Laasaga e Ono e Maua ai se Galuega

Saunia e Bruno Vassel III

O loo alaala nei le tusitala i Iuta, ISA.

E le mafai ona tatou ola tutoatasi faaletino pe afai tatou te manaomia se galuega ae leai se galuega. O laasaga nei e ono e maua ai se galuega.

man looking up at ladders — Faatasi ai ma ni nai avanoa o galuega i ou luma, o a isi laasaga e faia ia maua ai le galuega lena e sao mo oe?

E te manaomia se galuega po o se galuega e sili atu? E te iloaina se tasi o loo manaomia? O le luitau i le aso mo le tele o tagata ua matuai manaomia lava se galuega po o se galuega e sili atu e faapea latou te masani ona le mautinoa pe faapefea ona maua le galuega latou te mananao ai. Latou te fesili mai, “Pe ou te tusia sou talaaga, tuu au lava i le initoneti, pe o mea uma na, ae faapefea ona fai?” “O le a le ala sao e tali ai fesili e pei, ‘O a ou vaivaiga?’ ma ‘Aisea e tatau ai ona ou faafaigaluegaina oe i lenei galuega?’”

O lenei tusiga e faasoa atu ai se fuafuaga ua faamaonia o laasaga e ono o mea e tatau ona e iloa ona faia lea ia maua ai le galuega e te manao ai. O nei laasaga e ono e faavae i se vaega i taunuuga o se suesuega na ou faia i le faatinoga o le faafaigaluegaina o tagata faigaluega e 760 ia na faafaigaluega i le Iunivesite o Polika Iaga. Na atiina ae foi nei laasaga mai faamatalaga na ou maua mai le faafaigaluegaina o ni tagata faapitoa ma ua silia ma le 30 tausaga o galulue ma faia ni aoaoga na ou tuuina atu i ni tagata i le silia ma le 20 atunuu. Mulimuli ane, na ma auauna atu talu ai nei ma lau ava o ni faifeautalai matutua na tofia e faia le Auaunaga o le Ola Tutoatasi i Europa atoa. O o matou aafiaga na faamalosia ai i matou faapea o tagata o loo sailia ni galuega e manaomia lenei fesoasoani faapitoa. Po o fea lava o loo e nofo ai i le lalolagi, po o a ou tomai tau galuega, po o le a le tulaga o le galuega e te manao ia maua, o nei laasaga e ono e mafai ona fesoasoani ia te oe.

O lenei faagasologa o le mauaina o le galuega e te manao ai e mafai ona alu ai ni nai aso i ni vaiaso po o ni masina foi. Ae o le tala fiafia e faapea o lenei faagasologa e aoga. O nei laasaga e ono e mafai ona fesoasoani i tagata saili galuega i tulaga uma lava e fetaui i se tasi o vaega nei e tolu:(1) o i latou o loo saili mo la latou galuega muamua lava, (2) o i latou e mananao e see atu i se isi galuega pe siitia i totonu o le latou kamupani po o le faalapotopotoga o loo i ai nei, ma (3) i latou e mananao e see atu i se tulaga i se isi faalapotopotoga.

Laasaga 1. Faailoa le galuega faapitoa e te manao ai nei.

E tatau ona e faailoa se galuega moni e mafai ona e faia i le taimi nei, e fetaui ma ou tomai faalegaluega, tulaga faalegaluega, mea ua ausia, po o le aoga. O le taimi lava e te filifili ai, tusi i lalo le igoa o le galuega. Afai e te manaomia se fesoasoani, e tele polokalama ua lisiina ai le tele o igoa o galuega eseese ma faamatalaga. Mo le laasaga 1, e te le manaomia le sailia o se galuega o loo avanoa; na o le faailoa lava o le ituaiga galuega e te agavaa ai ma e fiafia i ai.

O measese tetele lava e lua e faia e le au sue galuega o le le filifilia o se galuega patino latou te mananao moni ai lava po o le filifilia o se tulaga latou te le o agavaa i ai. Afai e te le o mautinoa po o le a le galuega patino e sailia ma tulimatai i ai, ona e ono iu lea i le le mauaina lava o se galuega. O le faapea, “E na ona ou manaomia lava o se galuega, soo se galuega lava” e le aoga. O le faia o lea faaupuga e le fiafia ai pule o galuega ma faaleagaina ai au lava taumafaiga e saili se galuega. O lea la, ia filifili se galuega faapitoa e mafai ona e faia nei, ona taulai atu lea i lena galuega.

Laasaga 2. Sue le faamatalaga mo le galuega e te manao ai.

O le sailiiliga na ou taitaia i le 760 tagata pule na faafaigaluegaina tagata i le Iunivesite o Polika Iaga ma le tele o tausaga o le poto masani faalegaluega i le tele o atunuu na faaalia ai o tagata e filifilia ma pule e faafaigaluegaina tagata e toetoe lava i taimi uma e mafaufau i na o sui mo se galuega faapitoa e i ai tomai sao e fesootai ma le galuega, poto masani, na ausia ni tulaga lelei, po o aoga mo lena galuega. E matua moni lava lena mea mo i latou o loo i tulaga i le ogatotonu-ma le pito-i luga. Ao latou filifilia ma le faaeteete sui na talosaga mai, o nei tagata e faaaoga se otootoga po o se lisi e taua o se faamatalaga o le galuega e manatua ai mea e sili ona manaomia mo galuega taitasi o loo avanoa. O le tagata e filifilia le tagata faigaluega e faatusatusaina uma tagata talosaga i le faamatalaga faapitoa o lena galuega.

