O se Mamanu e Sili Atu le Paia o le Auauna Atu
Saunia e Elder Patrick Kearon
O Le Au Peresitene o le Au Fitugafulu
Mai se faigalotu i le lalolagi atoa mo talavou matutua, “A Hallmark of the Lord’s True and Living Church,” na tuuina atu i le Iunivesite o Polika Iaga–Idaho i le aso 6 o Me, 2018.
Ia tatou mulimuli atili i le Keriso soifua, ma le naunautaiga atili, ma le mataalia atili, ao tatou taumafai e avea ma Ona soo moni e ala i le auauna atu e faapei ona Ia faia.
Ata na tusia e Kelley McMorris
Ina ua 15 pe 16 o’u tausaga, sa ou matuai manatu faapito i o’u lava lagona ma, e pei o le toatele o i tatou i lo tatou talavou, sa le mautonu ma e le faavaea. Sa ou lagonaina lo’u se, le pulea, ma le faaletonu. Sa lei fesoasoani le nonofo mamao lava o ou matua i Saudi Arabia ao ou i ai i se aoga nofotumau i se vaega mamao ese i le talafatai o Egelani. E tusa ai ma le aoga, atonu o le a sili atu ona faafeiloai ia Hogwarts ma Snape.
Sa masani ona leaga le tau i lena talafatai, ae i se tasi taumalulu sa agi se matagi malosi i le salafa o le Vasa Aialani ma ni matagi malolosi faata’uta’u. Pe tusa ma le 5,000 fale na lolovaia, na faasolo ina leai ni meaai, ma sa tuua tagata ua leai se eletise po o ni mea e faamafanafana ai ma faamalamalama ai o latou fale.
Ina ua amata ona fai ifo le lolovaia, sa auina atu i matou e le aoga e fesoasoani e faamama. Na faateia au i le aafia moni lava i sea ituaiga o faalavelave faanatura. Sa vaia ma palapala mea uma. O foliga o tagata sa lolovaia o latou fale sa sesega ma sa paeee. Sa le momoe mo le tele o aso. Sa matou galulue ma tama o le matou aoga, e la’u mea ua matua mamafa i le susu i falealuga ma tautoso kapeta ua faaleagaina.
Ae o le mea na sili ona faateia ai au o le lotogatasi na atiina ae. Sa na o se lagona matagofie, lagona o le agalelei i le va o tagata sa tuufaatasia i se faamoemoe i lalo o tulaga faigata. Sa ou toe manatunatu mulimuli ane o na lagona le mautinoa uma na masani ona faatumulia ai ou mafaufauga talavou sa o ese uma a’o ou auai i lenei taumafaiga tele e fesoasoani i o matou tuaoi.
O le iloaina ai o le fesoasoani i isi o le vailaau lea i lo’u le fiafia, tulaga faavalea ia te au lava ia sa tatau ona suia. Ae e leai, talu ai e lei lava le gotouga ifo o le iloa, ma sa ou toilalo e mafaufau atili loloto i le mea sa tupu. Sa oo mai lena malamalama mulimuli ane.
O Le Valaaulia e Auauna Atu
Atapue o le tina ma le tamateine saunia e Linda Jean Purnell
Na ou mafaufau i lenei mea i le taimi o le konafesi aoao o Aperila 2018 ao ou faalogoina le valaau faifai pea e auauna atu e faapei ona auauna atu le Faaola—ma ia faia ona o le alofa, i le iloaina o i tatou uma o fanau a lo tatou Tama Faalelagi.
O le a tatou auauna atu e le faapea ona ua faitaulia ma fuaina la tatou auaunaga, ae ona tatou te alolofa i lo tatou Tama oi le Lagi ma ua musuia i le taulaiga maualuga ma mamalu atu—fesoasoani ia tatou uo e saili ma tumau i le ala e toe foi atu ai i le aiga ia te Ia. Ua tatou alolofa ma auauna atu i o tatou tuaoi e pei o Iesu pe ana i ai o Ia i lo tatou tulaga, taumafai moni lava ia faaleleia olaga o tagata ma faamama a latou avega. O i o loo i ai le olioli ma aumaia ai le faataunuuina tumau, mo le foai atu ma le e taliaina, ao tatou faasoaina ia fua o le iloaina ma lagonaina o lo tatou taua e le i’u ma le alofa e faavavau o le Atua mo i tatou taitoatasi.
O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga,” na saunoa ai Peresitene Russell M. Nelson. “Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa.”1
Ua ou iloa afai tatou te gauai atu i lenei valaau e auauna atu, ua mafai ona tatou taulai atu i isi nai lo ia i tatou lava; tuputupu ae i le faatuatua, talitonu mautinoa, ma le fiafia; ma faatoilalo lo tatou manatu ifo ia i tatou lava ma le lagona o le gaogao ii ma le faanoanoa e oo mai ai.
