Autalavou Matutua
Afai Na Vave Uma Lau Misiona, Aua Le Fiu
E alaala le tusitala i Iuta, ISA.
O lou taua e le faaitiitia e ala i lou vave foi mai i le fale mai i lau misiona.
Ata na tusia e David Green.
Afai o loo e faitauina lenei tusiga, atonu ua uma ona e iloaina le lofituina ma le faigata e mafai ona oo i ai i le vave foi mai i se misiona. O talavou matutua o loo auauna atu atonu e oo i ai se manua faaletino, tulaga tau soifua maloloina faalemafaufau, faalavelave faafuasei, tulaga i le agavaa, faafitauli matuia ma isi, po o le le usitai i tulafono a le misiona, ma mafua ai ona tuua vave la latou misiona ae lei oo i la latou taimi e foi ai.
Po o le a lava le mafuaaga, e le finagalo le Atua e avea lenei mea o se papupuni e tuua ai soo se tasi o Ana fanau ua pipili faaleagaga. E faapefea la e faifeautalai ua vave foi mai ona mafai ona agai i luma mai lea ituaiga o suiga faigata? Ma e faapefea e matua, taitai o le Ekalesia, ma e pele ona fesoasoani?
O Se Faifetautalai o le Tusi a Mamona
O se tasi tala mai le tusi a Alema ua tuuina mai ia i tatou se faataitaiga aoga. O le perofeta sa Nifae o Alema na taitaia se misiona i sa Sorama amioleaga, na faatasi ai ma ni tagata faatuatua. O se tasi o nei tagata, o lona atalii o Korianetona, “sa e tuu le galuega, ma e alu atu i le laueleele o Sairona e i totonu o tuaoi o sa Lamanā, i le fafine talitane o Isapela” (Alema 39:3). O le taunuuga, na aoaiina ma le malosi e Alema Korianetona ma valaauina o ia ia salamo, ma faapea atu, “Ou te le fia taua pea au solitulafono, e laga ai i luga lou agaga, pe a na ua le mo lou lelei” (Alema 39:7).
Na taliaina e Korianetona le aoaiga a lona tama i le lotomaualalo, salamo i ana agasala, ma toe foi e auauna o se faifeautalai i sa Sorama e “tau atu le afioga ma le faamaoni ma le mamalu” (Alema 42:31). O loo faapea mai le tala ina ua uma ona talanoa atu Alema i ona atalii, “sa oo ina o atu atalii o Alema [o Sipelona ma Korianetona] i totonu o le nuu, e talai atu le afioga ia te i latou” (Alema 43:1).
Foi Mai ma le Mamalu
O a ni lesona tatou te aoao mai lenei tala? Muamua, o se faifeautalai e tuua vave—e oo lava i ni mafuaaga e mafai ona taofia—e mafai lava ona ausia ni mea maoae. Atonu na faia e Korianetona ni measese matuia, ae na ia alu atu pea e faataunuu se galuega sili. E faapena foi, e oo lava i faifeautalai na toe vave foi mai o se taunuuga o a latou lava faatinoga e le tatau ona lagonaina e pei ua latou faaleagaina lo latou malosi faaleagaga. Na aoao Korianetona mai ana measese ma na fausia le malo o le Atua i le tele o auala, ma o lena lava malosi o loo i totonu o tagata uma lava e tusa lava pe o le a le tele o lo latou lagonaina e pei ua latou toilalo.
Lona lua, tatou te aoao le matafaioi taua na faatinoina e isi i se faafouina faaleagaga o se faifeautalai na vave foi mai. Alema—le tama o Korianetona ma le taitai perisitua—na fautuaina Korianetona ma le malosi ae faapea foi ma le toafilemu i lona mafaia ona ausia pea lona malosi faaleagaga. E pei o Korianetona, o taunuuga o le le usitai i se misiona e tatau ona oo mai, ae soo se aoaiga lava e tatau ona faatasi ai ma le alofa, faamagaloga, ma le alofa mutimutivale (tagai Mataupu Faavae ma Feagaiga 121:41-44).
Toe Foi i le Faamalologa
O lenei lava savali o le faamoemoe mo faifeautalai ua vave foi mai o loo faalogoina i le aso. O Marshall, na foi vave mai ona o luitau o le soifua maloloina faalemafaufau ma faaletino, o nisi taimi e lagonaina le faanoanoa mo na faigata uma faalesoifua maloloina ma le le atoatoa patino na taofia o ia mai le avea ma se faifeautalai e atoatoa i le auaunaga. Ae ui i lea, na te lagonaina o lana auaunaga na matuai aoga lava.
“I le avea ai ma faifeautalai, tatou te le atoatoa,” na fai mai ai Marshall. “O loo tatou aafia lava i faaosoosoga; e mafai lava ona tatou agasala.” Ae o ou le atoatoa atonu o mea na e manao Satani ia te oe e taulai i ai—ia lagona e pei o lau taulaga e lei taliaina e le Alii ona o na taimi e lei avea ai oe o se faifeautalai sili.”
E talitonu Marshall e finagalo le Alii i faifeautalai ia iloaina e fiafia o Ia i le auaunaga na latou ofoina atu, e tusa lava pe o lena auaunaga na le atoatoa ona o la latou filifiliga po o tulaga.
Na aoao Marshall e taulimaina ma faamaloloina e ala i le faia o mea uma na ia mafaia e latalata ai i le Tama Faalelagi ma Iesu Keriso.
