“Pe o le a E Sau i Lou Papatisoga?”
E alaala le tusitala i Kent, Egelani, ma Iuta, ISA.
Na manao Oliva e ee atu mai tumutumu o fale mo Egelani atoa lava ia lagonaina!
“Aua ne’i ‘ino’ino se tasi i lou taulealea; a ia fai oe ma faaa’oa’o i e ua faatuatua” (1 Timoteo 4:12.)
Sa le mafai ona faatali Oliva mo le vaiaso ia vave ona uma atu. O le vaiaso a sau o le aso tele lea na ia faatalitali i ai talu mai lona fa tausaga. O le a papatiso ai o ia.
Na matuai fiafia lava Oliva e uiga i lona papatisoga o lea na ia manao ai e ee atu mai tumutumu o fale mo Egelani atoa ia lagonaina! Sa le mafai ona faatali o ia e tau atu i lana uo o Dylan i le aoga.
“Ou te le talitonu i ai. O le aso o lou papatisoga ua iu lava ina toeitiiti lava oo mai,” na fai atu ai Oliva. “O le a matagofie lava!”
“Faapea a au e na o pepe e papatiso.” Sa foliga le mautonu Dylan.
“E tatau ona le itiiti ifo ma le valu tausaga o tamaiti ina ia papatiso i Le Ekalesia a Iesu Keriso o le Au Paia o Aso e Gata Ai,” na fai atu ai Oliva. “O lau Ekalesia lena.”
“Seki a,” o le tali lea a Dylan.
Na faafuasei lava ona maua se manatu o Oliva. “Pe e te fia sau i lou papatisoga?”
“Ioe,” o le tali lea a Dylan. “Ae sei ou fesili muamua i ou matua.”
“Ua lelei!”
Na fiafia Oliva atonu e sau Dylan i lona papatisoga. O lea na ia toe maua ai se isi manatu. “Ou te le manao e faasoa atu lou papatisoga i le na o le tasi le uo. Ou te manao e valaaulia le tele o tagata ou te mafaia!” Na faavavevave atu Oliva i le fale ma tau atu ia Tina lana fuafuaga.
I le aso Sa anapogi ae lei oo i lona papatisoga, na amata ai le fuafuaga a Oliva. Na ia faasoa atu lana molimau i le pulelaa; ona ia faapea atu lea, “O le a ou papatiso i le aso Toonai a sau nei, ma ou te manao i tagata uma ia o mai! Pe mafai ona outou valaaulia soo se tasi e te iloaina e le lotu, pe le sau i le lotu, i lou papatisoga?” Sa ia lagonaina ua pei o se faifeautalai. Na ia fiafia moni lava i lena lagona!
I le isi vaiaso na sosoo ai, na valaaulia ai e Oliva uo, tagata o le aiga, ma faiaoga i lona papatisoga.
“O le a tele lava sona taua ia te au pe afai tou te o mai!” na ia tau atu ia i latou.
Ao latalata mai le aso Toonai, ma amata ona mafaufau Oliva pe toafia ni tagata o le a o mai moni lava. Ae a pe afai o le a pisi tele i latou pe le mananao e o mai?
Na ia faia se tatalo puupuu ia i ai lava ni nai tagata na ia valaaulia e o mai. Ona ia le toe popole lea po o ai o le a sau. Sa iloa e ia na ia faia se mea lelei i le na o le valaaulia o i latou. Ma le isi foi, o le mea e sili ona taua e uiga i lea aso o le papatisoina.
Ina ua ia taunuu atu i le lotu i le aso o lona papatisoga, na tau le talitonu mata o Oliva. O le tele lava o ana uo na i ai iina e lagolagoina o ia. Na ia vaaia foi nisi tagata e le masani ai. Na ia talo atu ina ua savavali mai Dylan ma ona matua i totonu.
Ina ua oo i le taimi e papatiso ai, na laa atu Oliva i totonu o le vai mafanafana. Na uu atu lona lima e lona tama, e pei ona la faataitaia. Ona ia faia lea o le tatalo puupuu o le papatisoga ma tuu ifo Oliva i totonu o le vai. Na vave lava, ona toe tu i luga Oliva—ua susu uma ao ataata. Na ia iloaina sa ia mulimuli i le faataitaiga a Iesu.
Ina ua uma ona sui Oliva i ni ofu mago, na faamauina e lona tama ma isi alii o ia o se tagata o le Ekalesia ma tuuina atu ia te ia se faamanuiaga faapitoa, lea na latou valaaulia ai o ia ia talia le meaalofa o le Agaga Paia. Mulimuli ane, na fesili atu Oliva pe mafai ona ia faasoa atu lana molimau.
“Faafetai tele lava mo le o mai e lagolago au i lou aso faapitoa. E taua tele ia te au,” na fai atu ai Oliva. “Ou te faafetai mo lou papatisoga, ma ou te talitonu o le Ekalesia lenei a Keriso i le lalolagi.”
Mulimuli ane, na o mai tagata e faamalo ia Oliva.
“Faafetai mo le valaauliaina o au!” Na fai atu ai Dylan. “Na ou maua se lagona manaia lava i totonu.”
“Na agalelei tagata uma lava!” Na fai atu ai le tina o Dylan. “Na matou lagonaina le taliaina lelei.”
O lena po, na saofai ai i lalo Tama i le pito o le moega o Oliva. “Oka se aso manaia!” Na fai mai ai Tama.
Sa luelue atu le ulu o Oliva. “Ou te fiafia na mafai ona ou faasoa atu i au uo.”