Mara le Paionia
E alaala le tusitala i Texas, ISA.
Oketopa 2018, Phnom Penh, Cambodia
Na faamau e Mara lona sakete ma tilotilo i le faaata. Na malie le faia o ofu lotu i se aso Toonai, ae o se aso faapitoa lenei aso Toonai. O le konafesi aoao!
“Pe o e fiafia mo le sauniga a tamaitai?” O le fesili lea a Mak (Tina). Na ia pulumuina faavavevave, ma le faaeteete le lauulu o Mara. “Ou te manao ia e taumafai e faalogo lelei i le mea e te mafaia.”
“Ioe! Talosia latou te faamatalaina ni tala paionia!” Na sili le fiafia o Mara i na tala.
“Atonu o le a latou faia,” na fai atu ai Mak. “Pe na e iloaina o lou tama o se paionia?”
Sa lē mautonu Mara. E lei tosoina lava e lona tama se taavale toso.
“E faapefea ona paionia o ia?” na ia fesili.
Na luelue atu lona ulu agai i le faamalama, agai i le vaitafe. “Sa fagota o ia iina ina ua ia feiloai i faifeautalai. O ia le tagata muamua o lona aiga na papatiso,” na fai atu ai Mak. “Ua avea ai o ia ma paionia! Sei ta o e su’e tinamatua.”
OYiay (Tinamatua) sa faatalitali mai ia i laua i le potu i luma. Na nonofo faatasi uma le aiga o Mara ma ona matuamatutua. Na fesoasoani Yiay e vaai Mara pe a tuua le aoga ao faigaluega ona matua. O lea ua tu Yiay i tafatafa o le uila afi, o le uila afi lapoa e aveina i latou faataamilo i le aai.
“E faatoa 25 tausaga talu ona i ai le Ekalesia i Kemupotia,” na tau atu e Mak ia Mara ao ia tatalaina le faitotoa ma toso atu le uila afi i le auala. “O i tatou uma a la o paionia. E oo foi ia te oe!”
“E faapefea ona ou paionia?” Sa mafaufau ai Mara ao ia oso i luga o le uila afi. Na ave e Mak le uila afi, o Yiay i tua ao Mara i le ogatotonu. Na pipii mau Mara ao latou masau atu i lalo o le auala pisi.
Ao latou pasi atu i se faleaiga, na tumu le ea i le manogi o le lauti. E toetoe lava o tagata uma iinei e inu lauti. Ae le o Mara. Na ia mulimuli i le Upu o le Poto. Na ataata Mara. O se tasi lena o ala e paionia ai o ia!
Ao mimilo atu le uila afi i le pioga, na iloa atu e Mara se wat, o se malumalu Puta. O le tumutumu maai lanumumu na maualuga atu i lo isi fale. Na saofafai ma suesue Monike ma ulu ua selemole i le faapaologa.
Na iloa e Mara o le tele o tagata i Kemupotia o Puta. Latou te le talitonu ia Iesu Keriso. Ae na talitonu i ai Mara. “O le isi ala lena ou te paionia ai,” na mafaufau ai Mara. Ma o le aso o le a ia faalogo ai i le perofeta!
Ao agai atu le uila afi i totonu o le paka a le lotu, na iloa atu e Mara le tele o tamaitai ua taunuu mai. O nisi na savavali pe na tietie foi i uila afi. O isi na taunuu mai i ni tuk tuks, o tamai taavale e toso e se uila afi. O le tele o tamaitai na ofuina ni ofu uumi po o sakete lanutasi, e pei o Mara. O isi na ofuina ni sampots, o ni sakete matagofie uumi e faia ini ie felanulanuai ua mamanuina.
Na nonofo i lalo i le falesa Mara, Mak, ma Yiay faatasi ma isi tamaitai. Na faia moni lava le konafesi i se vaiaso atoa ua tuanai i le Aai o Sate Leki, Iuta, ISA. Ae o lenei o le a mafai e tagata i Kemupotia ona matamata i le faasalalauga i le Khmer. Na tautala Mara i le Igilisi ma le Khmer i le fale, ae na te aoaoina foi le faaFarani i le aoga. Ae o le tele lava o tagata Kemupotia e na o le Khmer e tautatala ai.
O le failauga muamua e lei faamatalaina ni tala e uiga i paionia. Ae o le failauga lona lua na faamatalaina se tala e uiga i le savali i luga o se ala palapala tusao i luga i lona agai atu i le fale mai le aoga. Sa taua o le “auala sopo a tama,” ma o nisi taimi na te aveese ona seevae ae savali i lalo. Sa ia manao e fai mea faigata ina ia pei ai o ia o se paionia! Na ataata Mara ao ia mafaufau e uiga i ala uma lava na avea ai o ia o se paionia.
O le failauga mulimuli o le perofeta. Sa ia tu maualuga. Na faapitoa lava le faalogo lelei o Mara. “Ou te valaaulia outou ia faitau le Tusi a Mamona i le va o le taimi nei ma le faaiuga o le tausaga,” na ia saunoa ai. “O le a matala le lagi mo outou. O le a faamanuia outou e le Alii.”
Na iloa e Mara o le a le faigofie le faitauina o le Tusi a Mamona atoa lava. Sa tilotilo atu o ia i tamaitai na siomia o ia. Na filifili i latou uma lava e mulimuli ia Iesu Keriso. Na o mai i latou uma lava i le po nei e faalogo i le perofeta. O le a ia mulimuli i le perofeta, e pei foi ona latou faia. O le a avea o ia ma paionia!