O le Auaunaga e Suia i Tatou
O le matagofie o lenei ituaiga o auaunaga e fesoasoani ai i isi, ae e suia ai foi i tatou e ala i le aveeseina o i tatou mai o tatou popolega, fefe, atuatuvalega, ma masalosaloga. I le taimi muamua, o le auauna atu i isi sa na ona aveesea ai i tatou mai o tatou lava faafitauli, ae ua vave ona liua i se mea e sili ona maualuga ma sili ona matagofie. E amata ona tatou iloaina le malamalama ma le toafilemu, e toetoe lava ina a le iloaina. Tatou te toafimalie, mafanafana, ma le gaoia. Ma tatou te iloaina foi se olioli e leai se isi ala e maua ai.
Sa faamalamalama mai e Peresitene Spencer W. Kimball (1895–1985): “O le ola faateleina i tusitusiga paia o le aofaiga faaleagaga e taunuu i ai pe a faateleina la tatou auaunaga i isi ma e ala i le faaaogaina o a tatou taleni i le auaunaga i le Atua ma tagata.” Na ia faaopoopo mai, “O le a avea atili i tatou ma ni tagata taua a o tatou auauna atu i isi—o le mea moni, e sili atu ona faigofie ona tatou “maua” i tatou lava aua foi e tele naua isi vaega o i tatou e tatau ona sailia!”2
O se Valaauga mai le Matai
O Keriso ma le Aufaifaiva, saunia e J. Kirk Richards
Ina ua valaauina e le Faaola Peteru, Aneterea, Iakopo, ma Ioane e mulimuli atu ia te Ia, o le taimi foi lea na suia ai lo latou taitaiga ma le taulaiga: “Sa latou tuua loa lava o latou upega ae mulimuli atu ia te ia.” Mataio 4:20).
Ae ina ua aveesea le Faaola mai ia i latou i se ala aupito mataga, sa latou toe foi ia latou faigafaiva, i mea sa latou manatu sa latou iloa. I se tasi taimi, sa afio atu ai le Faaola toetu ia i latou a o latou fagogota ae leai se ia na maua.
“Ma sa ia fetalai atu ia te i latou, Ina lafo ia le upega i le itu i matau o le vaa, ona outou maua ai lea. Ona latou lafo lea, a ua le toe mafai e i latou ona toso ae, ona o taumafa o i’a.” (Ioane 21:6).
O se faataitaiga lea e leai se mea o Lona mana faapea na aveesea, ae faapea foi se ata mao’i sa sese le mea sa latou vaavaai i ai ma sa taulai atu i le mea sese. A o latou taumamafa faatasi i i’a i le matafaga, sa fesili faatolu le Faaola ia Peteru pe alofa ia te Ia. O taimi taitasi, ma faatasi ai ma se faateleina o le lagona atuatuvale, sa tali atu Peteru e alofa o ia. I le maea ai o tali taitasi a Peteru, sa fetalai atu ai Iesu ia Peteru e fafaga Ana mamoe. (Tagai i le Ioane 21:15–17.)
Aisea na fesili faatolu ai le Faaola ia Peteru pe alofa ia te Ia? Sa valaauina Peteru e mulimuli ia Iesu muamua, sa vave ona ia tali atu, ma sa tuua loa lava lana faigafaiva. Ae ina ua aveesea Iesu mai ia i latou, sa tiga Peteru; ua le maumanatu. Sa ia toe foi i le mea e tasi sa ia manatu sa ia iloa—faifaiva. O lea la ua finagalo Iesu ia matuai faalogo lava Peteru ia te Ia ma ia malamalama i le mamafa o le valaaulia i le taimi lea. Sa Ia manaomia Peteru ia malamalama i le uiga o le avea o se soo o le Keriso toetu o lea o le a le toe i ai o Ia i la le tino faatasi ma i latou.
O le a le mea na finagalo ai le Alii mai ia Peteru? Sa manao o Ia ia Peteru e fafaga Ana mamoe, Ana tamai mamoe. O le galuega lea sa manaomia ona fai. Sa iloa e Peteru lenei valaau le gaoia, tuusao mai i lona Matai, ma sa tali atu le Aposetolo sili, ma le lototoa ma le le fefe e tuuina atu aso o totoe o lona ola i le galuega sa valaauina i ai o ia.
