O Aposetolo o Molimau a Keriso—ma e Mafai Foi e Oe!!

Saunia e Heather White Claridge

Mekasini a le Ekalesia

Mafaufau faapea o oe ma se uo o loo aai i le malologa i le aoga. E tau tatala atu e lau uo se lole ae savali mai se tasi ma tuuaia o ia i le gaoia o le lole ma faatonu mai ia “toe faafoi.” Na e i ai faatasi ma lau uo ao ia faatauina le lole, o lea e ui lava i lou fefe, ua e tau atu i lea tagata o lau uo e le o se gaoi.

Molimau Faapitoa

O le tu atu mo le mea moni e pei o lenei e mafai ona taua o le “avea ma se molimau.” I le faataitaiga, o le a avea oe ma se molimau i le uiga lelei o lau uo. E pei lava ona mafai ona avea oe o se molimau mo lau uo, na valaaulia e le Atua perofeta ma aposetolo e avea ma molimau faapitoa o Lona Alo, o Iesu Keriso. O aposetolo “ua auina mai faatasi ma le pule ma tiutetauave faapitoa”¹ e aoao atu, molimau atu, ma auauna atu o ni “molimau faapitoa i le suafa o Keriso i le lalolagi atoa” (Mataupu Faavae ma Feaigaiga 107:23).

E lei leva ona toetu mai Keriso, ae valaaulia Aposetolo e avea ma Ana molimau (tagai Galuega 1:8). Ao e suesue i le Galuega i le Feagaiga Fou, e mafai ona e faitau i le tele o taimi na molimau atu ai Aposetolo faapea o Iesu Keriso o le Alo o le Atua (tagai Galuega 2:36; 5:27–32; 10:36–44). O Aposetolo i aso nei o loo faaauau pea i lenei valaauga o ni molimau faapitoa—tau ina faalogo i soo se konafesi aoao ma o le a e vaai ai i le ala latou te molimau ai ia Keriso.

O le Agaga Paia e molimau ia Keriso

O nisi o Aposetolo i le Feagaiga Fou na i ai faatasi ma Keriso ao i ai o Ia i le lalolagi ma na vaai o afio ae o Ia i le lagi (tagai Galuega 1:9–11), ma o Aposetolo o aso nei atonu na vaai ia Keriso,² ae e le o le vaai tino ia Iesu e avea ai se tasi o se molimau ia te Ia. Na saunoa mai Iosefa Filitia Samita (1876-1972), “[O le Agaga Paia] na o le pau lea o le ala e mafai moni ai e se tagata ona iloa o Iesu o le Keriso ma e moni lana talalelei.”³ O lona uiga, e ui lava atonu na vaai Aposetolo ia Keriso, latou te iloaina o Ia o le Faaola ona na tau atu e le Agaga Paia ia i latou!

E Mafai ona Avea Oe o se Molimau

O le mea e sili atu foi le ofoofogia e folafolaina atu foi ia oe e faapea e mafai ona e iloa o Iesu Keriso o lou Faaola e ala i le Agaga Paia (tagai Mataupu Faavae ma Feaigaiga 46:13). E le o se mea e na o Aposetolo e mafai ona iloaina! E ui lava e le valaaulia oe e avea ma se molimau faapitoa a Keriso, e mafai ona e saili se molimau o Keriso ma avea ma Ana molimau i tagata i lou olaga. E mafai ona e mulimuli i le poloaiga a le Faaola ia Peteru: “Pe a liua mai oe, ona e faamalosi ai lea i ou [uso ma tuafafine]” (Luka 22:32).