Tusi mai se Tuagane Agaalofa
E alaala le tusitala i Iuta, ISA.
Na misia e lou tuagane matua lou aso fanau lona 16 ona sa auauna atu o ia i se misiona. Ae o le fautuaga na ia auina mai ia te au sa o se meaalofa o le a ou faapelepeleina e faavavau.
ATA PUE NA SAUNIA E LE TUSITALA; ATA TUSI SAUNIA E DAVID STOKER
Sefuluono! Oka le taimi o le olaga! “E leai se tasi e mafai ona faia lenei mea na o ia,” na ou mafaufau ai.
O ou matua atamamai na agalelei ma na tuuina mai pea ia te au ni fautuaga lelei. Faatoa uma ona faaipoipo lou uso matua ma siitia ese mai le setete. Na pisi lou tuagane laitiiti i ona popolega faale 11-tausaga. Na i ai ni au uo maoae, ma ou te iloaina na popole lava ma alolofa ou taitai o le Ekalesia ia te au.
Ae o lo’u tuagane matua, o Gary, o lau uo sili lea. Na ou vaai ia te ia i mea uma lava o se talavou. “Soo se taimi lava ou te talanoa ai ia te ia, na sili atu le sao o mea uma,” sa ou fai ifo ai ia te au lava. “Maimau pe ana i ai o ia iinei i le taimi lava lenei.”
Ae e le o i ai o ia. Sa mamao ese lava o ia i Iapani, o loo auauna faamisiona ai.
E ui lava i le misia o Gary, na ou maua lava se aso fanau malie. Na faia e lou tina se meaai o le taeao o le aso fanau masani mo au, ma na ou mauaina ni nai meaalofa ae lei alu i le aoga. O lena po, ma matou o ai ma lou aiga mo se aiga o le afiafi i le pizza ma faaiu ai i le keke o le asofanau. Na iu lava ina ou faatagaina au lava e miti i le ao e uiga i le tafafao faamasani, aveina o se taavale, ma isi mea mananaia o le a ou faia o se 16-tausaga.
Ae ui i lea, o le meaalofa sili na ou mauaina i lena aso o se tusi i le meli. E lei galo ia Gary lou aso e sili ona faapitoa! O le taimi lena e lei i ai ni imeli, o lea e umi lava se taimi e sau ai se tusi mai Iapani i le Vanu o Cache, Iuta, ISA. Sa ou maofa ai i le taunuu tonu mai lava o le tusi i lou asofanau! Na tusia lava le tusi i le lima, lea na sili atu ai le pei lava na i ai lou tuagane faatasi ma au ao ou faitau:
“Mo Merilee:
“Ia, ua oo i lou aso fanau tele, a ea? Ou te matea e te mauaina lenei tusi ua leva ona tea. Ou te le talitonu—ua 16 ou tausaga. E foliga mai sa na o ni nai tausaga talu ai lea na e [faia ai lou pulou laitiiti lanu mumu kaupoe].
“Tumau i le fiafia ma le mama, ma ia iloa e tagata uma lava e taua tele le Ekalesia ia te oe. A e faia lena mea, o le a e le oo lava i se tulaga e te faia ai se filifiliga ao mamafa mai uunaiga a au uo ia te oe. Faataitaiga: I le aoga maualuga, na iloa e tagata uma lava ou te le fia inu pia pe ulaula, e leai lava, o lea e lei valaaulia lava au i se pati e faia ai na mea. Na iloa e au uo ou te le faia na mea. …
“Afai e te faailoa atu i tagata ou tulaga faatauaina, ona tosina atu lea o tagata e tutusa o outou tulaga faatulagaina. Ou te le faapea atu e tatau ona e tau atu i tagata uma lava, ae o faatinoga e leotele. E ese le matagofie o lou agaga, ma e fetaui lelei ma lou igoa. Ma e i ai sou uiga aga malie lelei. Manuia ‘Le Aso Fanau 16 Matagofie!” O le fuaiupu mulimuli na vase lalo i le lanumumu. E leai se isi meaalofa o le aso fanau o le a sili atu! Na ou faitauina ma toe faitauina, seia oo ina ia toe foi mai o ia mai Iapani ma na iu loa ina mafai ona ma talanoa faatasi faafesagai.
Ua leva tausaga talu ona ou maua lena tusi, ae o loo ia te au pea. E tele mea ua sui talu mai lena taimi, ae le faapena lou alofa mo lou tuagane. O le aso ua ou lagolagoina ai o ia e le gata o se tagata ma se uo, ae o Elder Gary E. Stevenson o le Korama a Aposetolo e Toasefululua. O le fautuaga ua ia ofoina mai o se molimau faapitoa o Keriso i le lalolagi atoa o se malosi faaopoopo lea i lou olaga, e pei lava o le tusi na ia auina mai ia te au i lou aso fanau lona 16.