Houngaʻia ʻi he Ongomātuʻá

Fai ʻe Palesiteni Russell M. Nelson

Toʻo mei he “Fakahā maʻá e Siasí, Fakahā ki Heʻetau Moʻuí,” konifelenisi lahi ʻo ‘Epeleli 2018.

Ne kau kotoa mai ʻeku ngaahi kui ua ʻe valú ki he Siasí ʻi ʻIulope. Naʻa nau faivelenga ʻaupito ʻi he Siasí. Hili iá, ne ʻikai hokohoko atu hono moʻui ʻaki ʻe heʻeku ngaahi kuí e ongoongoleleí. Ne tupu heni e ʻikai faʻa ʻalu ʻeku ongomātuʻá ki he lotú ʻi heʻeku kei siʻí.

Naʻá ku ʻofa lahi ʻi heʻeku ongomātuʻá. Naʻá na akoʻi mai kiate au ha ngaahi lēsoni mahuʻinga. He ʻikai feʻunga ʻeku fakamālōʻia kinaua koeʻuhi ko homau ʻapi fiefiá. Ka ne aʻu pē ki heʻeku kei tamasiʻí, naʻá ku ʻiloʻi ne ʻi ai ha meʻa ne ʻikai ke u maʻu he naʻe ʻikai faʻa ʻalu hoku fāmilí ki he lotú. ʻI ha ʻaho ʻe taha naʻá ku heka ʻi ha pasi ki ha faletohi ʻa e Siasí. Naʻá ku manako ke ako fekauʻaki mo e ongoongoleleí.

ʻI heʻeku ako fekauʻaki mo e Lea ʻo e Potó, naʻá ku ʻiloʻi ai ne ʻikai moʻui ʻaki ʻe heʻeku ongomātuʻá e tōʻonga moʻui ʻokú ne akoʻi maí. Ka naʻá ku fie maʻu ke na fai pehē! Ko ia ai, ʻi ha ʻaho ʻe taha, naʻá ku fahi e hina kava mālohi kotoa pē ʻi homau ʻapí he faliki simá! Naʻá ku fakakaukau ʻe tauteaʻi au ʻe heʻeku tangataʻeikí, ka naʻe ʻikai ke ne lea mai kiate au.

ʻI he fakaʻau ke u lahi angé, naʻá ku kei ako pē fekauʻaki mo e ongoongoleleí. Ne kamata ke mahino kiate au e palani fakaʻofoʻofa ʻa e Tamai Hēvaní. Ne papitaiso au ʻi hoku taʻu 16. Naʻá ku faʻa pehē loto pē ʻi he taimi Kilisimasí, “ʻOku ʻikai ke u toe fie maʻu ʻe au ha meʻaʻofa Kilisimasi ʻe taha! ʻOku ou fie maʻu pē ke silaʻi au ki heʻeku ongomātuʻá ʻi he temipalé.” Naʻá ku tatali ʻi ha ngaahi taʻu lahi ke hoko e misi ko iá. Ne ʻosi taʻu 80 ʻeku ongomātuʻá, pea toki silaʻi kimautolu ko ha fāmilí! Naʻá ku ongoʻi ha fiefia lahi ʻaupito he ʻaho ko iá. ʻOku ou kei ongoʻi fiefia ʻi he ʻaho kotoa pē naʻe silaʻi fakataha kimautolu pea naʻe silaʻi au kiate kinaua.

Peesi Valivalí

“Fakahā hake ho lotó ki hoʻo Tamai Hēvaní. Tafoki kiate Ia ki ha ngaahi tali mo ha fakafiemālie.” —Palesiteni Russell M. Nelson