ʻOku ʻIkai fie maʻu Ke Tatali Maʻu Ai Pē ki ha Tali

Fai ʻe Leah Barton

ʻOku tau faʻa fāinga ke fai ha ngaahi fili ʻi he ʻikai maʻu ha fakapapau mei he ʻOtuá, ka ʻi heʻetau ngaʻunu ki muʻa ʻi he tuí, te Ne tokoniʻi kitautolu ke tau ʻiloʻi ʻoku tau ʻi he hala totonú.

ʻOku nofo ʻa e tokotaha naʻá ne faʻú ʻi Niu Mekisikou, USA.

ʻI heʻeku foki ki he ʻunivēsití hili ʻeku ngāue fakafaifekaú, naʻá ku fakakaukau pe ko hai te u kaungāloki mo iá. Ne fokotuʻu mai heʻeku tangataʻeikí ke u fetuʻutaki ki ha faifekau sisitā naʻe toki ʻosi pē ʻene ngāue ʻi hoku uooti totonú pea naʻá ne toki ʻosi pē ʻene ngāue fakafaifekaú. Naʻá ne fakamahino mai ʻe hiki mai ʻa Holí ki hoku ʻapiakó pea mahalo he ʻikai tokolahi ha kakai ʻokú ne ʻiloʻi ai.

Neongo naʻá ku kiʻi ʻiloʻi ʻa Holi ʻi he taimi naʻá ne ngāue ai ʻi hoku uōtí, naʻá ku veiveiua ke fakaafeʻi ia ke nofo mo au. Naʻá ku ilifia naʻá ne fakakaukau ʻoku matamata kehe ʻaupito koeʻuhí ne ʻikai ke ma fuʻu maheni fēfē—pea ko e tahá naʻe ʻikai ke u ʻiloʻi pe te ma felātani.

Neongo ʻa ʻeku ngaahi manavahē, naʻá ku ongoʻi ko ha meʻa lelei ke u fai ʻa e fokotuʻu ʻeku tangataʻeikí. Ne u lotua ke maʻu haʻaku ngaahi kaungāmeʻa ʻi heʻeku toe foki ʻo kamata ʻeku akó, ko ia ai ne u ongoʻi ne takiekina au ʻe he Tamai Hēvaní ʻi he fokotuʻu ʻa ʻeku tangataʻeikí. Naʻá ku pehē ke u fakahoko ia. Ne tali ʻe Holi ʻeku fakaafé, pea lolotonga ʻo e taʻu naʻá ma nofo fakataha aí, naʻá ne hoko ko e taha ʻo hoku ngaahi kaumeʻa mamae. Ne ʻomi ʻe Holi ha faleʻi mo e ʻofa lolotonga ʻo e ngaahi taimi mahuʻinga ʻo ʻeku moʻuí, pea ne u lava foki ʻo tokoniʻi ia.

ʻOku fonu ʻetau moʻuí he ngaahi fili ke tau fai. Mahalo ʻe kehekehe pē honau mahuʻingá, ka ko e taimi ʻe niʻihi ko e fanga kiʻi fili īkí te nau uesia lahi taha kitautolu ʻi he kahaʻú. Mahalo ne ʻikai ke ʻuluaki fakahā mai ʻe he Tamai Hēvaní pē ko e hā ʻa e fili ʻoku lelei taha ʻi he tūʻunga kotoa pē, ka kuó Ne ʻosi ʻomai kiate kitautolu ʻa e tauʻatāina ke fili ʻo fakatatau ki he ngaahi tefitoʻi moʻoni ʻo e ongoleleí mo laka atu ki muʻa ʻi he tui. Naʻe ʻikai ke u fakakaukau ʻe ʻomi ʻe heʻeku kaungā loki mo ia ʻi he kolisí ha ola ʻe tuʻuloa ʻi heʻeku moʻuí, ka naʻe hoko ia. Naʻá ku toki fakatokangaʻi pē hili ʻeku fetuʻutaki kia Holí ʻa e faingamālie kuo foaki mai ʻe he ʻEikí ke u fai ha fili lelei pē maʻaku, pea naʻá ku monūʻia ai. Koeʻuhí naʻá ku hoko atu ke fai ʻa e meʻa naʻá ku ongoʻi ʻoku totonu ke faí, ne lava ai ke fakafeʻiloaki mai ʻe he Tamai Hēvaní ha tokotaha fakaofo.

ʻOku ou fifili pe ko e hā ne mei hoko kapau ne u feinga fakahoko ha fanga kiʻi fili iiki makehe ʻi ha tōʻonga fakakaukau faka-Kalaisi angé—kapau ne u tuku ʻeku komipiuta toʻotoʻó (laptop) ki he tafaʻakí ʻi he taimi ne tangutu hifo ai ha finemui ʻi hoku tafaʻakí ke kai ʻene meʻakai hoʻatā ʻi loto ʻapi akó, pē kapau ne u toe vahevahe lahi ange ʻa e ngaahi meʻa ʻoku ou tui ki aí ʻi he taimi ne talamai ai ʻe haʻaku kaungāmeʻa naʻá ne veiveiua fekauʻaki mo e tui fakalotú. Mahalo pē ne ʻikai ke u ongoʻi mālohi ha ueʻi fakalaumālie ʻi he ngaahi momeniti ko iá, ka ne u ʻiloʻi ko e ngaahi meʻa lelei ia ke fai, pea ʻoku ou ʻilo pau ne mei liliu ia ʻe he ʻOtuá ki ha tāpuaki maʻakinautolu kotoa pe ne kau aí. Koeʻuhí naʻá ku fili ke ʻoua te u fai ha meʻa, ʻe ʻikai ai pē ke u teitei ʻilo pe ko e hā e meʻa naʻe mei hokó.

ʻOku tau faʻa fekuki ʻi hono fakahoko ha ngaahi fili ʻi he taimi ʻoku ʻikai ke ʻomai ai ha ueʻi fakahangatonu pe tali ʻoku mahinó. ʻI he ngaahi taimi ko iá, ʻe lava ai ke tau fakaʻaongaʻi ʻetau meʻafoaki ʻo e tauʻatāina ke filí ke fai ha ngaahi fili lelei maʻatautolu, kae ʻoua te tau tatali pē ki ha fakamahino mai ʻe he ʻOtuá. Naʻe akonaki ʻa Molomona, “Ko e meʻa kotoa pē ʻoku fakaafeʻi ke faileleí, pea ʻoku fakalotoʻi ke tui kia Kalaisí, ʻoku ʻomai ia ʻi he mālohi mo e foaki ʻa Kalaisí; ko ia te mou faʻa ʻiloʻi ai ʻi ha ʻilo haohaoa ʻoku tupu ia mei he ʻOtuáʼʼ (Molonai 7:16).

Ko ia aí, ko hoʻo toe fai pē ha fili, fakakaukauloto pē, “ʻOku lelei ia?” koeʻuhí ko e meʻa lelei kotoa pē ʻoku tupu ia mei he ʻOtuá. Hangē pe ko e ʻikai ke momou ʻa e Fakamoʻuí ke fai leleí, ʻi ha ngaahi founga lalahi mo e iiki te tau lava ʻo falala pē kiate kitautolu ke tau fili ke fai lelei ʻi he ʻaho kotoa pē. Pea ʻe liliu ʻe he ʻOtuá ʻa e ngaahi fili lelei ko iá ki ha ngaahi meʻa maʻongoʻonga.