“Ua Tatau Ona E Tuua Lenei Nofoaga”
E alala le tusitala i Antofagasta, Chile.
E ui i ou popolega e uiga i le siitia atu i Chile i matu ma lou aiga, na liua le toafa e avea ma o matou laueleele folafolaina.
Ata pue o Concepción, Chile, mai le Getty Images
Ina ua ou faitau i le Tusi a Mamona e uiga i le ala na lagolagoina ai pea e Nifae lona tama tali faaaliga, na ou faaiu ai faapea o le tele o autalavou i le Ekalesia atonu e pei lava o Nifae. Ae ina ua filifili lo matou aiga faapea ua manaomia lo matou siitia atu i le toafa, na ou lagonaina le pei o Lamana ma Lemuelu. Sa ou le fia tuua lou aiga.
E pei o Nifae ma ona uso, o au na “fanaua e matua lelei” (1 Nifae 1:1). O i laua uma na auai i le Ekalesia ao talavou, ma na faatalitali lou tina mo lou tama ao ia auauna atu i se misiona. O i laua o ni tagata toaaga, ma galulue malosi o le Ekalesia.
Ao ou i ai i le aoga maualuga, sa faasolo ina leaga le tamaoaiga i lo matou eria o Concepción, Chile. Na leai ni galuega, ma na amata ona faigata i lou tama ona maua se galuega. Mulimuli ane, na ia amata ona sue galuega i fafo atu o le taulaga.
O lana sailiga galuega na ia oo atu ai i matu i le aai o Calama, i eria eli maina o Chile. O ia o se enisinia faufale, ma na ia maua se galuega lelei iina. Ae sa tuuatoatasi o ia ma na mamao ese. Na faatoa matou vaai ia te ia pe a ia mafai ona totogi le 32- itula e tietie ai i le pasi e agai mai i le fale.
Ina ua mavae ni nai tausaga o le vaaia o lou tama i le na o le faalua pe faatolu i se tausaga, na lagona e lou tina ua oo i le taimi e faia ai se suiga. Na filifili ou matua ua tatau ona siitia atu i matu le vaega o totoe o lo matou aiga.
E Tatau ona Matou Faatasi ma lo Matou Tama
Na leai se faafitauli i lou uso laitiiti i le siitia ese. Ma o lou tuafafine matua, lea na i ai i le kolisi, sa faia se faataitaiga lelei mo a’u.
“O le a ou faaositaulagaina lau aoga,” na ia fai mai ai. “E tatau ona tatou faatasi ma lo tatou tama.”
Na lagolagoina uma e tagata le faaiuga e siitia ese sei vagana ai au. Sa ou manao foi e faatasi ma lou tama, ae ou te le fiafia e faia ni suiga ma ni osigataulaga patino. E i ai au uo, ou te masani i lou siosiomaga, ou te fiafia i lou olaga, ma na ou manao e alu i le kolisi i Concepción. Na ou faia mea uma na ou mafaia e tauanau ai lou tina e le tatau ona matou o.
Mulimuli lava, na ia fai mai, “Atalii, ua tuuatoatasi lou tama. E manao o ia ia i tatou ia faatasi ma ia. Ou te moomoo ia e malamalama, ae ua e matele i le taulai ia te oe lava ia.” Ona ia faamautinoa mai lea o au, “O le a tatou maua ni avanoa iina.”
I totonu o lo‘u loto, na ou iloaina e sao o ia—e ui e lei talitonu i ai lou mafaufau. Sa lei i ai sau molimau malosi i le taimi lea, ae na ou filifili e tatalo pe tatau ona ou alu faatasi ma lou aiga. Na oo mai se tali manino lava ia te au: “Ua tatau ona e tuua lenei nofoaga.” Na ou faanoanoa, ae na ou tau atu i ou matua o le a ou alu.
A o Fea ni Laau?
O Concepción o se nofoaga lanulauvao ma le tele o laau. E maua le 50 inisi (127 sm) o le timu i le tausaga. O Antofagasta, le aai i talaane o Calama lea ua matou siitia i ai, e maua na o le 0.1 inisi (0.25 sm) i le tausaga.
O le mea na sili ona faateia ai au e uiga i le siitia atu o le malaga lava ia. Ao matou malaga atu i matu i le pasi, o le vaaia o le suiga mai le lanulauvao i le lanu enaena na faamomoiloto. Na ou mafaufau, “O fea o i ai laau? O fea o i ai povi i nuu i tua? Pau le mea na ou vaaia o palapala, maa ma tamai mauga.
E mautinoa lava, o Chile i matu o se toafa, o le a la se isi mea ou te faamoemoe i ai? Na faamanatu mai ai ia te au lagona o Lamana ma Lemuelu ina ua tuua e le aiga o Liae le laueleele o lo latou tofi ma agai atu i le togavao.
Sa tele ni mea na ou fefe ai ina ua matou taunuu atu i Antofagasta. O le a le mea e tupu pe afai e le maua ni au uo? O le a le mea e tupu pe afai ou te le masani i le eria? O le a le mea e tupu pe afai e le taunuu ou faamoemoega mo le lumanai?
I le faaiuga, sa le tatau ona ou popole. Na sao lou tina e uiga i avanoa na faatalitali mo i matou—aemaise lava avanoa faaleagaga.
Ae matou te lei siitia atu, sa le avea le talalelei o se mea e faamuamua mo au. O le Alii sa tuu mai i tua. Ae i Antofagasta, na oo mai ni tagata i lou olaga o e na fesoasoani ia te au e vaai i le matagofie o le talalelei. Sa ou mauaina le fesoasoani mai i ni taitai perisitua faapitoa. Na ou faia ni uo o loo tumau pea le pele ia te au. Na matuai suia atoa lava lou olaga faaleagaga.
Ua feiloai Sergio ma uo i le Inisitituti.
Ou te faafetai na ou faalogo i lou tina. Ou te faafetai na tali mai le Alii i lau tatalo. Ou te faafetai na ou maua le lototele e siitia ai i matu ma lou aiga.
O iinei i le toafa na ou faia ai ni suiga na fesoasoani ia te au e avea ma tagata ua ou i ai nei. O iinei na ou tuuto ai e talia le talalelei, auauna atu i se misiona, faaipoipo i le malumalu, ma tuuto atu lou olaga i le Alii. O iinei na ou filifili ai ua ou le toe manao ia pei o Lamana ma Lemuelu.
Mo lou aiga ma au, na liua le togavao e avea ma lo matou laueleele folafolaina.