono ʻAló, ʻa Sīsū Kalaisi, ke fakahaaʻi mai e hala ke foki hake ai ki hotau ʻapi fakalangí. ʻOku ou ʻofa ʻi hoku fāmilí, pea ʻoku ou ʻilo ʻe lava ke taʻengata ʻa e fāmilí.