Fakaʻilekitulōnika Pē: Kakai lalahi kei Talavoú
Ko Koé: Ko ha Ngāue kei Fakalakalaka
ʻOkú ke ongoʻi hangē ʻoku ʻikai ke ke feʻunga? Kuo taimi leva ke ke kiʻi mālōlō.
ʻOkú ke faʻa ongoʻi ʻokú ke tōnounoú? Kuó ke fakamoleki nai ha ngaahi houa lahi ʻi haʻo feinga ke tonu ʻaupito ha meʻa, pē toe kovi angé, ʻokú ke fakamoleki ha ngaahi houa lahi ʻo talitali ke kamata ha ngāue koeʻuhí ʻokú ke tui he ʻikai feʻunga hoʻo feingá? Mahalo pē ʻokú ke fekuki mo e feinga ke haohaoa kakató.
Fehuʻi vave pē ʻe taha: ʻoku lolotonga nofo nai ho laumālié ʻi ho sino kuo toetuʻú? Kapau ko ia, loto tauʻatāina ke tukunoaʻi ʻeni. ʻOku ʻikai ha meʻa ʻi heni ʻe fuʻu ʻaonga ke ke lau. Ka ʻo kapau ʻoku ʻikai, ta ko e pōpoaki ko ʻení maʻau. Koeʻuhí ʻoku tatau ai pē ʻa e angatonu hoʻo ngaahi ngāue fakaʻahó (pe ʻikai), tatau ai pē pe ko e hā ho maaka fakaʻavalisi ʻi he akó (GPA), tūkunga fakafāmilí, pe ngāue maʻuʻanga moʻuí, kapau ʻokú ke kei ʻi he moʻui fakamatelié, ta ʻokú ke kei hoko ko ha ngāue ke fakalakalaka.
Fakatatau ʻo e ʻIkai-Ha-Angahalá ki he Moʻui Kakató
Ne tuʻo taha hono akoʻi ʻe Palesiteni Lāsolo M. Nalesoni ha meʻa naʻá ne ako he lolotonga ʻene ako ʻa e tatau moʻoni ʻo e Fuakava Foʻoú ʻi he lea faka-Kalisí mo e liliu faka-Pilitāniá. Naʻá ne fekumi ki ha ngaahi lea fakatātā ʻo e foʻi lea haohaoá.
Ko ha veesi folofola ʻe taha ʻoku ngali fakalotosiʻi ki ha niʻihi ko e Mātiu 5:48: “Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku he langí.” Kae, mahuʻinga angé, ko e tupuʻi lea faka-Kalisí ʻoku ʻikai ʻuhinga ia ke ʻikai ʻi ai ha angahala pe ʻikai ʻi ai ha fehālaaki.
Naʻe akoʻi ʻe Palesiteni Nalesoni ʻo pehē, “ʻI he Mātiu 5:48, ko e foʻi lea haohaoá naʻe liliu ia mei he foʻi lea faka-Kalisi ko e teleios, ko hono ʻuhingá ko e ʻfakakakato.ʼʼʼ1
Naʻe ʻomi leva ʻe Palesiteni Nalesoni ha fakatātā loloto ʻo e moʻoni koʻení: “ʻI he kimuʻa hono kalusefai Iá, ne folofola ʻe [Sīsū Kalaisi] ʻo pehē ʻko e ʻaho hono tolú Te u hoko ʻo haohaoa.’ Fakakaukau ki ai! Ko e ʻEiki ʻoku ʻikai haʻá ne angahalá, ʻikai haʻá ne fehālaakí—kuo ʻosi haohaoa ia ʻi he fakahoa ki heʻetau ngaahi tuʻunga fakamatelié—naʻá Ne fakahā ʻe toki maʻu ʻa Hono tuʻunga haohaoá ʻi he kahaʻú. Ko Hono tuʻunga haohaoa taʻengatá ʻe toki hoko mai ia hili ʻEne toetuʻú.’”2
Ko e Ngaahi Fakatuʻutāmaki ʻo e Feinga ke Haohaoá Kakató
Ko ia aí, ʻoku tau angamaheni ʻaki ke tau faʻa tuku ki he tafaʻakí ʻetau fie maʻu ko ia ʻa e tokoni faka-langí pea tau feinga fononga tokotaha pē mo moʻui ʻikai ha fehālaaki. ʻI he taimi ʻoku tau fakahoko ai iá, ʻoku pau pē ke tau tōnounou.
ʻOku fakamatalaʻi ʻe he kau Saienisi ʻo e ʻUlungāngá ko e feinga ke haohaoa kakató “ko ha hala vave mo faingataʻa fuoloa ia ki he moʻui mamahí.” Pea ʻoku moʻoni ia! Ko e feinga ke haohaoa kakató ko ha tokotaha kaihaʻa ia ʻo e moʻui fiefiá mo e fiemālié. ʻOkú ne kaihaʻasi ho ngeia fakaekitá, ngaohi ho ngaahi feinga lelei tahá ke ke ongoʻi ʻoku ʻikai ʻaupito ke feʻunga, pea malava pē ke ne ʻai koe ke ke feinga taʻetuku ke lavaʻi ha ngaahi meʻa ʻoku lahi ange ʻi he meʻa ʻoku malavá.
Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Ko hotau ʻamanakiʻanga ki he haohaoa moʻoní, ʻe toki maʻu ia ko ha meʻafoaki mei he langí—heʻikai ke tau lava ʻo ʻngāueʻiʼ ia. Ko ia, ʻoku ʻikai ngata pē ʻi hono foaki mai ʻe he ʻaloʻofa ʻa Kalaisí ʻa e fakamoʻui mei he mamahí, angahalá pea mo e maté, ka ʻoku fakahaofi ai foki kitautolu mei heʻetau toutou fakaangaʻi pē kitautolú.”3
To e Kiʻi Angaʻofa Ange Kiate Koe
ʻOkú ke hoko pē koá koe ko ho fili taupotu tahá? ʻOkú ke ʻiloʻi lelei ange ʻi ha toe taha ʻa e founga ke ke tō ai ki he faingataʻá? Sai, tuku ia! Kae, kamata ke fakaafeʻi ʻa e “ʻaloʻofa ʻa Kalaisíʼʼ ki hoʻo moʻuí ke maʻu ai ʻa e tokoni ʻokú ke fie maʻú.
ʻI he māmani hinga ko ʻení, ʻe ʻikai pē ha honge ia ʻi he ngaahi leʻo ko ia ʻoku nau holi ke tala atu kiate koe ʻoku ʻikai ke ke feʻunga ʻi ha faʻahinga tafaʻaki pē. ʻOku ʻikai fie maʻu ke ke kau atu mo koe ki he lisi ʻo e kau fakaanga ko iá.
Kuo taimi ke ke kiʻi fai lelei ange kiate koe. Feinga ke lelei ange, ʻio, kae kātaki muʻa ʻo manatuʻi ʻa e naʻinaʻi meia ʻEletā Hōlaní: ʻʻʻOku ou ʻamanaki pē te tau loto fakatomala mo holi ke fakatupulaki maʻu pē ʻa e anga-māʻoniʻoní ke tau lava ʻo tulifua ki ha taumuʻa ke fakalakalaka ʻi ha founga heʻikai kau ai haʻatau fai ha meʻa ʻe ola kovi ki hotau sinó pe te tau ongoʻi loto mafasia mo holoki ai ʻetau ongoʻi loto toʻá”4
Kapau ʻokú ke pehē ʻoku faingofua ange hono lea ʻakí ʻi hono faí, fakakaukau ke ke kamata ʻaki haʻo ʻahiʻahi fakahoko ia.
Mei he Sitepu ki he Sitepu
Ko hono fakamulitukú, ʻoku fuʻu nounou ʻa e moʻuí ni ke ke ongoʻi hangē ʻokú ke hala maʻu peé. Ne fakamatalaʻi lelei taha ia ʻe Palesiteni Nalesoni: ʻʻʻOku fie maʻu ke tau manatuʻi kotoa: ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefia—kae ʻikai ke nofo loto halaia maʻu pē!ʼʼ5
ʻI hoʻo hoko ko e ngāue kei fakalakalaká, te ke toki maʻu e haohaoa kakató ʻi he moʻui hokó. Lolotonga iá, fai pē ʻa e lelei taha te ke lavá. Te ke aʻu pē ki ai ʻi he tokoni ʻa e ʻEikí pea ʻi he taimi ʻa e ʻEikí.
Ko e ngaahi tāpuaki mo e ngaahi tuʻunga kehe ʻo e tuʻunga fakaākongá, naʻá Ne folofola ai ʻo pehē, “Ko ia ke haohaoa ʻa kimoutolu he ʻoku haohaoa ʻa hoʻomou Tamai ʻoku ʻi he langí” (Mātiu 5:48).
Ko hono fakamulitukú, ko e tangata mo e fefine kotoa pē ʻa e ʻOtuá ʻoku ʻamanaki ke hoko ʻo haohaoa. Ka ʻoku tau kei tangata, pea ʻoku tau kei fakahehema pē ki he angahalá. Ke kei fakatoka ʻa e ʻamanaki leleí ʻi hotau lotó, naʻe akonaki ʻa e palōfita ko Molonaí ʻo pehē kapau te tau “haʻu kia Kalaisi, pea [tau] hoko ʻo haohaoa ʻiate Ia, pea fakafisi ʻa [kitau]tolu mei he anga taʻe māʻoniʻoni kotoa pē, pea ʻofa ki he ʻOtuá ʻaki [hotau] iví, ʻatamaí, mo e mālohí kotoa pē, pea ʻe toki feʻunga ʻa ʻene ʻaloʻofá kiate [kitautolu], koeʻuhi ke tupu ʻi heʻene ʻaloʻofá ʻa [hotau] haohaoa ʻia Kalaisí” (Molonai 10:32). Naʻe palani ʻetau Tamai Hevaní ke tau hoko ʻo tangata, ka ʻoku ʻikai ʻuhinga ia he ʻikai ke tau lava ʻo hoko ko e kau tangata mo e kau fafine ʻa e ʻOtuá neongo ʻetau ngaahi tōnounoú. Pea ʻoku ou houngaʻia foki mo au ai.
Te tau lava pe ʻo hoko ko e kau tangata mo e kau fafine ʻa e ʻOtuá neongo ʻetau toutou humu mo tō ha ngaahi taimi. Ko e meʻa pē ke tau fakahokó ko e fai hotau lelei tahá ke tau moʻui ʻo fakatatau ki he ongoongolelei, pea ʻe tokoniʻi kitautolu ʻe hotau Fakamoʻuí ʻi he toenga ʻo e hala fononga ki he haohaoá.