E tatau ona e sailia le faamatalaga o le galuega o loo e manao ai. O le a fesoasoani ia te oe e filifili ai pe o oe moni lava o se sui lelei mo lena galuega. O le a fesoasoani foi ia te oe e filifili ai le tala e fai atu ma aua le fai atua e uiga ia te oe lava ia i lau talaaga, i tusi talosaga, ma i faatalanoaga ma pule. E masani lava ona lisiina e pule le faamatalaga o le galuega mo galuega taitasi o loo avanoa i la latou uepisaite, i nusipepa, ma i uepisaite mo le sailia o galuega. O tagata o loo galulue nei e iloaina le galuega atonu e mafai foi ona tau atu ia te oe se mea e uiga i le faamatalaga o le galuega o loo avanoa ma mea e manaomia.

O lau galuega i le laasaga 2 o le sailia lea o mea faapitoa ua lisiina i le faamatalaga o le galuega mo le galuega e te manao ai. Ona e faaaogaina lea o lena faamatalaga autu i laasaga 3–6.

Laasaga 3. Faailoa ou tomai, poto masani, taunuuga o galuega, ma le aoga lena e fetaui i le galuega na e filifilia.

O i e mafai ai ona e faailoa ou lava tomai patino ma mea na ausia faalegaluega e faaalia ai o lou tulaga e fetaui tonu lava ma mea e manaomia o le galuega e te manao ai, e pei ona faamatalaina i le faamatalaga o galuega na e maua i le laasaga 2.

Ao e faia lenei lisi o ou tomai faalegaluega ma mea na ausia, o le a e mafai loa ona faatusatusa lou tulaga faalegaluega ma agavaa autu o faaalia i le faamatalaga o galuega na e maua i le laasaga 2. Afai o lau lisi e faaalia ai o ou tomai e fetaui lelei lava ma manaoga o le galuega na e filifilia i le laasaga 1, ona see atu loa lea i luma i laasaga 4–6. E ui i lea, afai o ou tomai ma mea na ausia na e lisiina i le laasaga 3 e le fetaui lelei ma le faamatalaga o galuega na e maua i le laasaga 2, ona tatau lea ona e matuai mafaufau e filifili se isi galuega e taulai i ai i lenei taimi, se galuega e sili ona fetaui ma ou tomai o i ai nei ma gafatia.

Laasaga 4. Tusi se talaaga fou e tasi-pe lua itulau.

O se faamoemoega autu lava o lou talaaga, e taua foi o se lisi faapitoa, o le mauaina lea o se faatalanoaga ma le tagata e filifilia pe faafaigaluegaina lea o loo sailia se tagata e faatumuina o le avanoa. E faia e lau talaaga lenei mea e ala i le faaalia puupuu i le tagata e faafaigaluegaina tagata ou tomai faalegaluega, poto masani, mea na ausia, po o le aoga e fetaui ma le mea o loo tau mai e le faamatalaga o galuega a le pule o uiga e sili ona taua o se sui tonu mo lena galuega.

O le talaaga e te tusia mo galuega o loo avanoa a pule eseese taitasi e tatau lava ona faafouina. E te le tau suia le faamatalaga faafuainumera autu lava lea e tasi o le a e tusia i au talaaga uma lava, e pei o lou talafaasolopito faalegaluega, au faamatalaga o le aoga, ma lau telefoni o i ai nei. O na faamatalaga o le a tutusa lava i au talaaga uma lava. Ae afai e te talosaga mo se galuega e sili atu ma le tasi le pule, o pule taitasi o le a i ai se ala ese pe matuai ese lava le faamatalaga o galuega mo la latou galuega. O le mea lea, e tatau ona e filifili po o fea o ou tomai ma mea na ausia e talafeagai ma faamatalaga o galuega taitasi. Tusi na mea i lau talaaga o ni faamatalaga e fetaui lena e amata i se veape faamatala, e pei o le “na suesueina,” “na atiina ae,” “na fausia,” “na puleaina,” ma isi foi.

Mo se faataitaiga, afai na i ai sou poto masani i fefaatauaiga ma le maketiina ae na e talosaga mo ni galuega se lua eseese—o le tasi e taulai atu i fefaatauaiga ae o le isi i le maketiina—ona e atiina ae lea o ni talaaga se lua, o le tasi e faasoa ai le tele o au gaoioiga faalefefaatauaiga ma mea na ausia ma gaoioiga. (Afai e le o i ai se tele o lou poto masani i le taimi nei, asiasi i le lds.org/go/71939 e aoao ai pe faapefea ona faaaoga le poto masani mai lau auaunaga i le Ekalesia i lau talaaga.)

