E Faapefea Ona Tatou Lagolagoina o Tatou Taitai?
I aso o le faatumulia i loimata i le maea ai o le afisasao matautia i tuaoi atoa o California’s Sonoma County ia Oketopa 2017, na malaga ai Elder Ronald A. Rasband o le Korama a Aposetolo e Toasefululua i nuu na aafia ina ia faatasi ma le Au Paia o Aso e Gata Ai.
Sa i ai o ia i se misiona o le auaunaga. Na la faamafanafanaina ma Sister Melanie Rasband ia tagata lotu na aafia i le afi io latou falelotu ma i autafa o o latou fale ua mu.
Ma soo se mea lava na ia malaga i ai, na o mai lava tagata lotu e faatalofa ia te ia. O se faailoga o le lotofaafetai. Na latou faafetai i le Aposetolo mo lana lagolagosua. Ae o lululima taitasi na faafesootaia se lagona masani faapea: “Ou te lagolagoina oe.”
O Se Faatinoga o le Faatuatua
O le lagolagoina o se faatinoga paia lena e fesootai ai tagata o le Ekalesia ma taitai o le Ekalesia, ua saunoa mai ai Elder Gary E. Stevenson. I le silia ma le 16 miliona tagata o le Ekalesia a Iesu Keriso o le Au Paia o Aso e Gata Ai, e na o ni nai tagata lava o le Ekalesia o le a i ai se taimi e talanoa ai faafesagai ma se Aposetolo pe luluina le aao o se Aposetolo. Ae o tagata taitasi e maua le avanoa e faia ai se fesootaiga patino ma nei taitai ma isi foi taitai o le Ekalesia e ala i lana palota lagolago aloaia ma faatinoga o le lagolagoina i aso uma, ua saunoa ai Peresitene M. Russell Ballard, le Sui Peresitene o le Korama o le Toasefululua.
“Tatou te lagolagoina i le siiina o o tatou lima ae faapea foi ma o tatou loto ma a tatou faatinoga,” le saunoaga a Elder Gerrit W. Gong. “Tatou te lagolagoina taitai o le Ekalesia i le ala lava e tasi tatou te lagolagoina ai le tasi ma le isi. Tatou te iloaina ua noatia i tatou e ala i feagaiga.”
O le tatalo mo Aposetolo e tumau pea o se elemene taugata o le lagolagoina, ua saunoa ai Elder Ulisses Soares. “O i tatou o ni tagata masani, ma ua valaaulia i tatou e le Alii i se mea e sili atu i lo tatou gafatia. Ae tatou te lagonaina e mafai ona tatou ausia lena gafatia ona o loo tatalo tagata mo i tatou.”
O le faatuatua e muamua atu ma mulimuli i le lagolagoina, ua faaopoopo mai ai Elder Soares. “E ala i le lagolagoina o Aposetolo, o loo e fesoasoani e faataunuu le galuega a le Faaola. O lou faatuatua e fesoasoani i le Alii e faataunuu mea ua Ia tuuina atu e ala i Ana perofeta ma talifaaaliga.”
“Ou te fiafia i le ata o le siilima i le sikuea ma le uiga o loo i tua atu,” le saunoa a Elder Jeffrey R. Holland. Mo Aposetolo, o le lagolagoina e tagata o le Ekalesia e tutusa lava le faaleagaga i le mauaina o meaai e maua ai le ola, ua ia faaopoopo ai. “E taua leo uma lava ma o lima fesoasoani uma lava e taliaina. E leai se tasi e auauna atu toatasi i le Ekalesia, po o le a lava lo tatou valaauga.”
O se Faatinoga ua Leva
O le lagolagoina o Aposetolo o se faatinoga o aso e gata ai lea e oo lava i tua i le Toefuataiga o le talalelei a Iesu Keriso. Mai le aso muamua, na valaaulia le Au Paia e malilie i le valaauga o taitai o le Ekalesia ma ia lagolagoina i latou i lena valaauga.
I le aso 6 o Aperila, 1830, sa faapotopoto ai Iosefa Samita ma ana uo faatoa uma ona papatiso i se tamai fale laau i le faatoaga a Pita Uitimera le Matua i Feiete, Seneca County, Niu Ioka.
Na tulai Iosefa Samita ma fesili atu ia i latou na auai pe latou te mananao i le faatulagaina o Le Ekalesia a Iesu Keriso o le Au Paia o Aso e Gata Ai.
I le faaaogaina o le mataupu faavae o le finagalo autasi, na sii e tagata lotu fou o latou lima ma malilie e ala i le palota autasi. Ona sosoo ai lea ma lo latou malilie e taliaina Iosefa Samita ma Oliva Kaotui o o latou faiaoga ma faufautua faaleagaga.
“O le auai i le Ekalesia o se mataupu e patino tele,” le saunoaga a Elder Holland. “E taua tagata taitoatasi uma lava. O le mafuaaga lena tatou te galulue ai i luga o le mataupu faavae o le maliega autasi. Matou te mananao ia fai manatu o tagata uma, ia faaleo atu ona lava lagona, ma ia lototasi i le agai i luma.”
O se Faatinoga e Siitia ai i Tatou Uma Lava
Pe a taliaina le valaauga i le tofi aposetolo, e uunaia sui o le Korama a Aposetolo e Toasefululua ia mulimuli i le finagalo o le Alii, ua saunoa ai Elder Dale G. Renlund. E ala i le filifili e lagolago le Toasefululua, e faaalia e sui lo latou talitonuina o le tautinoga a Aposetolo taitasi e usiusitai i le Faaola.
O le Au Paia o Aso e Gata Ai e tuuina atu la latou palota lagolago i se Aposetolo lava ia ua faapea lava ona lagolagoina le Korama tuufaatasi, ua saunoa ai Elder Quentin L.Cook.
O lena palota paia e siitia ma faamanuiaina Aposetolo—ae siitia ai foi i latou e lagolagoina, ua faaopoopo mai ai Elder Cook. “Na te faamanaina i latou ma faamanuiaina i latou ma tuuina atu ia i latou le taitaiga.”
O lona uiga e pei lava o tagata lotu na loloto lava le aafia i afi o Santa Rosa ona ofoina atu le lagolagoina o Elder Rasband, e mafai foi ona siitia tagata i le lalolagi e pei lava ona latou siitia sui taitoatasi o le Toasefululua.