O Lou Aso Faigaluega Sili Lea!

Saunia e Elder Joni L. Koch

O le Fitugafulu

Pe a e aoao e fiafia ma faatauaina le galuega, e te mauaina foi se punavai sili o le olioli.

I ni nai tausaga talu ai, na ou i ai au lava i se faatasiga i le Kolisi o Churchill o le Iunivesite o Cambridge i Egelani mo se fonotaga faaletausaga mo le kamupani ou te faigaluega ai. I lena faatasiga, na ou maua ai le avanoa e taliaina ai mai le peresitene o le kamupani i le lalolagi ma le Pule Aoao se faailoga mo le matou vaega mo le galuega silisili na matou faia i lena tausaga.

Ao patipati lima o taitai o kamupani mai le lalolagi atoa, o loo sui i tagata faigaluega e 80,000, ma viia le matou vaega mo la matou faailoga, na ou mafaufau, “Atonu o lou aso faigaluega sili lea!” O le lagona i lena taimi na maoae.

Falaoa e Faasoaina

Ae na toe foi i tua lou mafaufau i lou aso muamua i le galuega toeitiiti lava 40 tausaga talu ai. Na i ai se falefalaoa a lou tama ma na taoina ni falaoa e tufatufa atu i tamai maketi e tele i la matou aai i Pasila i saute. Ao ou tamaitiiti lava, ou te tauanauina pea lou tama e ave au i le galuega faatasi ma ia. I se tasi aso na iu lava ina ia fai mai ioe!

Na sui e lou tina se tamai talieleele paepae ma se pulou taofalaoa mo au, ma na ma o loa ma tama i le falefalaoa. Na ma paluina faatasi, ma saunia le paluga, faatulaga le paluga i ni papafalaoa, ma tuu papafalaoa i totonu o le ogaumu piliki. A uma ona tao falaoa, ma te faaaogaina se foe laupapa umi e aumai ai i fafo ma le faaeteete falaoa. Ma te faatalitali mo ni nai sekone, ona ma faasoaina lea o se papafalaoa o loo vevela pea. Sa manaia le tofo i ai!

I le toe tepa i tua, na ou filifili ai o le mauaina o se faailoga i le Cambridge o lau aso faigaluega sili lona lua lea. O le aso faigaluega sili lava ma le sili ona fiafia sa i totonu o se nofoaga e sili atu le maualalo: o se tamai falefalaoa e leai ni tagata matamata po o ni tagata e tutulai ma patipatia. Sa na o au lava ma lo’u tama. O lena aso, na ia aoaoina au ia fiafia ma faataua le galuega ma na fesoasoani ia te au ia lagona le olioli i le faia o se mea mai i se fua i ou lava lima. Na ou aoaoina o le galue malosi e faamalieina ai le tino ma le agaga.

O le Galue o se Faamanuiaga.

Ina ua tau atu e le Alii ia Atamu ma Eva, “E te ’ai foi au mea e ’ai ma le afu o ou mata” (Kenese 3:19), e foliga mai na Ia aoaiina i laua. O le mea moni, na Ia tuuina atu ia i laua le avanoa e oo ai i le olioli ma le lagona o le faamalieina i le ola tutoatasi, o le saunia o mea latou te mananao ai ma mea e manaomia.

O le tele o tatou e vaai i galuega ua na o se ala e tausia i tatou lava ma o tatou aiga ma masalo o se ala e maua ai se tulaga faaagafesootai e ala i le tauaveina o se galuega tulaga maualuga. Ae e sili atu le taua, e finagalo le Atua ia i tatou ia galulue ina ia mafai ona tatou maua ai se lagona malosi o le faamalieina ao tatou faataunuuina galuega, fatuina se mea fou, fausia ma faaleleia i mea ua i ai, ma faaopoopo i ai le taua i le lalolagi o loo tatou ola ai.

I le tautala ai faaleagaga, o le olaga e totonugalemu i le talalelei e aofia ai pea lava le galue. Na saunoa mai Elder D. Todd Christofferson o le Korama a Aposetolo e Toasefululua, “O se olaga faapaiaina e faatumuina i le galue, o nisi taimi e fai soo, o nisi taimi e le manaia, o nisi taimi e le faafetaia ae o le galue e masani lava e faaleleia, faatulagaina, lagolagoina, siitiaina, auauna atu, galue e atiina ae ai ma faaleleia uiga, e foafoa ai le matagofie, ma sailia se mea e maualuga atu.”¹

Ao e tamaitiiti, atonu na fesiligia oe, “O le a lau mea e fai pe a e matua?” I le taimi o lou talavou, o lena fesili o le tele lava ona suia i le, “O le a le mea o le a e suesueina i le kolisi?”

Fiafiaga, Mamalu, ma le Faamoemoega

Po o le a lava le galuega e te filifili e taliaina, po o le a lava le ituaiga o galuega e te iu i ai, saili ia faia lau galuega ma le fiafia, mamalu, ma le faamoemoe. E manaomia lou galue malosi ma taumafai e le aunoa e ausia ni taunuuga silisili. O le i ai o lenei uiga i galuega o le a fesoasoani ia te oe ia e maua ai le saogalemu le tumau, faalelagona, ma le faaleagaga malupuipuia. O le avanoa e galue ai o se faamanuiaga mai le Alii. Ao e aoao e faafetaia ma fiafia e galue, o le a e maua le fiafia ma le faamoemoe lena e oo mai le ola tutoatasi.

O loo mafai pea ona ou faalogoina le patipati ma upu faamalosiau mai le au matamata i le Iunivesite o Cambridge, ae e sili atu le pele ia te au o le manatua lea o lou aso i le falefalaoa ma lou tama ma le manogi o na papafalaoa ao latou o mai i fafo mai le ogaumu.