Laasaga 5. Saili pule o loo faafaigaluegaina nei tagata mo le galuega o loo e manao ai.

E i ai lava galuega e avanoa ia faatumuina, e oo lava i taimi faigata. O tagata faigaluega e litaea, sui galuega, siitia tulaga, pauu i lalo, pe siitia ese foi. Ma e i ai lava pea ni pisinisi ua faatupulaia ma e manaomia nisi tagata faigaluega. O nei tulaga uma lava e taitai atu i galuega ua avanoa na e manaomia le faatumuina e ni tagata agavaa. O nisi taimi e tupu lenei mea i ni vaega laiti ma o nisi taimi i ni vaega tetele o galuega avanoa ia faatumuina. O lea aua le lotovaivai pe afai e lei maua lava sau galuega. Tau lava o le vaavaai mo lena galuega mo oe.

Vaavaai i uepisaite o pule o galuega, uepisaite o galuega i tomai faapitoa, faasalalauga o nusipepa, ma isi punaoa mo le galuega e te manao ai. Ma le isi, o le tasi ala sili e maua ai galuega avanoa o le upegatafailagi—faafesootai i le tele o tagata i aso uma, e pei o tuaoi ma tagata o le uarota, tau atu ia i latou le galuega faapitoa o loo e sailia ma fesili atu pe latou te iloa sea galuega o loo avanoa pe latou te iloa se tasi e iloaina sea galuega o avanoa. Ia mautinoa e tuu atu lau telefoni i nei tagata uma lava ao e fesootai i ai i aso taitasi.

Laasaga 6. Aoao ia lelei le faatalanoaga ae lei auina atu au talaaga i pule.

Ae e te lei amata ona auina atu au talaaga ua iloiloina lelei i pule fuafuaina, e tatau ona e aoao muamua ia lelei le faatalanoaga. Ua tele naua tagata e amata ona auina atu talaaga i le vave latou te mafai ai, ae latou te lei saunia ia lelei le faatalanoaga. O le faafitauli i lenei mea e faapea o nisi o nei tagata saili galuega atonu e valaaulia loa lava mo se faatalanoaga. E fiafia tele nei sui, e o atu i le faatalanoaga ae lei saunia lelei i ai, le lelei le faatalanoaga, ma le maua ai loa le galuega. O le taimi lava e te faia ai lenei mea, e le mafai ona e toe foi atu i lena kamupani po o le tagata na faatalanoaina oe ma fesili atu mo se isi faatalanoaga, ma faapea atu o lea ua e aoao nei le ala e tali sao ai i fesili!

O le ala e te tali atu ai i fesili taitasi i le faatalanoaga e taua tele i lou faamanuiaina i le mauaina o le galuega e te manao ai. E ui lava e tatau lava ona e faamaoni atoatoa, e i ai lava auala sao ma sese e tali ai fesili taitasi i se faatalanoaga. O le a fesiligia oe i ni fesili e pei o nei:

O a ou malosiaga ma ou vaivaiga?
O le a se faafitauli na e oo i ai i lau galuega mulimuli o le a e taulimaina nei i se ala ese?
O a ni ou manaoga i le totogi?
O le a se mea o e faamoemoe e fai i le isi lima tausaga?

I le avea ai o se sui e faatalanoa, o le tali e te tuuina atu i fesili taitasi e fesiligia ai oe e tatau ona mafaufauina ma fuafuaina lelei ao lei oo i le taimi. E oo lava i se tali leaga e tasi e mafai ona le maua ai lau galuega. Taulai atu au tali ia pupuu, tasi-i le lua-minute o faataitaiga e faaalia ai o lou tulaga, tomai, ma mea na ausia e fetaui lelei i la latou faamatalaga o galuega. Suesue le faalapotopotoga ae lei faia le faatalanoaga muamua ina ia mafai ona e fuafua ai au tali i o latou manaoga.

I le faaiuga o le tele o faatalanoaga, o le a tuu atu ia te oe le avanoa e fesili atu ai ni nai fesili i le pule. O lau fesili e tatau ona fai atu ia faatatau i le galuega o avanoa. “O a mea e manaomia ona ausia pe suia i lenei galuega?” O lenei mea o le a fesoasoani ia te oe i ni faatalanoaga i le lumanai pe afai e fesiligia oe e toe sau. E mafai ona e sefeina au fesili masani e uiga i sini, tulaga masani o galuega, totogi (sei vagana ua fesiligia ai oe), itula faigaluega, ma faamanuiaga mo faatalanoaga i le lumanai.

Ua i ai nei au laasaga e ono e maua ai le galuega e te manao ai. E le mafai ona e ola tutoatasi faaletino pe afai e te manaomia se galuega ae leai se galuega. Afai e te manaomia se galuega, se galuega e sili atu, pe iloaina se tasi o loo manaomia, faamolemole faaaoga pe faasoa atu nei meafaigaluega mamana, ua faamaonia mo le sailia o galuega. E aoga! Tau ina ia faamanuiaina oe e le Alii i au taumafaiga ia maua le galuega e te manao ai.