Amata i le Tatalo
O loo i ai se tatou Aposetolo sili i le lalolagi i aso nei. O loo tuuina atu e Peresitene Nelson le valaaulia ia te oe ma a’u e fafaga mamoe a Iesu. Faatasi ai ma faalavefau uma o loo vagaia i tatou ma le tele naua o mea iti o loo tapa la tatou gauai, o le luitau o le tali atu i lenei valaaulia ma galulue—ia faia moni se mea, ia matuai faia se suiga, ma ia ola i se tulaga ua ese.
O lau fesili i le taimi nei e ono faapea, “O fea ou te amata ai?”
Amata i le tatalo. Ua luitauina i tatou e Peresitene Nelson ia, “faateleina lou tomai faaleagaga o i ai nei e maua ai faaaliga faaletagata lava ia.”3 Fesili i lou Tama i le Lagi po o le a se mea e mafai ona e faia, ma mo ai. Tali atu i soo se uunaiga e te mauaina, po o le a lava le itiiti e ono foliga mai ai. Galue ai. Soo se galuega itiiti lava o le agalelei atu e mafua ai ona tatou mafaufau i isi ma oo mai ai ona lava faamanuiaga. Atonu o se feau tusitusi agalelei, e lei faamoemoeina i se tasi. Atonu o se fugalaau, ni nai kuki, po se upu alofa. Atonu o le faamamaina o se togalaau po o se fanua, faia o se tagamea, fufuluina o se taavale, sasaina o le vao, aveesea o le sinou, pe na o le faalogo lava.
E pei ona ta’ua e Sister Jean B. Bingham, le Peresitene Aoao o le Aualofa, “O nisi taimi tatou te manatu ai e ao ona tatou faia se mea silisili ma toa e ‘faitaulia’ ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia.”4
Atonu e te tau musu e faia le la’a muamua, ua e talitonu e leai sou taimi pe e te le mafaia ona faia se eseesega, ae o le a e maofa i se mea e mafai ona fai e sina mea itiiti. Ua faataatia mai e Peresitene Nelson se mamanu e maualuga atu ma sili atu ona paia o le auaunaga mo oe ma au. Pe a tatou tali atu, o le a tatou iloa ai le faamalieloto, saoloto, ma le mafanafana mo i tatou, ma le ala e mafai ai ona avea i tatou o se sui mo le suiga ma le faamafanafanaga i olaga o isi.
I nisi taimi, e pei o le faamaeaina o se misiona, atonu e faaosoosoina i tatou e fai atu, “Ia, ua uma ona ou faia. Tuu atu i se isi e auauna atu. Ou te manao i se malologa.” Ae o le auaunaga moni e le malolo. O se ala o le olaga. E mafai ona tatou faia ni malologa mai gaoioiga masani ma aso malolo ma toe faafouina ai, ae o la tatou tiutetauave faalefeagaiga e alofa i le tasi ma le isi e pei ona Ia alofa mai ia i tatou ma ia fafaga Ana mamoe e leai se malologa.
O Le Auaunaga a le Ekalesia i le Lalolagi Atoa
Atapue o le fomai ma le mai o loo feopoai saunia e Wendy Gibbs Keeler
Ou te mitamita lava i le auai i se Ekalesia e faatinoina le auaunaga. I le 2017 lava ia, e silia ma le 7 miliona itula ofofua atu e tagata lotu i le foai atu mo le totoina, seleseleina, ma le faasoasoaina o meaai i e matitiva ma le tagolima. Na saunia e le Ekalesia vai mama mo le afa miliona ma nofoafaataavalevale mo le 49,000 tagata i atunuu e 41. Na saunia e volenitia ni vaaiga ma auaunaga mo mata, ma na latou aoaoina tagata e tausia e 97,000 mo i latou e i ai luitau i le vaaiga i atunuu e 40. E tolusefulu-tolu afe tagata e tausia sa aoaoina i le tausiga o tina ma pepe fou i atunuu e 38. Ae le taua ai Lima Fesoasoani, i tausaga talu ai, e faitau selau o afe o tatou tagata na foai atua le faitau miliona o itula. O tagata o le Ekalesia a Iesu Keriso e feosofi vave lava e fesoasoani ia i latou na aafia i faalavelave tetele ma laiti, e faapena foi ona latou faaleleia o latou tuaoi ma nuu.
O le galuega taimua folafolaina a le Ekalesia o le JustServe, lea e lisiina ai avanoa auauna atu, ua i ai le silia ma le 350,000 volenitia ua lesitalaina, o e na foai atua le faitau miliona o itula e fesoasoani ai i o latou nuu i le lotoifale.5
O le Ekalesia lenei o faatinoga. O le mea lenei matou te faia. O le mea lenei tou te faia. Ia avea lenei mea ma se uiga iloga o lou lava tagata.