Toe Foi i le Salamo
O se isi faifeautalai, na auauna atu i Colorado, ISA, na auina i le fale mai lana misiona mo mafuaaga tau aoaiga ma na tape lona igoa mai le Ekalesia, ae na toe papatisoina mulimuli ane o ia. “O le toe foi mai i le fale na faigata,” na ia fai mai ai. “Na ou lagonaina le leiloa ma le gaogao ii. O nisi taimi, o le vaega na sili ona faigata o le sau i le fale o le [mauaina] o le malosi e tumau ai le alu i le lotu, faitau tusitusiga paia, ma le tatalo. O mea faigofie na sili ona faigata.”
Ae na ia maua le malosi i le lagolago a uo ma aiga ma le galue ai ia salamo.
“O le faatuina o sini, feiloai ma lou epikopo, ma le alu i le malumalu pe a ou agavaa o ki na na mafai ai ona latalata i lou Tama Faalelagi,” na ia faaopoopo ai. “Ou te manatua taimi pe a le mafai ona ou feiloai ma lou epikopo pe ausia ni sini; na i ai lava i taimi uma le fili iina, e faaosoosoina au.”
O lona faamalologa na mafai e ala “i le manatuaina pea e i ai sou Tama Faalelagi e alofa ia te au ma e finagalo ia ou fiafia. O le i ai o se molimau i le Togiola a le Faaola ma i le salamo, e mafai ai ona tatou latalata atili i le Atua e tusa lava pe o le a le mamao e mafai ona tatou lagonaina.”
“O le toe tepa i tua i lau misiona,” na ia faaauau ai, ma faatatau i masina na ia auauna atu ai ae lei tutupu mea na auina mai ai o ia i le fale, “Ou te lagonaina pea o se tasi ia o aafiaga sili na ou oo i ai. Na ou aoaoina le tele o mea, ma e ui e lei taunuu i le ala na ou fuafuaina, na mafai pea ona ou vaaia olaga na suia ona o le talalelei. Na ou faia ni measese, ae o lau molimau na matuai faateleina le faatupuina ao ou tauivi e salamo ma tumau ona agai i luma.”
E manao o ia i isi na vave foi mai ona o a latou filifiliga ia iloaina “e le uma ai le lalolagi. O le sau i le fale o se laasaga muamua lea i le salamo. O le taimi lava e te alu ai i lenei faagasologa o le salamo, o le a e mauaina le tele o mea lelei. O lena avega mamafa o le a siitia. E leai se isi lagona sili nai lo le iloaina o loo e i ai i se tulaga lelei i le silafaga a le Atua.”
Alofa ia i Latou na Vave Foi Mai
O nei faifeautalai uma na vave foi mai i le fale ua faamamafaina le taua mo uo ma aiga o faifeautalai ua vave foi mai ia alolofa ma lagolagoina i latou.
“Tuu atu ia i latou le saolotoga,” na fai mai ai Marshall. “Ae ia mautinoa o loo outou latalata ane, aua e mafai ona fai lava si faavauvau. Ia avea ma a latou uo.” E ala i le faalogo atu i le Agaga, e mafai ai ona tatou filifili o latou manaoga ma iloa le taimi e aapa atu ai ma le taimi e faaaloalo ai i lo latou faalilolilo.
“Tau lava o le alofa ia i latou,” ua faaopoopo ai le faifeautalai na auauna atu i Colorado. “Uunaia i latou ia manatua pea le taulaga togiola a Iesu Keriso.”
O le ala e taulima ai e isi faifeautalai na vave foi mai e mafai ona fesoasoani e faia se eseesega i le va o i latou e tuua le lotu i le maasiasi po o le agai i luma ma le faatuatua. E taua, ona, taliaina i latou e aunoa ma le faamasinoina.
E pei o Korianetona, o faifeautalai e vave foi mai e i ai le malosiaga e tulai ae ai mai lo latou tulaga maaleale o i ai nei i ni meafaigaluega maoae a le Alii.
Mauaina o le Faamoemoe i le Fuafuaga a le Atua
Ua faamatala mai e Elder Jeffrey R. Holland o le Korama a Aposetolo e Toasefululua ini upu faamafanafana i faifeautalai na vave foi mai. “A fesili mai se tasi pe na e auauna atu i se misiona, e te fai atu ioe,” na ia fai mai ai. “… Faapelepele le auaunaga na e galue ai. sIa faafetai mo le avanoa na molimau atu ai, na alu atu ai i le suafa o le Alii, na faia ai lena pine o le igoa o le faifeautalai. … Faamolemole, faamolemole aua le mafaufau soo i lenei mea; aua le mafaufau e te le atoatoa pe ua toilalo.”1
Mo i latou na vave foi mai ona o se agasala, manatua nei upu mai ia Sister Joy D. Jones, le Peresitene Aoao o le Peraimeri: “Afai tatou te agasala, e faaitiitia lo tatou agavaa, ae le faaitiitia ai lava lo tatou taua!”2 Ua ia taua faapea o le a fesoasoani mai le Atua ia i tatou e atiae le toafimalie ia i tatou lava i o tatou taimi e sili ona pogisa pe afai tatou te liliu atu ia te Ia.
O le savali mai le Tusi a Mamona, mai faifeautalai na vave foi mai, ma mai taitai o le Ekalesia e tutusa lava: Aua lava le fiu i le faamoemoe, aua o loo i ai pea fuafuaga a le Atua mo oe e sili atu nai lo le mea e mafai ona e mafaufauina. Mo e pele i nei faifeautalai, o lau tali i lo latou foi mai i le fale o le a faia se eseesega tele i le fesoasoani atu ia i latou e faamaloloina ma ausia lo latou malosiaga. Manatua o le Togiola a Iesu Keriso e mafai ona faamaloloina manua uma lava—e aofia ai manua o le vave foi mai se misiona.