Faifai Pea Fakahoko ʻEku Misi Ngāue Fakafaifekaú

Jean Daniel Daroy

ʻOniteliō, Kānata

Ne taʻu lahi ʻeku fakaʻānaua ke ngāue fakafaifekau taimi kakató. Kae ʻi heʻeku foki mai ki ʻapi hili heʻeku ʻosi mei he ʻunivēsití, naʻá ku mamata ki hono fuʻu fie maʻu au ʻe hoku fāmilí. Naʻe mahamahaki ʻeku tangataʻeikí, pea naʻe fie maʻu ʻe hoku fāmilí e tokoni fakapaʻangá. ʻI heʻeku hoko ko e lahi taha ʻi ha fānau ʻe toko faá, naʻá ku ongoʻi ai ʻoku totonu ke u nofo ʻi ʻapi ʻo tokoni. Naʻe tāpuakiʻi au ʻaki au ʻe he Tamai Hēvaní ha ngāue lelei. Neongo naʻe ʻikai lahi hono totongí, ka naʻe feʻunga pē ke feau e ngaahi fie maʻú.

Ko e taimi kotoa pē ne fakafehuʻia au kau ki he ngāue fakafaifekau taimi kakató, naʻá ku tali ange te u fakahoko ia. Ka neongo ia, ko e taimi kotoa pē ne u lea ʻaki ení, ne hanga mai ʻeku faʻeé pea fio fakataha pē e fiefiá mo e mamahí ʻi hono fofongá. Naʻá ku ʻiloʻi kapau te u kole ke u ʻalu, te ne tali ʻio peá ne tukulotoʻi pē ʻa ʻene hohaʻa he mole e paʻanga hū mai ʻa e fāmilí.

Hili ha ngaahi taʻu siʻi mei ai, naʻe kole mai ʻe ha lakanga fakataulaʻeiki moʻui taau ke ma mali ʻi he temipalé. Naʻá ku tali ʻio, pea naʻe tāpuekina ʻaki kimaua kimui ange ha fānau ʻe toko tolu—ko ha ongo tamaiki fefine mo ha kiʻi tamasiʻi. Ko e taha ʻo e meʻa naʻá ma fiefia taha aí ʻa e taimi ne mavahe atu ai homa fohá ke ngāue fakafaifekaú. Naʻe fakafonu homau ʻapí ʻe he laumālie ʻo e fiemālie mo e nonga. Ne hangē kuo fakahoko ha konga ʻo ʻeku fakaʻānaua ke ngāue fakafaifekaú.

Naʻá ku fiefia foki ʻi he pehē mai heʻeku taʻahiné naʻá ne fie maʻu foki ke ʻalu ʻo ngāue fakafaifekaú. Naʻá ne ʻomi he uike kotoa pē mei he malaʻe ʻo e ngāue fakafaifekaú ha ngaahi talanoa ʻo ʻene ngāué. Naʻe ueʻi fakalaumālie au ʻe heʻene fakamoʻoní pea fakafonu ʻaki au e laumālie ʻo e ngāue fakafaifekaú. Naʻá ku lotua ha ngaahi faingamālie ngāue fakafaifekau he ʻaho kotoa pē.

ʻI ha ʻaho ʻe taha, naʻe ueʻi au ke u fehuʻi ki ha kaungāmeʻa ʻi he fetalanoaʻaki he mītia fakasōsialé pe te ne fie fetaulaki mo e ongo faifekaú. Naʻá ne talamai, “ʻIo!” Naʻá ku fakafonu ha kaati ʻinitaneti he LDS.org, pea taimi nounou pē kuo kamata akoʻi ia ʻe he ongo faifekaú. Hili ha māhina ʻe tolu mei ai, naʻá ne kau ki he Siasí. Ne muimui mai ai ʻene fānaú hili ha ngaahi māhina siʻi. Naʻá ku fakaafeʻi mo ha ngaahi kaungāmeʻa kehe ke nau fanongo ki he ongo faifekaú, ʻo fakatatau ki he fakahinohino ʻa e Laumālié. ʻI he foki mai ʻeku taʻahiné mei he ngāue fakafaifekaú, naʻá ku ongoʻi foki kuó u fakakakato ʻeku ngāue fakafaifekau māhina ʻe 18.

Naʻe ʻafioʻi ʻe he Tamai Hēvaní e ngaahi holi ʻo hoku lotó mo e meʻa lelei taha ki hoku fāmilí mo aú. ʻOku ou houngaʻia ko ʻEne ʻomi kiate au e holi ke ngāue ko ha faifekaú, ʻa ia naʻá ku tukulotoʻi ʻi ha taimi lōloa.