Ko Kinautolu ne Fakapōngí mo ʻEku Fakamoʻoní
Sunju Kim Muir
Melileni, USA
Tā fakatātā ʻa Allen Garns
Naʻá ku fakaveiveiua ʻi hono akoʻi au ʻe he ongo faifekaú fekauʻaki mo Siosefa Sāmita mo e Tohi ʻa Molomoná. Naʻá ku tomuʻa fakakaukau ko Siosefa Sāmitá, hangē ko e kau fie “palōfita” tokolahi kehe, ʻoku mahalo naʻá ne ʻomi ha tohi loi ki he māmaní ʻo fekumi ai ke koloaʻia, ʻiloa, mo ne hoko ai ko ha helo.
Naʻe ʻikai haʻaku teitei fakakaukau ke lau e Tohi ʻa Molomoná. Ka ʻi he fakalau ʻa e taimí naʻe tuku ʻe he feohi mo e ongo faifekaú mo ʻena vekeveke ki he ongoongoleleí ke tupulaki ʻeku fieʻilo ki heʻena pōpoakí.
ʻI heʻeku lau e ngaahi veesi ne ʻomi ʻe he ongo faifekaú ʻi he Tohi ʻa Molomoná, naʻá ku ʻilo ai ʻoku moʻoni e fakaafe ʻa Molonai ke kole ki he ʻOtuá ʻi he loto-fakamātoato, loto-moʻoni, mo e tui kia Kalaisi pe ʻoku moʻoni e Tohi ʻa Molomoná (vakai, Molonai 10:4–5). Naʻá ku fakakaukau, “Ko hai ia, ʻi haʻane ʻilo ʻoku loi e tohí, te ne fie fakatukupaaʻi kitautolu ke tau kole ki he ʻOtuá ʻi he loto-fakamātoato mo e loto-moʻoni pe ʻoku moʻoni e Tohi ʻa Molomoná?”
Pea ʻi ha ʻaho ʻe taha ne fakamatalaʻi ʻe he ongo faifekaú naʻe fakapoongi ʻa Siosefa Sāmita mo hono tokoua ko Hailamé, koeʻuhi ko ʻena fakamoʻoní. Ne fakafokifā pē ha haʻu ha fakakaukau kiate au, he ʻikai te na teitei tuku ke mole ʻena moʻuí ʻi ha meʻa naʻá na ʻiloʻi naʻe loi. ʻI he momeniti ko iá, naʻe mafola ʻi loto ʻiate au ha ongo māfana, hangē ha afi naʻe velá. Ko ha fakamoʻoni ia ʻa e Laumālie Māʻoniʻoní ki hoku lotó ko Siosefa Sāmitá ko ha palōfita moʻoni ia. Naʻe papitaiso mo hilifakinima au, ʻaki e fakamoʻoni ko ení.
Naʻe fakamanatu mai kiate au e aʻusia ko ʻení hili ha taʻu ʻe 25 mei ai ʻi heʻeku lau ha lea ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe fehuʻi ʻe ʻEletā Hōlani, pe naʻe mei hokohoko atu ʻa Siosefa mo Hailame, ʻi he momeniti mahuʻinga ko ia ʻo hona fakapōngí, ke loi ʻi he ʻao ʻo e ʻOtuá ʻaki hono tuku ʻena moʻuí, hona langilangí, mo hona fakamoʻui taʻengatá ki ha tohi naʻá na ʻiloʻi naʻe loi.
“He ʻikai ke na teitei fai ia!” Naʻe pehē ʻe ʻEletā Hōlani: “Naʻá na loto fiemālie pē ke na mate kae ʻikai fakaʻikaiʻi ʻa e tupuʻanga fakalangi pea mo e moʻoni taʻengata ʻo e Tohi ʻa Molomoná.”1
Naʻe matuʻaki mahino kiate au e ngaahi lea ʻa ʻEletā Hōlaní pea naʻe toe fakamālohia ange ʻeku fakamoʻoni ki he Palōfita ko Siosefa Sāmitá mo e mālohi ʻo e Tohi ʻa Molomoná.
‘Oku ou houngaʻia koeʻuhi ko e Palōfita ko Siosefa Sāmitá. Naʻá ne ʻomi e Tohi ʻa Molomoná peá ne loto fiemālie ke foaki ʻene moʻuí ko ha fakamoʻoni ʻo Sīsū Kalaisi. Kuó u ʻiloʻi ʻo fakafou ʻi he Tohi ʻa Molomoná, ʻoku ʻi ai ha ʻOtua pea mo ʻEne ʻofa maʻakú.