O Atatosi o le Faatuatua
Iona Wikaira
Kaikohe, Niu Sila
E fiafia Iona i le taaloga o le waka ama—o se upu Niu Sila mo le tuuga paopao. E fiafia Iona ia i ai i le vai, ma mamao mai le vevesi o le galuega.
E ui lava ina feagai o ia ma luitau i le avea ai o se leoleo falepuipui, e maua lava e Iona le malosi ma tumau pea lona mafanafana e ala i le faatuatua ia Iesu Keriso.
Christina Smith, pue ata
Sa ou galue o se leoleo i le falepuipui mo le fitu tausaga. Na ou galue i le falepuipui o tamaitai mo le tasi le tausaga; ona siitia lea o au i se falepuipui na o alii-uma lava lea na ou galue ai mo le ono tausaga talu ai.
O se tasi o tala faamomoi loto mai lou taimi o se leoleo falepuipui o le taimi na ou vaaia ai se tina ua toe faatasia ma lana fanau. E lei vaai o ia i lana fanau mo le fa pe lima tausaga. Na mafai ona e vaaia i mata o tamaiti i loimata ma le tiga mai i tausaga o le valavala ai. Na lofituina le toefaatasia, ae i le avea ai ma se leoleo falepuipui, e te le faaalia ni lagona. Na faigata tele lena mea ia te au. Na ou manaomia moni lava le tilotilo ese ina ia faatoafilemu ai au ma tau seki ai au lava ia. I le avea ai o au lava ia o se tina, e le mafai ona ou vaai faalemafaufau i le toesea mai lau fanau mo ni tausaga ma le le mafai ona vaai ia i latou, talanoa ia i latou, pe faasoa atu foi ou lagona ia i latou.
I le avea ai o se leoleo falepuipui, e tatau ona e malosi. E tatau ona mafai ona e puipuia ma pulea oe lava. O nisi taimi e mafai ona faigata le tulaga, ma e manaomia lou malosi pe a talanoa ma isi. Ae maise lava pe a e talanoa i pagota ma foia luitau ma o nisi taimi o tulaga matautia. O lenei mea e ono faapea ai tagata o au o se tagata leaga, faigata, ae ou te le faapena i taimi uma lava.
Ou te lagonaina e pei o loo siomia au e le lalolagi i le galuega, ae a ou tuua le galuega ma ua i ai i le fale po o le lotu, ou te lagonaina ua ese ona o le agaga ou te lagonaina. O se tasi o fiafiaga o le ola ai i le talalelei e te le tau avea o se tagata o le lalolagi. Ua e i ai i le lalolagi, ae e le tatau ona e faatasi ma isi tagata o le lalolagi.
Ou te fiafia lava pe a oo i aso Sa ona e mafai ai ona ou i ai i le lotu ma maua ai se taumafataga faaleagaga ma manatua lo tatou Alii ma le Faaola, o Iesu Keriso. Ou te fiafia ona e mafai ona ou maua lena mea mo au lava ia. Ou te fiafia e auauna i le Ekalesia ma mea uma ua faia e le talalelei mo tatou.
I se taimi ua mavae, sa avea au o se tagata o le lalolagi, ma na ou aoaoina le tele o lesona faigata. Ou te matuai faafetai lava i le taimi nei ua ou toaga atoatoa ma vae uma i totonu o le talalelei a Iesu Keriso. E masani ona ou moomoo maimau pe ana mafai ona lagona e tagata uma i le galuega le olioli ou te lagonaina o se tagata o le Ekalesia.
Ua ou iloaina afai e iloa e tagata i lau galuega o oe o se tagata o le Ekalesia, o le a latou faaaloalogia oe ma le Ekalesia pe a latou vaai e te le tuua i lalo ou tulaga faatulagaina ona o le siosiomaga o loo e i ai. O le mafuaaga lena e taua ai mo au le taumafai ia avea o se faataitaiga lelei o le Au Paia o Aso e Gata Ai.
I tulaga uma lava, ou te mafaufau, “O le a le ala e finagalo le Faaola ia ou amio ai?” po o “O le a le ala e finagalo o Ia ou te taulimaina ai lenei mea?” I ou aafiaga uma lava, ou te taumafai ia mautinoa o au faatinoga e atagia ai le mea o le a faia e le Faaola. E fesoasoani lenei mea ia te au ia sili atu ai le fai meatonu ma sili atu le toafimalie i vevesi uma lava o se siosiomaga faigata o le galuega.
Ou te faafetai i lou Faaola ma lou Tama Faalelagi mo luitau ma faigata ua mafai ona ou faatoilaloina e ala i le i ai o le faatuatua ma le talitonu ia i Laua. O taimi uma lava ou te oo ai i faigata ae na faia sau tatalo, ou te lagonaina lava pea le filemu i lou loto. Ou te iloa e le mafai ona ou ola e aunoa ma i Laua. Ou te faailoa lava o Laua aao i mea uma ou te faia.