Pe a Tiga Tele le Piimau

Jeff Borders

Uosigitone, ISA

I se tasi aso vevela lava o Iulai, na ou fesoasoani ai i lou uso-faaletulafono e fausia se pa puipui. O lenei galuega na iu ina ou tauivi ai ma ni aa o se vine o loo fua [cherry] na faalavelave i le auala.

“Faigofie,” o lou mafaufau lea.

Na ou ao mai meafaigaluega talafeagai ma eli faataamilo i aa ia maua ai se avanoa e galue ai. Ona ou uu mai lea o se ili ma, e aunoa ma se isi manatu, ma amata loa ona tatipi aa. Na faigofie ona tatipi aa laiti, ae ina ua ou see atu i aa lapopoa, na vave lava ona ou iloaina na le tutusa le faigofie. E tasi le aa na faapitoa lava le faigata.

Na u ou nifo, ua ou saunia e tipi lena aa. Na tafe ifo le afu i lalo o lou ua mai le la aasa i luga ae o lou ulu ao ou oomiina mau le ili. Na tete le ili seia oo ina tetete lou tino atoa. Na mafai ona ou lagonaina lou lima taumatau—lea o loo oomiina le ki o le ili—ua amata ona mu i le tiga. Na ou le amanaiaina le tiga ma faaauau ona piimau.

Na iu lava, ina tipi e le ili le aa. Na ou faamamuluina le ki ma lagonaina le fiafia matagofie o le manumalo. E ui i lea, ao ou aveeseina lau totinilima, na ou iloaina se tamai vaega o le pau ua mafoe mai lou lima.

A o ou mafaufau e uiga i lenei aafiaga, sa ou iloa ai o lo’u piimau i le ili na, i se ala, na pei ai o le piimau i le ai uamea. Ua tau mai ia i tatou ia piimau i le ai uamea ao tatou i ai i le olaga. E le faapea o lo tatou piimau i ai o le a tatou le aafia ai i ni taimi o le tiga. Na manua lou lima ao ou piimau i le ili. I se ala faapena, o le a tatou ui atu ai i tofotofoga ma faigata ao tatou faaauau ona piimau i le ai uamea.

Na silafia e le Tama Faalelagi o le malaga e toe foi atu ai ia te Ia o le a tumu i faigata. O le mafuaaga lena ua Ia tuuina mai ai tusitusiga paia ma upu a perofeta e fesoasoani ia i tatou. Ao tatou piimau i nei mea e ala i a tatou tofotofoga ma faigata i le olaga faitino, o le a tatou toe foi atu i Lona afioaga i se aso.

Pe a tatou toe foi atu ia te Ia, o le a mafai ona tatou tilotilo i lalo i o tatou lima, ia na piimau i le ai uamea, o nisi taimi e ui lava i le tiga po o faigata. Ma o le a tatou iloa ai o le fesoasoani a le Tama Faalelagi ma e ala mai i le mana togiola a Iesu Keriso, na tatou piimau ai, e ui lava i faigata na tatou oo i ai.