Ituaiga e Tolu o Auaunaga
Ou te fia faamamafa atu ituaiga e tolu o auaunaga lautele e tofu maua e i tatou le avanoa e punouai ai.
1. O le auaunaga e tofia tatou i ai pe valaaulia e faatino o se tiutetauave i le lotu. O le a tatou taumafai mo le ituaiga o auaunaga e faatauaina, ae le fuaina, lea tatou te mafaufau e uiga i ai, tatalo mo, ma fesoasoani ia i latou ua tuuina mai le tiutetauave tatou te vaaia.
2. O le auaunaga tatou te filifili e faia i la tatou lava filifiliga. O se faalautelega lea o le muamua, lea o le a tafe atu ia tatou faatinoga i aso taitasi ma fegalegaleaiga a o tatou saili atili ma le loto e faagalo i tatou lava ae vaavaai atu i talaatu i isi. E leai se tofiga aloaia, ae e faaosofia i tatou e se manao e mulimuli ia Keriso, e amata i le sili atu le agalelei ma le manatu ia i latou o vagaia i tatou.
3. Auaunaga Lautele. O mea e talafeagai ai, faaaofia ai oe lava i tulaga faaupufai ma se faamoemoe e auauna atu ma fausia tagata taitoatasi ma nuu. Aloese mai fevaevaeaiga faaupufai ia e oo ina fai faamalosi ma faatuiese, ma faataumaoia ai nuu, atunuu, ma konetineta. Auai faatasi ma isi au faipolotiki o e o sue se faamoemoega lelei e aumaia ai le faamalologa i olaga ua mafatia i o latou lava loto ma talaatu. E mafai ona avea oe ma leo o le faapaleniina ma le faautautaga, lagolagoina le le faaituau i tulimanu uma o le sosaiete. E i ai se manaoga tuputupu ae mo oe e tuuina atu ai lou malosi i lenei ituaiga gaoioiga faitele.
E Mafai Ona Tatou Suia lo Tatou Lava Lalolagi
Pe a tatou faitauina talafou, atonu tatou te manatu ua faateleina le leaga o le lalolagi. Afai tatou te taitasi ma galulue i ala tetele ma laiti i aso taitasi, e mafai ona tatou suia lo tatou lava lalolagi ma i latou o siomia i tatou. A o e auauna atu i lou tuaoi ma auauna atu faatasi ma lou tuaoi i lou nuu, o le a avea oulua o se uo e fefaasoaai o oulua manao e fesoasoani atu. O le a avea na ma faauooga malolosi, e fauina sootaga o aganuu ma talitonuga.
Afai o le a outou tali atu i le valaaulia e auauna atu e pei ona faia e Iesu, o le a outou liua, avea atili ma e le manatu faapito. O le a outou mauaina le olioli lea e sau mai le auauna atu i le ala a le Faaola, tuua o outou popolega ma le mautonu ma faanoanoaga lea e sau mai ou manatu le atoatoa.
Atonu, e oo mai i le mafaufau se igoa po o se mafuaaga. E foliga mai o se valaaulia lea mai le Agaga, ma atonu na e mauaina muamua. Aapa atu, vaavaai atu, ma siitia i luga. Ia filifili e tali atu i lenei valaaulia, ma tatalo i le aso ia iloa mea e mafai ona e faia. Pe a e vaai ma lagona ia faamanuiaga e aumaia e lenei mea ia te oe ma i latou e te auauna atu i ai, o le a e manao ia avea o se mamanu i aso taitasi.
O la tatou taumafaiga aupito maualuga ma aupito sili o le faasoa atu o le malamalama, faamoemoe, olioli ma le faamoemoega o le talalelei a Iesu Keriso i fanau uma a le Atua ma fesoasoani ia i latou ia maua le ala i le aiga. O le fesoasoani atu, auauna atu, ma le auaunaga ia i latou o faaaliga ia o le talalelei i lona faatinoga. A o tatou faia lea mea o se ala o le olaga, o le a tatou iloa ai e tulagaese le faamalieina, ma o le ala lea e mafai ai ona tatou maua le filemu ma le olioli atonu tatou te lei mauaina muamua.
O le ala lea sa soifua ai le Faaola, ma o le mafuaaga lea sa Ia soifua ai—ia aumaia le pulupasama atoatoa ma le faamalologa sili e ala i Lana meaalofa togiola sili, e le i’u, mo oe ma a’u. Ia tatou mulimuli atili i le Keriso soifua, ma le naunautaiga atili, ma le mataalia atili, ao tatou taumafai e avea ma Ona soo moni e ala i le auauna atu e faapei ona Ia faia.