Moʻui ʻAki ʻEku Ngaahi Tuʻunga ʻUlungāngá
Fai ‘e Becky Craven
Tokoni Ua ‘i he Kau Palesitenisī Lahi ʻo e Kau Finemuí
“Tuʻu ko ha kau fakamoʻoni ʻo e ʻOtuá ʻi he taimi kotoa pē” (Mōsaia 18:9).
Naʻe ʻi he kautaú ʻeku tangataʻeikí, pea naʻa mau hiki holo ʻi ha taimi lahi ʻi heʻeku kei siʻí. Ko e taha ʻo e ngaahi meʻa faingataʻa taha fekauʻaki mo e fehikitakí ko hono tuku hoku ngaahi kaungāmeʻá. Naʻe faingataʻa ke maʻu haku ngaahi kaungāmeʻa foʻou he naʻá ku mā. Kae meʻa mālié, he naʻe anga fakakaumeʻa ʻaupito e tamaiki ʻi he akó mo e Palaimelí. Ne ʻikai fuʻu mahuʻinga ia ʻi he lotú pe ʻoku mau faikehekehe fēfē. Naʻa mau hoko kotoa ko ha ngaahi kaungāmeʻa.
Ko e founga ʻe taha naʻá ku ikunaʻi ai ʻeku maá ko e tokoni ʻi he siasí. Naʻá ku kamata ʻi he Palaimelí. Naʻá ku vahevahe ha folofola ʻi he taimi feʻinasiʻakí. Naʻá ku lau leʻo lahi he lolotonga e kalasí. Ne fakalakalaka siʻi maʻu pē ʻeku ongoʻi loto-falalá. Naʻe tokoniʻi au heni ke u tuʻu maʻu ʻi he meʻa ʻoku ou tui ki aí.
ʻI heʻeku ʻi he kalasi faá pe nimá, naʻe nofo hoku fāmilí ʻi Melileni, USA. Ne ʻikai tokolahi ha kau mēmipa ʻo e Siasí ʻi hoku ʻapiakó. Ne ʻi ai hoku ngaahi kaungāmeʻa ko ha kau mēmipa ʻo e Siasí mo ha ngaahi kaungāmeʻa ne ʻikai ko ha kau mēmipa.
ʻI heʻeku ʻi he toʻu tupú, ne faʻa fai ʻe hoku ngaahi kaungāmeʻá ha ngaahi meʻa naʻe fepaki mo hoku ngaahi tuʻunga ʻulungāngá. Ka naʻe ʻikai ke nau feingaʻi au ke u kau mo kinautolu. ʻOku ou houngaʻia ʻi hono fakaʻapaʻapaʻi ʻe hoku ngaahi kaungāmeʻá e meʻa naʻá ku tui ki aí. Naʻá ku faʻa ongoʻi tuenoa koeʻuhí he naʻe ʻikai lava ke u fai e meʻa kotoa pē naʻe fai ʻe hoku ngaahi kaungāmeʻa he akó. Ka naʻá ku ongoʻi lelei maʻu pē fekauʻaki mo hoku ngaahi tuʻunga ʻulungāngá. Naʻá ku fakakaukau te u moʻui ʻaki e ongoongoleleí, ʻo tatau ai pē pe ko e hā. Kuo tupulaki ʻo mālohi ange ʻeku fakamoʻoní ʻi he Palaimelí mo e efiafi fakafāmili ʻi ʻapí. Kuó u ʻiloʻi ko ha fānau au ʻa e ʻOtuá.
Hili ha ngaahi taʻu lahi, naʻá ku ʻiloʻi kuo kau mai ha toko ua ʻo hoku ongo kaungāmeʻa ʻi he akó ki he Siasí. Naʻá ku fiefia ʻaupito! Naʻá na talamai ne tokoniʻi kinaua ʻi heʻena sio ki heʻeku moʻui ʻaki e ongoongoleleí ʻi heʻemau kei siʻí ke na fakakaukau ke fanongo ki he ongo faifekaú.
Siʻoku ngaahi kaungāmeʻa kei siʻi, ko ha fānau kimoutolu ʻa e Tamai Hēvaní. ʻI hoʻo manatuʻi e moʻoni mahuʻinga ko ení he ʻaho kotoa pē, ʻe faingofua ange ke moʻui ʻaki e ongoongoleleí.